Məlum olduğu kimi, 1 iyun tarixində keçirilən l ixtisas qrupu üzrə qəbul imtahanında Azərbaycan və rus bölməsi üzrə riyaziyyat fənnindən 1 sualda texniki səhvə yol verilib. Dövlət İmtahan Mərkəzinin məlum sualla bağlı yaydığı məlumatda qeyd edilir ki, həmin sual üzrə şagirdlərin xeyrinə qərar qəbul ediləcək.
Ancaq valideynlər və müəllimlər məlum hadisə ilə bağlı narazılıq edir. Onlar qeyd edir ki, DİM bu sualın cavabını şagirdlərin xeyrinə hesablasa belə, abituriyentlərin zaman itkisi, psixoloji vəziyyəti və bunun digər sual tapşırıqlarının yazılmasına təsiri nəzərə alınmır. Üstəlik, hər il qəbul imtahanlarında hansısa fəndən səhvlərə yol verilir.
Rizvan Fikrətoğlu: “Səhv suala 4-5 bal verib üstündən keçmək düzgün deyil, məsələyə ciddi yanaşılmalıdır”
Təhsil eksperti Rizvan Fikrətoğlu “Bakı-Xəbər”ə şərhində bildirdi ki, imtahanda səhv olma təcrübəsi yeni deyil: “Dövlət İmtahan Mərkəzi tərəfindən dəfələrlə belə səhvlər qeydə alınlb. Ancaq bugünə qədər hələ də eşitməmişik ki, DİM səhvlə bağlı hansısa eksperti cəzalandırıb. İmtahan suallarında texniki səhvin olması olduqca ciddi problemdir. Abituriyent vaxt itirir, həyəcan keçirir. Texniki səhv sayılan sual abituriyentin xeyrinə hesablansa belə, bu düzgün yanaşma deyil. Dediyim kimi, o səhv suala görə abituriyent stresə düşür və bu onun digər sualları cavablandırmasına təsir edir. Hesab edirəm ki, həmin suala görə DİM minimum 50 bal verməlidir.
Maraqlıdır ki, DİM abituriyentlərə ciddi münasibət göstərdiyi halda öz işçilərinə qeyri-ciddi münasibət sərgiləyir. Həmin səhvdə rolu olan şəxslərin cəzalandırılmasının şahidi olmamışıq. Onlar yanlışlığa görə ictimaiyyətdən belə üzr istəmirlər. Məlumat üçün deyim ki, tərtib edilən hər bir suala bir adam yox, bir neçə mütəxəssis baxır. Ancaq tərtib etdikləri sualda səhv olur. Səhv suala 4-5 bal verib üstündən keçmək düzgün deyil. Məsələyə ciddi yanaşılmalıdır. Onu da deyim ki, bu kimi hallar DİM-im imicinə, nüfuzuna zərər vurur, şəffaflığa xələl gətirir”.
Həmsöhbətimiz hesab edir ki, imtahanda qeydə alınan səhv suala görə DİM kompensasiya ödəməlidir: “Məlumdur ki, imtahan vermək üçün abituriyentlər 50 manat ödəniş edir. 50 manat heç də az məbləğ deyil. Kompensasiya 4-5 balla olmamalıdır, həmin suala görə 50 bal hesablanmalıdır”.
Osman Gündüz: “Bu artıq texniki səhv yox, sistem probleminin, bəlkə də insan amilinin və ya məsuliyyət boşluğunun göstəricisidir”
Azərbaycan İnternet Forumunun rəhbəri Osman Gündüz hesab edir ki, texniki səhvin məsuliyyətsizlik, yoxsa sistem problemi olduğu aydınlaşdırılmalıdır: “Bunkerdə süni intellekt həllərin tətbiqi üçün zaman yetişib. Hər imtahan sessiyasında bənzər hallar yaşanır. Bu qədər yoxalamalardan, təsdiqləmələrdən sonra yenidən səhvlərin olması çox düşündürücüdür. Bu artıq texniki səhv yox, sistem probleminin, bəlkə də insan amilinin və ya məsuliyyət boşluğunun göstəricisidir. Kiçik bir məsələ kimi görünsə də, əslində imtahan verən üçün, valideynləri üçün, onu yetişdirən müəllimlər və məktəb üçün ciddi problemdir. Nəzərə almaq lazımdır ki, abituriyent bu cür problemli bir tapşırığa xeyli vaxt sərf etməli olur, stress keçirir və bu itirilmiş zaman və başağrısı da yekun nəticəyə təsir edir. Bu kimi hadisələrdə DİM-in sonradan "texniki səhv" deyib sakitcə üstündən keçməsi doğru yanaşma deyil”.
Günel CƏLİLOVA
