Qəbələ dəmir yolu – Azərbaycan Prezidenti Sovet hakimiyyətinin səhvini düzəldir
Azərbaycanda turizmin inkişafı üçün əlverişli imkanlara malik olan bölgələrdən biri də Qəbələ rayonudur. Məlumdur ki, Azərbaycanın gözəl məkanlarından biri olan Qəbələ həm də çoxlu sayda tarixi abidəsi, maddi-mədəniyyət nümunələri ilə məşhurdur. Bu tarixi abidələr Qəbələnin tarixinin min illər bundan əvvəllərə gedib çıxdığını göstərir.
Bu füsunkar yurd yerinin qədim tarixi, adət-ənənələri, xalq sənəti nümunələri çox zəngindir. Şanlı keçmişə malik və yüz illər boyu Qafqaz Albaniyasının paytaxtı olmuş Qəbələnin hansı daşını tərpətsən, haraya ayaq bassan, orada min illər bundan əvvəlki tariximizin izlərini görmək olar. Qəbələnin hər daşı, hər ağacı, hər qayası canlı bir tarix, ulularımızın bizə yadigar qoyub getdiyi əvəzsiz incilərdir.
Qeyd edək ki, son illər Qəbələ bir sıra beynəlxalq mədəni-kütləvi tədbirlərə evsahibliyi edir. Həmin tədbirlər nəticəsində bu rayona işgüzar səfərə və istirahətə gələnlərin sayı dəfələrlə artıb. Artıq ənənə halını almış və hər ilin yay aylarında keçirilən Qəbələ Beynəlxalq musiqi festivalında dünyanın 20-yə yaxın ölkəsindən dünya şöhrətli musiqiçilər iştirak edirlər. Festivalda səsləndirilən klassik musiqiləri canlı dinləmək üçün yüzlərlə yerli və xarici musiqi həvəskarı Qəbələyə təşrif buyurur. Qonaqlar musiqi bayramında iştirak etməklə yanaşı, rayonun müasir turizm obyektlərində dincəlir, tarixi abidələri ilə tanış olur, əsrarəngiz təbiətini seyr edirlər. Onu da bildirək ki, hər il iyunun 15-də Qəbələ rayonunda turizm mövsümünə rəsmən start verilsə də, artıq mayın ortalarından başlayaraq turistlərin bu əraziyə intensiv axını müşahidə olunur.
Tək cari ilin 9 ayı ərzində Qəbələyə 150 mindən çox turist gedib. Gələcəkdə bu rəqəmin daha da artacağı istisna olunmur.
Qeyd etdiyimiz kimi, son illər Qəbələyə üz tutan turistlərin sayı artmaqda davam edir. Turistlərin Qəbələyə rahat şəkildə getməsi üçün ora dəmir yolunun çəkilməsinin vacibliyi qeyd olunur.
Bu günlərdə Prezident İlham Əliyev “Azərbaycan Dəmir Yolları” Qapalı Səhmdar Cəmiyyətinin sədri Cavid Qurbanovu qəbul edərkən Qəbələyı dəmir yolunun çəkilməsinin əhəmiyyəti haqqında fikir bildirib. Prezident qeyd edib ki, turizm mərkəzlərindən biri olan Qəbələ şəhərinə dəmir yolunun çəkilişi layihəsi davam etdirilir: “Sovet vaxtında Qəbələyə dəmir yolu çəkilməmişdir, buna ehtiyac yox idi, ancaq hazırda buna böyük ehtiyac var. Mən bu təşəbbüsü irəli sürəndə bəziləri fikirləşirdilər ki, buna ehtiyac yoxdur. Halbuki, bu yaxınlarda Qəbələdə olarkən mənə məlumat verildi ki, bu ilin 9 ayında Qəbələyə 150 min turist gəlmişdir. Ancaq söhbət otellərdə yerləşən turistlərdən gedir. Əgər fərdi qaydada evlərdə kirayədə qalan turistləri nəzərə alsaq, bu, əlavə 150 min olacaq. Qəbələyə 300 min turist gəlib. Qəbələyə bir yol var – Şamaxı-Qəbələ yolu. O yol da artıq mənim göstərişimlə yenidən qurulacaq. Əlbəttə ki, bu yol artan turizm qrafikini götürə bilməyəcək. Ona görə Ləkidən Qəbələyə dəmir yolunun çəkilməsi xüsusi əhəmiyyət daşıyır”.
Nahid Bağırov: “Qəbələyə dəmir yolu xətlərinin çəkilməsi ora gedən yolun məsafəsinin və səfər müddətinin azalmasına gətirib çıxaracaq”
Turizmin inkişafı baxımından Qəbələyə dəmir yolu xəttinin çəkilməsinin əhəmiyyəti haqqında danışan Azərbaycan Turizm Assosiasiyasının (AzTA) sədri Nahid Bağırov qeyd edib ki, Qəbələ, Quba və Qusar infrastruktur baxımından turistlərin üz tutduqları yerlər arasında ön sıralarda dayanır: “Bu regionlar turistlər arasında prioritet sırada dayanır. Xüsusən də ərəblər arasında bu bölgələr çox məşhurdur. Qəbələyə dəmir yolu xətlərinin çəkilməsi ora gedən yolun məsafəsinin və səfər müddətinin azalmasına gətirib çıxaracaq. Bu da bölgələrin turizm imkanlarını genişləndirməklə bərabər, iqtisadi inkişafını da sürətləndirəcək”.
- Ruslan Quliyev: “Qəbələyə çəkiləcək dəmir yolu nəinki daxili turizmin, həmçinin, beynəlxalq turizmin inkişafına da töhfəsini verəcək”
Sağlamlıq və Termal Turizmə Dəstək Assosiasiyasının sədri Ruslan Quliyev bildirdi ki, qatar turizmi Avropada və digər inkişaf etmiş ölkələrdə böyük inkişaf yolu keçib. Onun sözlərinə görə, qatar turizminin inkişaf etdirilməsinə böyük ehtiyac var: “Qatar turizmini bu gün Azərbaycan üçün çox aktual turizm növlərindən biri hesab etmək olar. Bu nəqliyyat vasitəsi həm də məktəblilər və gənclər üçün geniş imkanlar yaradır. Dəmir yolu nəqliyyat vasitəsi turistlər üçün çox cəlbedicidir, çünki digərlərinə nisbətən daha təhlükəsiz hesab olunur. Qatarla səyahət edən turistlər ətrafdakı mənzərəni daha rahat seyr edə bilirlər. Həmçinin, getdikləri yerə daha rahat çatma baxımından nəqliyyatın bu növü daha sərfəlidir".
Həmsöhbətimiz onu da vurğuladı ki, Qəbələyə çəkiləcək dəmir yolu nəinki daxili turizmin, həmçinin, beynəlxalq turizmin inkişafına da töhfəsini verəcək: “Həmin yerə qatar hərəkət etdikdən sonra ölkəyə gələn turistlərin sayı artacaq. Qəbələyə qatarla getmək reallaşandan sonra bu, kütləvi turizmə də təsir edəcək”.
Günel CƏLİLOVA
