“Azərbaycan hökümətin bu addımı atmaqla Gürcüstan hökümətinin bu ölkədəki Azərbaycan məktəblərini bağlamağının qarşısını almış olacaq”
Uzun illərdir ki, Gürcüstanda yaşayan soydaşlarımızın Azərbaycanın ali məktəblərində ödənişsiz təhsil almasının təmin edilməsi ilə bağlı məsələ gündəmdə idi. Həm təhsil ekspertləri, həm də ziyalılar belə hesab edirdilər ki, Azərbaycanın ali məktəblərinə qəbul olunan Gürcüstan vətəndaşı olan azərbaycanlılara münasibət dəyşməlidir. Yəni onlar da digər xarici vətəndaşların ödədiyi məbləğdə təhsil haqqı ödəyirdi və onlara heç bir güzəşt edilmirdi.
Yayılan məlumatlara görə, Azərbaycan hökuməti Gürcüstan vətəndaşları olan azərbaycanlıların Azərbaycanın ali təhsil müəssisələrində pedaqoji ixtisaslar üzrə təhsil almaları üçün kvota ayırıb.
Azərbaycanın Diasporla İş üzrə Dövlət Komitəsinin Mətbuat xidmətinin verdiyi məlumata görə, 2020-2021-ci tədris ilindən etibarən Gürcüstan vətəndaşları olan azərbaycanlılar Azərbaycanın ali məktəblərində ödənişsiz təhsil alacaqlar və onlara təqaüd veriləcək:“Artıq Azərbaycan hökuməti tərəfindən kvota müəyyənləşdirilib. Bununla bağlı və eyni zamanda, sonradan həmin pedaqoqların Gürcüstandakı azərbaycandilli məktəblərdə işlə təmin olunmaları məsələsinin həlli üçün Azərbaycan və Gürcüstanın Təhsil nazirlikləri arasında danışıqlar planlaşdırılır. Növbəti dərs ili üçün bu kvotanın doldurulması ilə bağlı mexanizmlər müəyyənləşdiriləcək”-deyə komitədən bildirilib.
Tanınmış təhsil ekpeti Məlahət Mürşüdlü baki-xeber.com-a bildirdi ki, Azərbaycan hökümətinin belə bir addım atacağı gözlənilən idi. Gürcüstanda yaşayan soydaşlarımızın Azərbaycan ali təhsil müəssisələrində ödənişsiz və güzəştli təhsil almasının olduqca vacib olduğunu qeyd edən M.Mürşüdlünün sözlərinə görə, illərdir təhsil ekspertləri Azərbaycan ali məktəblərində Gürcüstan azərbaycanlılarının pedaqoji təhsil alması üçün şərait yaradılmasını təklif edib. “İnanın ki, bu məni çox sevindirdi. Çünki illərdir Azərbaycan hökumətinin belə bir addım atacağını gözləyirdik. Bilirsiz ki, Gürcüstanın müxtəlif rayonlarında azərbaycanlılar kompakt şəkildə yaşayır və həmin bölgələrdə, kənd və rayonlarda çox ciddi şəkildə pedaqaoji kadr qıtlığı var. Müəllimlərin çoxu yaşlanıb, artıq təqaüdə çıxıblar, müəllimsiz məktəblər isə Gürcüstan höküməti tərəfindən qapadılıb. Bu da onunla bağlıdır ki, Azərbaycan məktəbləri üçün gənc müəllim kadrları yoxdur. Bu kadrların yetişdirilməsi üçün isə Gürcüstan höküməti heç bir şərait yaratmır. Gürcüsandakı soydaşlarımız Azərbaycanın ali məktəblərində ödənişli təhsil alırdılar. Biz isə onlara müəyyən güzəştlərin edilməsini də təklif edirdik. Amma indi Gürcüstan azərbaycanlılarının Azərbaycan ali məktəblərində ödənişsiz təhsil almaları üçün növbəti tədris ilində kvota ayrılması çox müsbət nəticələr verəcək. Burada Gürcüstandakı Azərbaycan məktəbləri üçün müxtəlif fənlər, ixtisaslar üzrə müəllim kadrları yetişdiriləcək. Bunun nəticəsində isə bir neçə ildən sonra Gürcüstandakı Azərbaycan məktəbləri gənc pedoqoji kadrlarla təmin olunacaq”.
Azərbaycan Respublikasının Təhsil Nazirliyinin mütamadi olaraq Gürcüstandakı Azərbaycan məktəblərini dərsliklərlə təmin etsə də, nazirliyin Gürcüstana təyinatla müəllim göndərmək səlayiyyəti yoxdur. Bu səbəbdən də Gürcüstandakı soydaşlarımızın pedoqoji təhsil alması üçün şərait yaradıldığını deyən M.Mürşüdlünün sözlərinə görə, bunun çox böyük effektiv nəticələri olacaq:”Artıq Azərbaycan höküməti Gürcüstanda yaşayan azərbaycanlıların pedaqoji sahədə ödənişsiz təhsil alması ilə bağlı problemi həll edib. Azərbaycan höküməti bu addımı atmaqla Gürcüstan hökümətinin bu ölkədəki Azərbaycan məktəblərini bağlamağının qarşısını almış olacaq. Yəni Azərbaycanda hazırlanan pedaqoji kadrlar Gürcüstan məktəblərində dərs deyəcək və Gürcustan höküməti də Azərbaycan məktəblərini bağlamaq üçün heç bir əsas tapa bilməyəcək”.
İradə SARIYEVA
