Akif Nəsirli: “Bu qayda qanunsuz araq istehsalçılarını sıradan çıxarmaq məqsədi daşıyır”
Məlum olduğu kimi, “Alkoqollu içkilərin pərakəndə satışına dair minimum qiymətin müəyyən edilməsi Qaydası” təsdiq edilib. Bununla bağlı Əli Əsədov müvafiq qərar imzalayıb.
Qərara əsasən, məhsulun pərakəndə satışına dair minimum qiymət qablaşdırma həcmlərinə uyğun olaraq müəyyən edilir: “Məhsulun pərakəndə satışına dair minimum qiymət istehsalçıların bu Qaydanın 2.2-ci bəndində nəzərdə tutulmuş müddətdə müvafiq məhsul üzrə təqdim etdiyi pərakəndə satış qiymətlərinin ədədi ortası kimi müəyyən edilir. Məhsulun maya dəyəri 5 faizdən çox dəyişdiyi halda bu Qaydada göstərilən istehsalçıların minimum 50 faizinin müraciəti əsasında məhsulun pərakəndə satışına dair müəyyən olunmuş minimum qiymətə bu Qaydaya uyğun olaraq yenidən baxılır”.
Maraqlıdır, arağın minimum qiyməti necə müəyyən ediləcək?
“Hər bir müəssisənin özünə görə qiyməti müəyyənləşməyəcək, kateqoriyaya görə qiymətlər təyin ediləcək”
Liberal İqtisadçılar Birliyinin sədri Akif Nəsirli “Bakı-Xəbər”ə açıqlamasında qeyd etdi ki, bu qayda qanunsuz araq istehsalçılarını sıradan çıxarmaq məqsədi daşıyır: “Bu gün istehsal edilən arağın aksiz qiyməti 4 manatdır. Ancaq bazarda 2-3 manata araq satılır. Bu prosesi aradan qaldırmaq üçün qayda təsdiq edilib. Bazarda saxta araq istehsal edən sahibkar varsa, bunu hüquq-mühafizə orqanları, aidiyyəti qurumlar araşdırıb, problemi həll edə bilərlər. Belə olarsa bazarda qiymət sərbəst olar. Ancaq indi çox geniş seqmentdə istehsal müəssisələri ilə əlaqəli şəkildə arağın maya dəyəri müəyyən ediləcək və onun üzərinə müəssisənin mənfəəti də əlavə ediləcək. Beləliklə minimum qiymət formalaşacaq. Hər bir araq istehsalçısı üçün ayrıca qiymət formalaşdırılacaq. Hesab edirəm ki, bu qayda gələcəkdə daha da təkmilləşdiriləcək. Hər bir müəssisənin özünə görə qiyməti müəyyənləşməyəcək, kateqoriyaya görə qiymətlər təyin ediləcək. Hər bir kateqoriyanın da özünə görə minimum qiyməti olacaq”.
Həmsöhbətimiz onu da əlavə etdi ki, bazar iqtisadiyyatında hökumət qiymətin əmələ gəlməsində iştirakdan uzaq olmalıdır. Həm inhisarı aradan qaldırmalıdır, həm də qiymətləri liberallaşdırmalıdır.
Günel CƏLİLOVA
