Prezident İlham Əliyevin Sərəncamı ilə 2019-cu il “Nəsimi ili” elan edildikdən sonra ölkəmizdə və beynəlxalq aləmdə Nəsimi irsinin təbliği istiqamətində bir sıra tədbirlər keçirilib. “Nəsmi ili” çərçivəsində müxtəlif tədbirlərin keçirilməsində Heydər Əliyev Fondu xüsusi aktivlik göstərir.
Son günlər “Nəsimi ili” çərçivəsində respublikamızın ayrı-ayrı yerlərində ağacəkmə kampaniyasına başlanıb. Ölkə boyu 650 min ağac əkilməsi nəzərdə tutulub və ilin sonuna qədər bu proses başa çatdırılacaq.
Ağacəkmə kampaniyasında bir sıra yeniliklər yaşandı. Onlardan biri də Nəsimi obrazının ağacəkmə kampaniyasında görünməsi oldu. Nəsimi dövrünün mənzərəsini, geyim və davranış tərzini ifadə edən aktyorlar ictimaiyyət nümayəndələri ilə birgə ağac əkdilər. Nəsiminin 650 illiyi münasibətilə Nəsimi obrazının xalqın içində peyda olması və camaatla birgə ağac əkməsi sosial şəbəkələrdə birmənalı qarşılanmayıb. Nəsimi obrazının ağacəkmə kampaniyasında iştirakını lağlağı obyektinə çevirənlər hesab edirlər ki, bu düzgün deyil. Nəsiminin yubileyi çərçivəsində keçirilən ağacəkmə aksiyasında Nəsimi obrazının görünməsini, onun ağac əkməsini normal saymayanlarla yanaşı, bunu təqdir edənlər də çoxdur. Onlar hesab edirlər ki, Nəsimi obrazının ağacəkmə kampaniyasında və digər tədbirlərdə görünməsi tam normaldır. Bunu müsbət sayan sosial şəbəkə istifadəçilərinin fikrincə, Nəsiminin ictimaiyyətlə birgə ağac əkməsi, əksinə, onun cəmiyyətdə müsbət istiqamətdə təbliğ edilməsinə imkan verir. İnsanlar o obrazın timsalında gözləri önündə Nəsimini canlandırırlar. Bunun tarixi, mədəni irsimizə, böyük şəxsiyyətlərimizə böyük sayğı olduğunu yazan sosial şəbəkə istifadəçilərinin qənaətinə görə, Nəsimi obrazının ağacəkmə kampaniyasında görünməsini tənqid etmək, lağlağıya çevirmək düzgün deyil.
“Nəsimi obrazının ağacəkmə kampaniyasında iştirakını tənqid edən, lağlağıya çevirən insanların heç biri nə bir ağac əkdi, nə də bu aksiyaya dəstək verdi”
Yeni Yazarlar və Sənətçilər Qurumunun rəhbəri, yazıçı-kulturoloq Aydın Xan Əbilov da hesab edir ki, bəzi sosial şəbəkə istifadəçilərinin Nəsimi obrazına bu cür yanaşması müsbət hal deyil: “Azərbaycan sosial şəbəkə seqmenti öz qeyri-ciddiliyi ilə get-gedə məni heyrətləndirməyə başlayıb. Azərbaycanda baş verən ictimai-siyasi, hətta texnogenik, təbiət hadisələrini belə lağ obyektinə çevirən sosial şəbəkə istifadəçilərinə baxanda onların intellektual səviyyəsinin çox aşağı olduğunu görməmək olmur. Eyni zamanda, bu insanların dünyagörüşünün məhdud olduğunu müşahidə edirik. Nəsiminin 650 illik yubileyi ilə bağlı ölkəmizin Birinci vitse-prezidenti, Heydər Əliyev Fondunun rəhbəri Mehriban Əliyeva çox möhtəşəm bir ekoloji layihənin həyata keçirilməsi təşəbbüsünü irəli sürdü və bu layihəni bizim hamımız dəstəkləyirik. O cümlədən, mən özüm də Lənkəranda, öz doğma kəndimdə 60-dan çox ağacın əkilməsində iştirak etmişəm. Bu, həyata keçirilən ekolayihənin bir hissəsidir. Bilirsiniz ki, Azərbaycan yaşıllaşdırma və meşəsalma sahəsində kasad ölkələrdən biri sayılırdı. Amma son vaxtlar Prezident İlham Əliyevin, ölkəmizin Birinci vitse-prezidenti Mehriban Əliyevanın, İDEA təşkilatının rəhbəri Leyla Əliyevanın, eləcə də hökumət və dövlət qurumlarının təşəbbüsü ilə Azərbaycanda yaşıllaşdırma, ekoloji tarazlığın bərpa edilməsi ilə bağlı çox mühüm layihələr həyata keçirilir. Bütün dünyada müxtəlif bayramlar, mərasimlər keçirilir. Hindistanda keçirilən rənglər bayramında insanlar özlərini müxtəlif rənglərə boyayıb meymun halına salırsa, Cadugərlər mərasimində insanlar müxtəlif qorxulu maskalar taxıb vahimə yaradırlarsa və onu Azərbaycandakı bəzi sosial şəbəkə istifadəçiləri də dəstəkləyirlərsə, nə üçün onlar “Nəsimi ili” çərçivəsində həyata keçirilən bu nəcib təşəbbüsü lağlağı obyektinə çevirirlər? Bu, həmin insanların düşüncəsinin dar olmasından xəbər verir. Nəsimi obrazının cəmiyyətdə bu şəkildə görünməsi, onun ağacəkmə kampaniyası iştirakçılarının arasında görünməsi çox müsbət bir haldır. Nəsimi personajı bu aksiyada iştirak etməklə insanları daha da həvəsləndirir və bu ekoloji layihəyə daha da kreativlik qatır. Bu olduqca gözəl təşəbbüsdür. Necə ola bilir ki, müxtəlif tədbirlərdə Nəsimi obrazını təqdim edən şəxs səhnəyə çıxıb şeir deyə bilər, amma Azərbaycanın hər yerində bir günün ərzində 650 min ağac əkilmə kampaniyasında Nəsimi obrazının meydana çıxması kimlərisə narahat edir və bu obraza qarşı sosial şəbəkələrdə xoşagəlməz kampaniya aparırlar”.
A.X.Əbilov hesab edir ki, ölkədə müxtəlif sosial, ekoloji layihələrin həyata keçirilməsi zamanı bizə doğma olan obrazlardan, personajlardan istifadə edilməlidir. O hesab edir ki, tarixi şəxsiyyətlərin obrazını yaradan aktyorların hadisə zamanı insanların arasında olması o tədbirlərin daha yüksək səviyyədə keçirilməsinə imkan verir. “Amma bəzi sosial şəbəkə istifadəçiləri belə şeylərin mənasına varmadan hər şeyi lağlağıya çevirirlər. Nəsimi obrazının ağacəkmə kampaniyasında iştirakını tənqid edən, lağlağıya çevirən insanların heç biri nə bir ağac əkdi, nə də bu aksiyaya dəstək verdi, onlar küçələrini, həyətlərini zibilləyən, küçələrdə, yollarda ağacları kəsən, ekoloji tarazlığı pozan şəxslərdir. Nəsimi, Nizami, Babək, Füzuli, Zərdüş Peyğəmbər, Mirzə Fətəli Axundov, Məhəmməd Əmin Rəsulzadə, Heydər Əliyev, Həzi Aslanov kimi şəxsiyyətlər həmişə bizimlədir. Bizim tarixi şəxsiyyətlərimiz, qəhrəmanlarımız obraz şəklində hər zaman yanımızda görünməlidirlər ki, biz bu xalqın ruhunu, tarixini yaşadaq” - deyə A.X.Əbilov vurğuladı.
İradə SARIYEVA
