12/12/2019 01:47
728 x 90

Azərbaycanda qatarların sürəti 40 kilometrdən 140-a qaldırılsa…

Rəşad Həsənov: “Sürətin artırılması son nəticədə həm zamana qənaət edilməsinə, həm də insanların bu kimi nəqliyyat vasitələrindən istifadəyə marağının artmasına gətirib çıxara bilər”

img

Məlum olduğu kimi, Prezident İlham Əliyev “Azərbaycan Dəmir Yolları” Qapalı Səhmdar Cəmiyyətinin sədri Cavid Qurbanovu qəbul edərkən ölkənin nəqliyyat sektorunda xüsusi yeri olan  dəmir yolunun hazırkı vəziyyətinə toxunub.

Bu sahədə qarşıda duran bir sıra vəzifələrin həyata keçirilməli olduğunu deyən ölkə başçısı qeyd edib ki, vətəndaşların mənzil başına vaxt itkisinə yol vermədən çatdırlması, rahat gediş-gəlişin təmin edilməsi üçün daha geniş işlər görülməlidir: “…Eyni zamanda, baxmayaraq ki, Şimal-Cənub nəqliyyat dəhlizi işləyir, ancaq Bakı-Yalama və Ələt-Astara dəmir yollarının vəziyyəti bizi qane edə bilməz. Çünki vaxtilə orada təmir işləri aparılmamışdır. Yollar tamamilə yenidən qurulmalıdır ki, qatarların sürəti artsın. Hazırda qatarlar saatda təqribən 40, maksimum 50 kilometr sürətlə gedir. Bu, böyük yükləri daşımağa və sərnişinlərə keyfiyyətli xidmət göstərməyə imkan vermir. Ona görə bizim məqsədimiz həm Şərq-Qərb, həm də Şimal-Cənub nəqliyyat dəhlizlərinin dəmir yolu hissəsinin modernləşdirilməsidir. Elə etməliyik ki, qatarlar saatda minimum 140 kilometr sürətlə hərəkət edə bilsin. Artıq Bakı-Yalama və Ələt-Astara dəmir yollarının modernləşdirilməsi prosesi başlanmışdır…”.

Azərbaycanda qatarların sürətinin saatda minimum 140 kilometrə çatdırılmasının sərnişinlərin rahatlığının təmin olunmasında, onların vaxt itkisinə yol vermədən vaxtında mənzil başına çatdırılmasında, ümumiyyətlə, bu sahədə hərəkətin daha dinamik olmasında nə kimi effektiv təsiri olacaq?

Ekspertlər qeyd edirlər ki, sərnişin qatarlarının sürət həddinin qaldırılmasına ciddi ehtiyac var. Onlar hesab edirlər ki, qatarların sürət həddinin 40-dan 140 çatdırılması sərnişinlərin, turistlərin hərtərəfli rahatlığının təmin edilməsi, eyni zamanda, onların tıxaca düşmədən, əlavə maneə ilə üzləşmədən mənzil başına çatmasına şərait yaradacaq.

“…dəmir yollarının yüksək gəlirlə fəaliyyət göstərməsi üçün bir baza…”

Tanınmış iqtisadçı-ekspert Rəşad Həsənov “Bakı-Xəbər”ə bildirdi ki, sürət həddinin 140-a çatdırılmasının müsbət tərəfləri çoxdur, onlardan biri də sərnişin məmnunluğunun təmin edilməsidir: “Ümumiyyətlə götürdükdə, dövlət müəssisələri arasında “Azərbaycan Dəmir Yolları” ən aşağı keyfiyyətdə xidmət göstərən müəssisələrdən biridir. Bu günə qədər bu sahəyə kifayət qədər vəsait xərclənməsinə, investisiya qoyulmasına baxmayaraq, hələ də Azərbaycanda bu seqmentin xidmətlərinin səviyyəsi dünya standartlarından qat-qat aşağıdır. Sürət həddi də burada parametrlərdən biridir. Sözsüz ki, infrastruktur müasir tələblərə uyğunlaşdırılmalıdır. Artıq regionda tranzit qovşağına çevrilmək iddiasını ortaya qoymuşuqsa, bu, məcburi çağırışlardan biridir, bu istiqamətdə addımların atılmasına ehtiyac var. Təbii ki, qatarların sürətinin 40-dan 140-a çatdırılmasının böyük əhəmiyyəti olacaq. Sürətin artırılması son nəticədə həm zamana qənaət edilməsinə, həm insanların bu kimi nəqliyyat vasitələrindən istifadəyə marağının artmasına gətirib çıxara, eyni zamanda, turizm üçün də kifayət qədər əhəmiyyətli potensial formalaşdıra bilər. Bu gün bilirik ki, “Azərbaycan Dəmir Yolları” bir neçə ölkəyə, o cümlədən də Rusiyaya, Gürcüstana sərnişin daşıyır, yaxın zamanlarda isə Türkiyəyə sərnişin daşıyacaq. Sərnişinlərin daşınmasında sürət həddinin artması əhəmiyyətli faktorlardan, məqamlardan biridir. Bu baxımdan da müsbət nəticələrə gətirib çıxara bilər”.

R.Həsənov qeyd etdi ki, dəmir yolları biznes infrastrukturu üçün də çox əhəmiyyətli seqmentlərdən hesab olunur. “Yüklərin dəmir yolu ilə daşınması ən aşağı xərcli nəqliyyat növü hesab olunur. Sürətin artırılması dəmir yolundan istifadə potensialını genişləndirə və dəmir yollarının yüksək gəlirlə fəaliyyət göstərməsi üçün bir baza formalaşdıra bilər, həmçinin, biznesin tranzit nəqliyyat xərclərini də aşağı salmış olar. Dəmir yollarında təklif olunan xidmətlərin artırılması, o cümlədən də sürətin artırılması iqtisadiyyatın bütün seqmentlərinə mərhələli şəkildə öz təsirini göstərə bilər” -deyə R.Həsənov qeyd etdi.

İradə SARIYEVA 

Son xəbərlər