15/11/2019 04:27
728 x 90

Bakı-Sumqayıt yolu təmir üçün bağlansa, alternativ olacaqmı?

img

Məlum olduğu kimi, Azərbaycan Respublikasının Prezidenti İlham Əliyev oktyabrın 31-də paytaxtın Yasamal rayonunda Şəfayət Mehdiyev küçəsinin Tbilisi prospektindən Landau küçəsinədək olan hissəsində yenidənqurmadan sonra görülən işlərlə tanış olarkən daha bir mühüm problemin həlli ilə bağlı Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədova göstəriş verib.

Prezident uzun illərdir tıxac problemi ilə üzləşən Bakı-Sumqayıt magistral yolundan danışıb: “Mənə məlumat verilir ki, Bakı-Sumqayıt yolunda tez-tez tıxaclar olur. Baxmayaraq ki, indi qatar da işləyir və vətəndaşların bir hissəsi qatardan istifadə edir, yenə də tıxaclar var. Ona görə baxın, bu yolu genişləndirmək üçün texniki imkan olmalıdır, layihə hazırlayın. Biz o yolu genişləndirməliyik, lazımi vəsait ayırarıq".

Qeyd edək ki, Bakı-Sumqayıt yolu ölkənin ən işlək yollarından biridir. Həmin yol təmirə dayanarsa, nəqliyyatın hərəkətinin iflic olmaması üçün alternativ yol varmı? Varsa, həmin yol gün ərzində qeyd olunan istiqamət üzrə hərəkət edən nəqliyyat vasitələrinə tab gətirə bilərmi? 

  • İlqar Hüseynli: “Alternativ yol kimi metro xətti çəkilməlidir”

Sosial məsələlər üzrə ekspert İlqar Hüseynli təklif edir ki, alternativ yol kimi metro xətti çəkilsin: "Tıxac əsas olaraq "Şamaxinka” deyilən ərazidən başlayaraq Bakı Mühəndislər Universitetinə qədər davam edir. Amma ən problemli bölgə ekologiya postuna qədər olan hissədir. Genişləndirmə işlərinin burada aparılması daha məqsədəuyğun hesab edilir. Həmin ərazidə iki tunel var, biri Xırdalan dairəsində, digəri isə "Şamaxinka” tərəfdən Bakıya gələn yoldadır. Tıxaclar əsasən bu istiqamətdə olan yollarda müşahidə edilir. Hesab edirəm ki, Xırdalan dairəsində genişləndirmə işlərinin aparılması mümkündür. Əslində, həmin yol əvvəldən daha geniş inşa edilsəydi, bu gün belə problemlə rastlaşmazdıq. Tunellərdə genişləndirmə işləri edilsə və ya alternativ yerüstü nəqliyyat xətti çəkilsə, tıxaclar azalar. Həmin ərazidə yerləşən ekologiya postunun yerinin dəyişdirilməsi də mümkündür. Postun yerinin dəyişdirilməsi də nəqliyyatın intensivliyindəki problemi qismən aradan qaldırar. Düşünürəm ki, metro tikintisi də bu istiqamətdə olan tıxacların həllinə kömək edər. Belə ki, fərqi yoxdur, istər yerüstü, istər yeraltı metro xəttinin çəkilişi alternativ yol sayıla bilər. Çox yaxşı olar ki, metronun “Avtovağzal” stansiyasından Xırdalana, Xırdalandan Masazır, Saray və Sumqayıt ərazilərinə xətt çəkilsin”.

Rauf Ağamirzəyev: “Paytaxtın Abşeron yarımadasında yerləşməsi və qərb hissəsinin dağlıq relyef olması alternativ yolların çəkilməsi imkanlarını məhdudlaşdırıb”

Nəqliyyat sahəsi üzrə ekspert Rauf Ağamirzəyev bildirdi ki, bu gün Bakı-Sumqayıt istiqamətində görüləcək ən kiçik tədbir belə yolu iflic edə bilər. Paytaxtın Abşeron yarımadasında yerləşməsi və qərb hissəsinin dağlıq relyef olması alternativ yolların çəkilməsi imkanlarını məhdudlaşdırıb: “Hava limanı-Mərdəkan-Bilgəh-Kürdəxanı yolunun tamamlanmamış 14.5 km-lik hissəsində tikintilərə davam etmək olar. Təklif edərdim ki, 2014-cü ildə yarımçıq qalan Bakı dairəvi yolu layihəsi üzrə Kürdəxanı qəsəbəsinə qədər uzanan yolun tikinti işləri bərpa etdirilsin. Kürdəxanı-Fatmayı-Novxanı-“M1” magistralı şəhərə gələn nəqliyyat axınının bir hissəsini şimal istiqamətindən şərq tərəfə yönləndirə bilər. Amma təəssüf ki, maliyyə çatışmazlığı ucbatından layihə yarımçıq qalıb. Layihəyə görə, yol Novxanı, Saray yolunun aşağı istiqamətindən uzanaraq “M1” magistral yoluna (Bakı-Sumqayıt) və oradan da Ceyranbatan gölünün cənub hissəsini keçərək “M4” magistralına (Şamaxıya gedən yol) birləşməli idi. Bu isə həm Şamaxıdan, həm də Sumqayıtdan gələn avtomobillərin “20 Yanvar” dairəsinə girmədən birbaşa hava limanına çıxması üçün alternativ yol ola bilər.

Digər tərəfdən, bu yol Sumqayıtdan və Şamaxıdan nəqliyyat axınına paralel olaraq şəhərə fərqli istiqamətdə giriş imkanı yaradır. Bu yolun bərpa olunması həm də o deməkdir ki, magistralın keçdiyi ərazilərdə Binəqədi şosesi, Binəqədi-Balaxanı yolu, Yeni ümumşəhər və Sabunçu qovşağı həmin yol ilə əlaqələndirilir. Yəni bu, alternativ xətt olaraq çox münasib variantdır.

İkinci variant isə Bakıda Böyük Şorun üzərindən salınan yeni ümumşəhər yolu ilə “Dərnəgül” metrostansiyası istiqamətində olan yolun əlaqələndirilməsidir. Təklif edirəm ki, “Dərnəgül” metrostansiyası ilə Böyük Şor yolunu əlaqələndirən dəmir yolu üzərindən körpü salınsın. Bu körpü vasitəsilə nəqliyyat vasitələri həm “Baksol” yolu ilə Binəqədi şosesinə, həm də Dərnəgül şosesi ilə yeni ümumşəhər yoluna çıxış əldə etmiş olacaq”.

Günel CƏLİLOVA

Son xəbərlər