29 iyun 1997-ci ildə Cəlilabadda dünyaya göz açan Kamran Yaşar oğlu İsgəndərli Vətənə, torpağa, yurda sonsuz sevgisini 44 günlük haqq savaşımızda şəhidlik zirvəsinə ucalmaqla əbədi olaraq möhürlədi. Saf ruhu ulduzlu göylərdə dolaşan, adı qəhrəmanlıq simvolu kimi çəkilən Kamran təkcə öz ailəsi üçün deyil, bütün Azərbaycan xalqına əzizdir, milyonların ürəyində yaşamaqla həmişə sevgi, böyük məhəbbətlə xatırlanır. Dövlət də öz oğlunu daimi ucalıqda, yüksəklikdə saxlamaqdan ötrü onu “Vətən uğrunda”, Füzulinin, Xocavəndin azadlığına görə medalları ilə təltif edib.
Qəlb dünyası sevdalı olduğuna görə Kamran xeyirxah əməllərə tapınmaqla orta məktəbi başa vurub. Həyatın mənasını Vətəninə, xalqına təmənnasız xidmətdə görən ailənin, elin sevimli oğlu sənədlərini Azərbaycan Texniki Universitetinə verib və burada “Telekommunikasiya, radio və texniki informasiya mühəndisliyi” ixtisası üzrə mükəmməl ali təhsil alıb. Tələbəlik illərində ingilis və ərəb dillərini öyrənib. Kamranın güzəranı nə qədər xoş keçsə də, ermənilərin Qarabağımızda törətdiyi vəhşiliklər onu çox narahat edib. Elə 2019-cu il oktyabrın 2-də Vətəninə övladlıq borcunu yerinə yetirmək üçün hərbi xidmətə yola düşəndə əsas məqsədi dığalardan məqamı çatanda qisas almaq olub. Xidmət zamanı cəbhə bölgəsinə düşdüyünə görə Kamran qürur duyub, Vətənini göz-bəbəyi tək qoruyub, mərdliyi, cəsurluğu, vətənpərvərliyi əsgər yoldaşlarına nümunə göstərilib. Həyata keçirilən hərbi təlimlərdə də həmişə fərqlənib. Şüurlu şəkildə dərk edib ki, bu döyüş meydanında yağını əzmək üçün çox vacibdir.
İkinci Qarabağ müharibəsi başlananda Kamran İsgəndərli ön cəbhədə Vətən naminə göz qırpmadan döyüşlərə girib. Ermənilərin 30 ildə törətdiyi vəhşiliklər bir anlığa gözlərinin önündə canlanıb, qəlbindəki qisas hissi daha da alovlanıb. Qəhrəman Vətən sevdalısı min əzab-əziyyətli, ölümlü yollar keçməklə oktyabrın 22-nə kimi Füzuli, Xocavənd, Zəngilan, Qubadlı uğrunda gedən haqq savaşımızda yağıya qan qusdurub, yüzlərlə dığanın axırına çıxmaqla yaşının çərçivəsinə sığmayan tarix yazıb. Onunla çiyin-çiyinı vuruşan yoldaşlarına da bildirib ki, getdiyimiz yol müqəddəsdir, burada ölmək var, dönmək yoxdur. Torpaq, uğrunda axıdılan qanla Vətən olur. Hər döyüşdən zəfər sorağı gələn igid əsgər oktyabrın 21-dən 22-nə keçən gecə Qubadlı rayonunda ağır müharibə meydanında şəhidlik zirvəsinə yüksəlib. Beləcə qısa, lakin şərəfli ömür yolu ilə tarixin yaddaşına əbədi həkk olunub...
Zəfər ORUCOĞLU
Azərbaycan Jurnalistlər Birliyinin üzvü
