“65 yaşdan sonra tibb işçilərinin təqaüdə göndərilməsi məsələsi ilə çox ciddi məşğul olmuşuq. Dəfələrlə həm TƏBİB, həm də Səhiyyə Nazirliyinin rəhbərliyi ilə danışmışıq. Yaş həddini ləğv etmək lazımdır. Çünki bu bölgələrdəki həkim çatışmazlığının aradan qaldırılmasına kifayət qədər kömək edəcək”.
Bunu Milli Məclisin Səhiyyə komitəsinin sədri Əhliman Əmiraslanov komitənin ötən iclasında Əmək Məcəlləsi və digər üç qanunda dəyişiklik edilməsi barədə qanun layihəsinin müzakirəsi zamanı deyib.
65 yaşdan sonra tibb işçilərinin təqaüdə göndərilməsi məsələsinin ləğv olunması təklifi ekspertlər tərəfindən də müsbət dəyərləndirilir.
Adil Qeybulla: “65 yaşına çatan həkimlərin pensiyaya göndərilməsi qərarı mahiyyət etibarilə yanlışdır”
Professor, tibbi ekspert Adil Qeybulla “Bakı-Xəbər”ə şərhində bildirdi ki, tibb işçisinin sağlamlıq vəziyyəti, iş yükü və işə olan yanaşması əsas götürülə bilər: “65 yaşına çatan həkimlərin pensiyaya göndərilməsi qərarı mahiyyət etibarilə yanlışdır. Çünki həkimlik elə bir sənətdir ki, o yaşda həkimlər artıq müəyyən yetərli peşə təcrübəsinə malik olurlar. Həkim əgər əmək qabiliyyətini saxlayıbsa, fiziki aktivliyi yerindədirsə, o niyə əmək fəaliyyətindən azad olunmalıdır? O bu sənəti davam etdirmək istəyirsə, nəyə görə buna şərait yaradılmamalıdır? Axı bu insan sağlamlığa xidmət edir. İnsanların kütləvi şəkildə əmək fəaliyyətinə xitam verilməsi düzgün deyil. Ümumi işə ziyandır. Bəzən görürsüz ki, yetərincə əmək qabiliyyəti olan həkimləri işdən kənarlaşdırırlar. Halbuki, onların istedad və qabiliyyətindən, təcrübəsindən hələ insanlar xeyli faydalana bilərdi”.
Həmsöhbətimizin sözlərinə görə, bu gün bölgələrdə həkim çatışmazlığı yaşanır: “65 yaşa çatmış həkimləri təqaüdə göndərmək əvəzinə rayonlarda onların əməyindən istifadə etmək olar”.
Ilqar Hüseynli: “Həkimlər üçün nəzərdə tutulan yaş senzi aradan qaldırılmalıdır”
Sosial sahə üzrə ekspert İlqar Hüseynli “Bakı-Xəbər”ə açıqlamasında bildirdi ki, həkimlər üçün nəzərdə tutulan yaş senzi aradan qaldırılmalıdır: “65 yaşa çatan həkimlərin yaş senzi səbəbindən kütləvi olaraq işdən azad edilməsi düzgün deyil. İnkişaf etmiş ölkələrdə fəaliyyət göstərən məşhur həkimlərin əksəriyyəti 65-70 yaşında olanlardır. Onlar həm tibbi xidmət göstərirlər, həm də tədrislə məşğul olurlar".
Günel CƏLİLOVA
