Goranboy Qeydiyyat Şöbəsinin rəisi ədliyyə işçilərinin peşə bayramı təəssüratlarından danışdı…
100-dən çox yaşı olan Azərbaycan ədliyyəsi uzun və şərəfli yol keçib. Dövlətçiliyin əsas sütunlarından biri olan ədliyyə sistemində milli kadrların yetişdirilməsi məsələsi də həmişə diqqət mərkəzində olub. Ölkəmizin ədliyyə sistemindən danışmağımız təsadüfi deyil, çünki noyabrın 22-də ədliyyə işçilərinin peşə bayramıdır.
Qeyd edək ki, müstəqil Azərbaycan dövlətinin Ədliyyə Nazirliyi ilk dəfə 1918-ci ilin may ayının 28-də – Azərbaycan Xalq Cümhuriyyətinin elan edildiyi gün yaradılıb, təcrübəli dövlət xadimi Xəlil bəy Xasməmmədov ilk ədliyyə naziri təyin olunub. Həmin ilin noyabr ayının 22-də nazirliyin əsasnaməsi təsdiq edilərək, onun funksiya və səlahiyyətləri müəyyənləşdirilib. Ədliyyə Nazirliyinin dövlətin yaradıldığı gün təsis edilməsi milli dövlət quruculuğunda ədliyyə sisteminə xüsusi əhəmiyyət verilməsinə dəlalət edir.
Özünü Azərbaycan Xalq Cümhuriyyətinin varisi elan edən müstəqil Azərbaycan Respublikasında ədliyyə işçilərinin peşə bayramı da noyabrın 22-də qeyd edilir.
Respublikamızın hər rayonunda, şəhərində ədliyyə orqanları mövcuddur, müxtəlif istiqamətləri əhatə edən bu qurumun əməkdaşları ictimaiyyətə, vətəndaşlara xidmət göstərirlər. Sözsüz ki, Azərbaycanın bölgələrində ədalətin bərqərar olmasında əvəzsiz rolu olan ədliyyə qurumlarına vətəndaşlar tez-tez müraciət edirlər.
- “Goranboy Rayon Qeydiyyat Şöbəsinin rəhbəri kimi məqsədim vətəndaşlara peşəkar səviyyədə, yüksək keyfiyyətli, faydalı xidmət göstərməkdir”
Azərbaycan ədliyyəsinin 101 illiyi münasibətilə Goranboy Rayon Qeydiyyat Şöbəsinin rəisi Tuqay Cavanşir oğlu Sərdarlı ilə əlaqə saxlayıb onunla ədliyyə sahəsindəki uğur və nailiyyətlər haqqında danışdıq.
T.Sərdarlı 2008-ci ildən indiyə qədər Goranboy Rayon Qeydiyyat Şöbəsinin rəisi vəzifəsində çalışır. Əvvəllər hüquq-mühafizə orqanlarında müxtəlif vəzifələrdə işləyən T.Sərdarlı 11 ildir rayon üzrə bu sahəyə rəhbərlik edir. “Bu günə kimi də bu sahədə işləyirəm və fəaliyyətimdə heç bir problemlə üzləşməmişəm. Ədliyyə Nazirliyi respublika üzrə ideal fəaliyyət göstərən nazirlikdir. Həm də bu sahədə çox geniş və sürətli inkişaf mövcuddur. Bu sahədə müasir informasiya texnologiyalarından geniş istifadə olunur. Ona görə də təsadüfi deyil ki, bu sahədə daha çox iş görmək, vətəndaşlara xidmət göstərmək mümkündür. Respublika Prezidentinin bu sahə üzrə çox mühüm sərəncamları, fərmanları, qərarları olub. Bu sənədlərin də imzalanması, icra edilməsi ədliyyə sahəsinin inkişafına səbəb olub. Goranboy Rayon Qeydiyyat Şöbəsinin rəhbəri kimi məqsədim vətəndaşlara peşəkar səviyyədə, yüksək keyfiyyətli, faydalı xidmət göstərməkdir. 22 noyabrın Azərbaycanda ədliyyə işçilərinin peşə bayramı kimi qeyd edilməsi ulu öndərin bu sahəyə verdiyi ən böyük, qiymətli töhfələrdən biridir. Hər il davamlı olaraq, respublikamızın hər yerində olduğu kimi, Goranboy rayonunda da ədliyyə işçilərinin peşə bayramı çox yüksək səviyyədə, təntənə ilə qeyd edilir. Rayon rəhbərliyi bayramımız münasibətilə rayonun ədliyyə işçilərini təbrik edir, bu sahədə əldə etdiyimiz uğurları müxtəlif mükafatlar, fəxri fərmanlarla qiymətləndirir”.
T.Sərdarlı qeyd etdi ki, Azərbaycanda ədliyyə orqanlarının yaradılmasının böyük tarixi var və onun yaradılması tarixi Azərbaycan Xalq Cümhuriyyətinin yaradılması ilə üst-üstə düşür. “Cümhuriyyət qurulduqda AXC hökumətinin əldə etdiyi uğurlardan biri məhz Azərbaycanın ilk Ədliyyə Nazirliyinin yaradılması olub. Ondan sonrakı dövrdə, yəni respublikamızın Sovetlər Birliyinin tərkibində olduğu illərdə Azərbaycanda Ədliyyə Nazirliyi o qədər də mütəşəkkil orqan kimi mövcud olmayıb. Ulu öndər hakimiyyətə gəldikdən sonra ayrıca Ədliyyə Nazirliyinin yaradılması haqqında qərar qəbul edilib və nazirlik yaradılıb. Bu sahənin inkişafına ulu öndər çox böyük töhfələr verib. Bir məsələni də deyim ki, ulu öndərin ədliyyə sahəsinə ən böyük töhfələrindən biri bilavasitə milli kadrlardan istifadə edərək yeni Azərbaycan ədliyyəsini yaratması olub. Bu orqana Azərbaycanda tanınan, böyük nüfuza malik olan, yüksək peşəkarlıq qabiliyyətinə, biliyinə, təcrübəsinə malik olan hüquqşünas kadrlar cəlb olunub. Nəticə etibarilə də deyərdim ki, Azərbaycanda bu sahəyə Avropada, dünya səviyyəsində mövcud olan innovasiyalar tətbiq edilməklə, Azərbaycan ədliyyəsi inkişaf etməyə başlayıb. Məsələn, Azərbaycanda məhkəmə-hüquq sistemi xeyli təkmilləşdirilib. Bura çoxpilləli məhkəmə sistemi yaradılması, Penitensiar Xidmətin yaradılması və onun inkişafı, cəzaçəkmə müəssisələrində texniki, eləcə də digər şəraitlərin bir neçə dəfə yaxşılaşdırılması, dünya standartlarına gətirilib çıxarılması, müasir Azərbaycan ədliyyəsində informasiya texnologiyalarından səmərəli istifadə edilməsi və s. daxildir. Ulu öndərdən sonra da Azərbaycan Respublikasının Prezidenti cənab İlham Əliyev tərəfindən imzalanmış müvafiq sərəncamlar, verilmiş qərarlar əsasında bu günə kimi ədliyyə orqanları mütəşəkkil olaraq inkişaf etdirilir. Mən bunu fəxrlə deyirəm, təsadüfi deyil ki, Azərbaycan ədliyyə orqanları nöqsansız və problemsiz fəaliyyət göstərirlər”.
Azərbaycan və dünya üçün tamam yeni olan “ASAN xidmət” sahəsində ədliyyə orqanlarının da xüsusi xidmətinin olduğunu deyən T.Sərdarlının sözlərinə görə, Prezidentin təşəbbüsü ilə yaradılan “ASAN xidmət” bir Azərbaycan brendi kimi nailiyyətlər əldə edib. “ASAN xidmət” mərkəzlərinin iş fəaliyyətinə vətəndaşlıq vəziyyəti aktlarının qeydiyyatı ilə bağlı bütün əməliyyatların icrası daxil edilib. “Vətəndaşların “ASAN xidmət”ə müraciəti əsasında qeydiyyat şöbəsinin səlahiyyətində olan bütün işlər həll edilir. Deyərdim ki, bu özü ədliyyə sahəsində ən böyük yenilikdir. Deyə bilərəm ki, heç Avropanın özündə vətəndaşlar üçün belə bir yenilik, belə bir şərait yaradılmayıb. Ədliyyə sahəsində də cənab Prezidentin təşəbbüsü ilə təsis edilən “ASAN xidmət” Azərbaycan brendi tətbiq olunur. Onu da qeyd edim ki, dövlət rəhbərliyi tərəfindən bu sahədə imzalanan sərəncamlar, fərmanlar, verilən qərarlar şəxsən ədliyyə naziri cənab Fikrət Məmmədov tərəfindən çox böyük uğurla icra edilir, həyata keçirilir. Məhz onun ideal fəaliyyəti nəticəsində mövcud olan inkişafa, fərqli fəaliyyətə, müsbət nəticələr əldə edilməsinə nail olmaq mümkün olub. Eyni zamanda, qeyd etməliyəm ki, Qeydiyyat və Notariat Baş İdarəsinin rəhbərliyi də gündəlik qarşıda duran vəzifələr müvəffəqiyyətlə həyata keçirilir, rəhbər dövlət orqanlarının sərəncam və göstərişləri yerinə yetirilir. Biz də, o cümlədən, aldığımız əmr və göstərişləri vaxtında icra etməyə çalışırıq” - deyə T.Sərdarlı qeyd etdi.
İradə SARIYEVA
