Ölkədə 500 min fərdi evin problemi illərdi həll olunmur, hətta Milli Məclis...
Azərbaycanda sənədsiz evlər məsələsi hələ də açıq qalmaqdadır. Dəfələrlə, bu məsələ ilə bağlı çıxışlar edilib. Hətta parlamentdə də bu məsələyə toxunulub. Lakin məsələ hələ də öz həllini tapmır.
Qeyd edək ki, bir müddət əvvəl bütövlükdə bu istiqamətdə konsepsiyasının hazırlanmasına başlanmışdı. Konsepsiyanın hazırlanmasında məqsəd sənədsiz evlərin qeydiyyata alınma prosesi ilə bağlı mexanizm və qaydaların hazırlanmasıdır.
Maraqlıdır, sənədsiz ev məsələsi necə həll olunmalıdır?
Ramil Qasımzadə: “Bələdiyyələrin qanunsuz əməlləri hesabına bu gün onminlərlə insan tikib, yaşadığı evə rəsmi sənəd ala bilmir”
Əmlak eksperti Ramil Qasımzadə “Bakı-Xəbər”ə şərhində bildirdi ki, sənədsiz evlərlə bağlı yaxın zamanda amnistiya aktının olması gözlənilir. Bununla bağlı qanunvericilik bazası da hazırlanıb: ““Qiymətləndirmə haqqında”qanuna müvafiq dəyişiklik edilib. Bu dəyişikliyə əsasən bələdiyyə torpaqlarının qiymətləndirilməsi yeni qaydada aparılacaq.Satışa çıxarılan bələdiyyə torpaqları Qiymətləndirmə Palatasından qeydiyyatdan keçmiş qiymətləndiricilər tərəfindən qiymətləndiriləcək. Qanuna belə bir əlavənin edilməsi onunla bağlıdır ki, bundan sonra vətəndaşlara satılan torpaqlar bələdiyyələrin subyektiv maraqlarına görə deyil, real bazar qiymətlərinə uyğun qiymətləndiriləcək. Bu da həm alqı-satqı prosesində şəffaflıq yaradacaq, həm də torpaq alan vətəndaşın qayğılarını xeyli azaldacaq. Eyni zamanda vətəndaş çox asanlıqla aldığı torpaq sahəsinə görə Daşınmaz Əmlakın Dövlət Reyestrindən çıxarış ala biləcək. Məlumdur ki, bələdiyyə mülkiyyətində olan torpaqlar müxtəlif əyri yollarla vətəndaşa satılıb. Bu alqı-satqıdan dövlət büdcəsinə bir qəpik də olsun vəsait daxil olmurdu. Yeni qanun bu məsələni tənzimləyəcək. Bələdiyyələrin qanunsuz əməlləri hesabına bu gün onminlərlə insan tikib, yaşadığı evə rəsmi sənəd ala bilmir. Qanunvericiliyə əsasən vətəndaş ilk növbədə fərdi mənzil tikintisi üçün ayrılmış torpaq sahəsinə Dövlət Reyestrindən çıxarış almalıdır. Bundan sonra tikiləcək evin hazırlanmış layihəsi müvafiq icra orqanları tərəfindən təsdiqlənməlidir. Bundan sonra hər hansı bir tikinti işi aparıla bilər”.
Ekspert onu da əlavə etdi ki, amnistiyanın verilməsi Prezident ilham Əliyevin səlahiyyətinə aid məsələ olduğu üçün konkret vaxt demək düzgün deyil: “Onu da deyim ki, yüksək gərginlik elektrik xətlərinin altında, su, qaz və neft kəmərlərinin, eləcə də dəmir yollarının mühafizə zolağında tikilmiş evlər amnistiyaya düşməyəcək. Neft istehsalı sahələrində yerləşən, həmçinin hər hansı bir ASC, MMC-lərin mülkiyyətində olan torpaq ərazilərində tikilən evlərə də sənəd verilməyəcək”.
Günel CƏLİLOVA
