28 dekabr 2025-ci il tarixində Xudəfərin Şadlıq Sarayı’nda, Dəmir Yumruq Alfa A Cəmiyyətinin yaradılmasının 5 illiyi münasibətilə mənalı və duyğulu bir tədbir keçirildi. Tədbir aparıcı Səbinə xanımın açılış nitqi ilə rəsmi olaraq başladı. Açılış zamanı Səbinə xanım, Dəmir Yumruq Alfa A Cəmiyyətinin son beş il ərzində həyata keçirdiyi sosial, humanitar və mənəvi layihələrdən bəhs edərək, cəmiyyətin ictimai faydaya yönəlmiş fəaliyyətlərinə diqqət çəkdi. Tədbirdə Milli Məclisin deputatı Aydın Mirzəzadə də çıxış edərək şəhid analarını ehtiramla salamladı. Deputat, Dəmir Yumruq Alfa A Cəmiyyətinin gördüyü işləri yüksək qiymətləndirdiyini bildirərək, bu cür ictimai birliklərin cəmiyyət üçün böyük əhəmiyyət daşıdığını vurğuladı. Daha sonra cəmiyyət üzvləri söz alaraq, beş il ərzində keçilən çətin, lakin şərəfli yol, qarşılaşdıqları problemlər və əldə etdikləri nailiyyətlər haqqında iştirakçılarla fikirlərini bölüşdülər. Gecənin ən yaddaqalan məqamlarından biri isə sənət proqramı oldu. Aybeniz Haşimova Sənət Akademiyasının tələbələri Günəş və Ferman Gəmbərov qardaşları tədbir çərçivəsində səhnəyə çıxış etdilər. Gənc sənətçilər ifa etdikləri ən sevilən mahnılarla zalda iştirak edən şəhid analarına kövrək və unudulmaz anlar yaşatdılar. Onların çıxışı böyük rəğbətlə qarşılandı, şəhid analarının üzündəki sevinc və təbəssüm gecəyə xüsusi məna qatdı. Günəş və Ferman qardaşları tamaşaçılar tərəfindən uzun sürən alqışlarla qarşılandılar. Tədbirdə KİV nümayəndələri, ictimai təşkilatların üzvləri, jurnalistlər, yazarlar, müxtəlif bölgələrdən gəlmiş cəmiyyət üzvləri və şəhid ailələri fəal iştirak edirdi. Tədbirin sonunda Dəmir Yumruq Alfa A Cəmiyyətinin sədri Ülviyyə xanım tərəfindən Dəmir Yumruq simvolu şəhid ailələrinə təqdim olundu. Qeyd edildi ki, Dəmir Yumruq simvolu iş adamı Ömər İsmayılov tərəfindən şəxsi vəsaiti hesabına xüsusi olaraq hazırlanıb.
SAMİRƏ
