Artıq bir neçə ildir tıxaclar Bakıda əsas problemlərdən birinə çevrilib. Maraqlı fakt ondan ibarətdir ki, tıxaclar yalnız mərkəzdə və pik saatlarında deyil, şəhərin istənilən yerində, istənilən saatda yaranır. Bu barədə çox yazılıb, çox deyilsə də, problemin həlli yolunda qismən irəliləyiş müşahidə olunur.
Qəzaya düşən sürücülər hadisə yerinə yol polisi və sığorta şirkətinin əməkdaşlarının gəlməsini gözləyirlər. Odur ki, qəzadan sonra ucu-bucağı görünməyən tıxaclar yaranır. Təbii ki, bu haldan vətəndaşlar əziyyət çəkirlər.
Maraqlıdır, yolda nəqliyyatın hərəkətinə mane olan, insanların vaxtını alan bu cür hadisələri necə tənzimləmək olar ki, sürücülər uzun müddət sığorta şirkəti nümayəndəsini gözləmək məcburiyyətində qalmasınlar?
Nicat Əlibəyli: “Sığorta nümayəndəsi müəyyən səbəblərdən hadisə yerinə gecikirsə…”
Məsələ ilə bağlı fikir bildirən sığorta sahəsi üzrə mütəxəssis Nicat Əlibəyli “Bakı-Xəbər”ə açıqlamasında qeyd etdi ki, yol-nəqliyyat hadisəsi baş verən zaman olayla bağlı Dövlət Yol Polisinin əməkdaşına, eyni zamanda, sığorta komissarlığına mütləq xəbər verilməlidir: “Sığorta şirkətinin əməkdaşının qəza baş verdiyi ərazidə olması vacibdir. Sığorta nümayəndəsi müəyyən səbəblərdən hadisə yerinə gecikirsə, yenidən sığorta şirkəti ilə əlaqə saxlanaraq bildirilir ki, Dövlət Yol Polisinin əməkdaşları vəziyyəti nəzarətə alıb, qəza ilə bağlı şəkillər çəkilib. Bu məlumatlar sığorta şirkətinin nümayəndəsinə bildirildikdən sonra qəzaya uğrayan nəqliyyat vasitələri həmin ərazini tərk edə bilərlər”.
Həmsöhbətimiz hesab edir ki, sığorta komissarlarının hadisə yerinə gec gəlmələrinin müxtəlif səbəbi ola bilər. Sığorta nümayəndələrinin digər hadisə yerində olması onların başqa bir ərazidə qeydə alınan qəza yerinə gec gəlmələrinə səbəb ola bilər.
İlqar Hüseynli: “Qanun icazə verir ki, maşını, müəyyən qədər də olsa, yol kənarına çəksinlər və tıxaca səbəb olmasınlar”
Sosial sahə üzrə ekspert İlqar Hüseynli bildirdi ki, bu gün müxtəlif səbəblərdən şəhərdə uzun-uzadı tıxac əmələ gəlir. Tıxacın yaranması səbəblərindən biri də avtoqəza zamanı sığorta şirkətinin nümayəndələrinin hadisə yerinə gec gəlməsidir. Bu hadisə ilə istənilən şəxs üzləşib və ya üzləşə bilər. Bunun da müəyyən səbəbləri var: “Sığorta şirkətləri bəzən ödəniş etməmək üçün o qədər bəhanə gətirirlər ki, sürücülər də bunun üçün maşını yerindən tərpətmədən sığortaçını gözləyirlər. “Yol hərəkəti haqqında” Qanun buna icazə verir ki, 1000 manata qədər dəymiş zərərə görə hadisə yerində dayanıb nə sığorta şirkətinin nümayəndəsini, nə də polis əməkdaşlarını gözləməyə ehtiyac yoxdur. Sürücülər öz aralarında razılığa gəlirlər. Bundan başqa, xüsusi texniki vasitələr var ki, avtomobilin şəklini çəkmək olur. Sürücülər özləri hadisə yerindən çəkiliş edib həmin görüntüləri yol polisinə göstərərək, kimin günahkar, kimin günahsız olduğunu müəyyənləşdirirlər. Yol polisi də buna uyğun olaraq protokol tərtib edir, həmin protokolla bərabər, "Forma 4” arayışı verilir. Bu arayışın əsasında isə sığorta ödənişi edilir. Sadəcə, sığorta şirkətləri sürücüləri incidir, maşının yerindən tərpədilməsi ilə bağlı çoxlu bəhanə gətirirlər. Təsəvvür edin, bəzən polisin protokolunu belə şübhə altına alırlar. Ona görə kiçik zərərdə belə, sürücülər saatlarla sığorta şirkətinin əməkdaşının gəlməsini gözləyirlər. Qanun icazə verir ki, maşını, müəyyən qədər də olsa, yol kənarına çəksinlər və tıxaca səbəb olmasınlar”.
Günel CƏLİLOVA
