Məlahət Mürşüdlü: “Məktəb direktorlarının müsabiqə yolu ilə seçilməsi müsbət ənənədir”
Artıq bir neçə ildir Azərbaycanda orta ümumtəhsil məktəblərində direktor olmaq istəyənlər müsabiqədən keçirlər. Orta təhsil sahəsində xeyli müsbət nəticələri olan bu prosesin davamlı xarakter alması razılıqla qarşılanır.
Məlum olduğu kimi, dövlət ümumtəhsil müəssisələrində vakant olan direktor vəzifələrinin tutulması üçün elan edilən müsabiqənin ilkin yerləşdirmə nəticələri açıqlanıb. Təhsil Nazirliyinin yaydığı məlumata görə, “Dövlət ümumtəhsil müəssisələrinə direktor vəzifəsinə işə qəbul və çalışmanın yaş həddinə çatmış direktorlarla əmək münasibətlərinin tənzimlənməsi Qaydaları”na uyğun olaraq, 2018-ci ilin noyabr ayında elan edilən müsabiqə 4 mərhələdə keçirilib. Qeyd edilənə görə, müsabiqəyə ölkə üzrə 604 vakansiya çıxarılıb. Müsabiqədə iştirak üçün müraciət etmiş şəxslərdən 1576 nəfərin elektron ərizəsi təsdiqlənərək müsabiqənin ikinci mərhələsinə (imtahan mərhələsi) buraxılıb. Bu mərhələyə qatılan 1412 nəfərdən 730-u müsabiqənin sonuncu mərhələsində - müsahibədə iştirak edib.
Nazirlikdən bildirilənə görə, 5 dekabr 2018-ci il - 26 yanvar 2019-cu il tarixlərində keçirilmiş müsahibələrin nəticəsinə əsasən, 228 nəfər uğur qazanıb. İlkin yerləşdirmə nəticəsində 104 nəfər müvafiq ümumtəhsil müəssisəsinin direktoru vəzifəsinə təyin olunub və onlarla əmək müqaviləsi bağlanıb.
Müsabiqədə uğur qazanan namizədlər fevralın 25-dən öz vəzifələrinin icrasına başlayacaqlar.
Tanınmış təhsil eksperti Məlahət Mürşüdlü “Bakı-Xəbər”ə bildirdi ki, məktəb direktorlarının müsabiqə yolu ilə seçilməsi müsbət haldır. Onun sözlərinə görə, bu, sözügedən sahədə şəffaflığın təmin edilməsinə şərait yaradır. Ekspert qeyd etdi ki, sadəcə, vakant yerlərə keçirilən müsabiqənin qaydalarına kiçik bir dəyişiklik edilsəydi, bu daha yüksək nəticənin əldə edilməsinə imkan verərdi. “Məktəb direktorlarının müsabiqə yolu ilə seçilməsi müsbət ənənədir. Bu ənənənin müsabiqə qaydalarına müəyyən dəyişikliklər etməklə davam etdirilməsi vacibdir. Bilirsiniz ki, məktəb direktoru müsabiqəsində iştirak edənlər arasında müəllimlik, idarəçilik təcrübəsi olanlarla yanaşı, cəmi iki-üçillik müəllimlik təcrübəsi olan və heç bir idarəetməni bilməyənlər də var. Gənc məktəb direktorları müəyyən bir pedaqoji staja malik olmalı, onlar idarəçilik prosesini keçməlidirlər. Çox az pedaqoji təcrübəsi olan məktəb direktorları işə başlayandan sonra bir sıra problemlərlə qarşılaşırlar. Onlar müəllimlər, şagirdlər, valideynlərlə münasibətdə çox böyük çətinliklərlə üzləşirlər. 5 il müəllimlik təcrübəsi olmayanların müsabiqə yolu ilə məktəb direktoru təyin edilməsi təhsilin idarə olunmasında problemlər yarada bilər. Bu gənclərin heç olmasa 5 illik müəllimlik, eyni zamanda da idarəetmə təcrübəsi olmalıdır ki, qarşıya çıxan problemləri dəf edə bilsinlər. O heç olmasa məktəb direktorunun müavini vəzifəsində işləməlidir, sinif rəhbəri olmalıdır və s. Əlbəttə, gənclərin irəli çəkilməsi çox vacibdir və bizdə bu yöndə işlər həyata keçirilir. Ancaq, bütövlükdə, vakant məktəb direktoru vəzifəsinə keçirilən müsabiqədə təcrübəli, peşəkar, təhsilin idarə edilməsindən xəbəri olan, səriştəli müəllimlər də iştirak edərək müsbət nəticə əldə edirlər. Onlar məktəb direktoru vəzifəsinin icrasına başladıqdan sonra həm müəllim, həm şagird, həm də valideyn kontingenti ilə asanlıqla işləyə bilirlər” - deyə bildirən M.Mürşüdlü qeyd etdi ki, bu müsabiqələrə daha çox peşəkar təhsil işçiləri qatılsalar, təhsilin idarə edilməsi sahəsində problemlər olmaz.
İradə SARIYEVA
