“ASAN xidmət”in bəyənilmə əmsalı təxminən 100 faizə yaxındır. Yəni bu, insanların bu xidmətə verdikləri qiymətdir”. Prezident İlham Əliyev bu fikirləri Bakıda 1 saylı “ASAN kommunal” Mərkəzinin açılışı zamanı deyib.
O qeyd edib ki, son bir neçə il ərzində “ASAN xidmət”ə 13 milyon müraciət olub. “Şadam ki, mənim təşəbbüsümlə yaradılmış bu xidmət bu gün nəinki ölkəmizdə, hətta xarici ölkələrdə də böyük rəğbətlə qarşılanır. “ASAN xidmət”in vətəndaşlar tərəfindən bəyənilmə əmsalı 99,4 faizdir. Yəni bu, onu göstərir ki, xidmət doğrudan da böyük nailiyyətdir, ictimai xidmətlər sahəsində böyük dəyişikliklərə gətirib çıxarıb”.
Ekspertlərin fikrincə, “ASAN xidmət”in bəyənilmə əmsalıının 99 faiz olması gözlənilən idi.
“…əhalinin 99 faizi yalnız “ASAN xidmət”dən yararlanır”
Sosial sahə üzrə ekspert İlqar Hüseynli bildirdi ki, “ASAN xidmət” mərkəzlərində yaradılan şərait vətəndaşlar üçün bütün xidmətləri əlçatan edib, bu səbəbdən də hazırda bu qurumun bəyənilmə əmsalı 100 faizə yaxındır: “Məlumdur ki, vətəndaşlar bəzi dövlət qurumlarında uzun müddət idi ki, süründürməçilik, bürokratiya ilə üzləşirdi. Bu gün vətəndaşların “ASAN xidmət” mərkəzlərində bunları görməməsi, bütün problemlərini eyni yerdə həll etməsi əhalinin bu xidmətdən yararlanmağa marağını artırıb. Məlumdur ki, Azərbaycanda bir neçə ildir fəaliyyət göstərən “ASAN xidmət” mərkəzləri insanların həyatına yaxından daxil olub. Uzun illər dövlət qurumlarında bürokratiya, süründürməçilik, get-gəllə üzləşən vətəndaşlar bu gün “ASAN xidmət” mərkəzlərində bu hallarla qarşılaşmırlar. Azərbaycan Respublikasının Prezidenti İlham Əliyevin ideyası əsasında təsis edilən “ASAN xidmət”in yaradılmasında məqsəd vətəndaş məmnunluğunu təmin etmək, onların müxtəlif məsələlərlə bağlı sənədləşdirmə problemlərini asanlıqla yoluna qoymaqdır. Artıq “ASAN xidmət” özünü doğruldub. Burada vətəndaşları cəlb edən ən mühüm məsələlərdən biri onunla bağlıdır ki, vətəndaş ona aid olan sənədləşdirmə işlərini eyni binada həyata keçirir. Bir mərtəbədə həm notariat, həm bank, həm də digər xidmət sahələri fəaliyyət göstərir və vətəndaş vaxt itkisinə yol vermədən bütün sənədləşmə işini həll edə bilir. Onu da deyim ki, “ASAN xidmət” sistemində vətəndaşlara xidmət göstərən xidmət sahələrində şəffaflıq tam təmin olunub. Vətəndaşdan rüşvət, “şirinlik” tələb olunmur, aldıqları sənədlərə dövlət tərəfindən müəyyən edilmiş məbləğdə vəsait ödəyirlər. Bu da onlar üçün sərfəlidir. Bilirsiniz ki, “ASAN xidmət” mərkəzləri fəaliyyətə başladıqdan sonra vətəndaşlar sənədləşmə işləri üçün tək-tük hallarda başqa orqanlara müraciət edirlər. Bu da o deməkdir ki, əhalinin 99 faizi yalnız “ASAN xidmət”dən yararlanır”.
Həmsöhbətimiz onu da vurğuladı ki, “ASAN xidmət” mərkəzlərində həyata keçirilən işlər vətəndaşları tam olaraq təmin edir: “Vətəndaşlar razı qalmasalar, heç bir vaxt “ASAN xidmət”ə müraciət etməzlər. “ASAN xidmət” artıq dövlətin və xalqın etimadını doğruldub”.
Günel CƏLİLOVA
