Xankəndidə keçirilən “Qarabağ Təhsil və Tərəfdaşlıq Forumu” çərçivəsində Qarabağ Dirçəliş Fondu (QDF) işğaldan azad olunmuş ərazilərdə insan kapitalının inkişafına yönəlmiş mühüm təşəbbüslə çıxış edib. Belə ki, bölgədə təhsilin keyfiyyətinin yüksəldilməsi, gənclərin potensialının üzə çıxarılması və dayanıqlı inkişafını təmin etmək məqsədilə QDF 2025-2026-cı akademik ili çərçivəsində Qarabağ Universitetində təhsil alan 50 tələbəyə təqaüd dəstəyi göstərəcəyini bildirib. Bu təşəbbüs Forum çərçivəsində Qarabağ Dirçəliş Fondu ilə Elm və Təhsil Nazirliyi nəzdində fəaliyyət göstərən Təhsilin İnkişafı Fondu arasında Memorandumun imzalanması ilə rəsmiləşdirilib. Qeyd edək ki, tərəflər arasında əldə edilən razılaşma QDF-in “Qarabağ Təqaüd Proqramı” çərçivəsində istedadlı tələbələrə maddi dəstək göstərmək, onların akademik və peşəkar inkişafını təşviq etmək və bölgədə bilik iqtisadiyyatının inkişafına töhfə vermək istiqamətində strateji öhdəliyini əks etdirir. Proqrama əsasən, seçilmiş hər bir tələbə bir akademik il ərzində hər ay 200 AZN məbləğində təqaüdlə təmin olunacaq. Bu, ümumilikdə hər tələbə üçün 2,000 AZN təşkil edir. Təqaüdə namizədlər universitet tərəfindən akademik göstəricilər əsasında, Təhsilin İnkişafı Fondu ilə əlaqəli şəkildə müəyyən olunacaq. Qarabağ Dirçəliş Fondunun İdarə Heyətinin sədri Rəhman Hacıyev çıxışı zamanı bildirib ki, təhsil dayanıqlı inkişafın hərəkətverici qüvvəsidir və azad edilmiş ərazilərdə dayanıqlı məskunlaşmanın təmin edilməsi baxımından mühüm rol oynayır: “Bu təqaüd proqramını dəstəkləməklə, biz regionun gələcəyinə sərmayə yatırırıq. Həmçinin, bu əhəmiyyətli forumun təşkilatçılarından biri kimi çıxış etməklə, Qarabağ Dirçəliş Fondu bir daha dövlət və özəl sektor nümayəndələrini bir araya gətirən vahid platforma rolunu oynadı, proqramı donorlarımıza və tərəfdaşlarımıza tanıtdı və digər şirkətləri bu vacib missiyaya qoşulmağa təşviq etdi”. Qeyd edək ki, bu töhfə ictimai qurumlar və aparıcı şirkətləri bir araya gətirən daha geniş təqaüd təşəbbüsünün bir hissəsidir. Məqsəd Qarabağın sosial-iqtisadi dirçəlişini sürətləndirməklə yanaşı, bölgədə insan kapitalının formalaşdırılmasına xidmət etmək, akademik nailiyyətləri yüksək olan tələbələrin motivasiyasını artırmaq, eləcə də gənclər üçün təhsil imkanları yaratmaqdır. Xatırladaq ki, “Qarabağ Təhsil və Tərəfdaşlıq Forumu” 2 iyun 2025-ci il tarixində elm və təhsil naziri Emin Əmrullayev, Prezidentin Xankəndi şəhərində, Ağdərə və Xocalı rayonlarında xüsusi nümayəndəsi Elçin Yusubov, Qarabağ Dirçəliş Fondunun İdarə Heyətinin sədri Rəhman Hacıyev, Təhsilin İnkişafı Fondunun İdarə Heyətinin sədri Elnur Nəsibov, Qarabağ Universitetinin rektoru Şahin Bayramov, eləcə də dövlət qurumlarının nümayəndələri, özəl sektor təmsilçiləri, Qarabağ Universitetinin professor-müəllim heyətinin iştirakı ilə Xankəndi şəhərində yerləşən Qarabağ Universitetində keçirilib.
SAMİRƏ
