Riyaziyyatdan buraxılış səviyyəsi ilbəil aşağı düşür - DİM-in islahatlarının iflası, ya tədrisin keyfiyyəti?
Cavanşir Əliyev: “Test sistemindən tədricən uzaqlaşmaq olar, lakin bu iş elə icra edilməlidir ki, məktəb proqramı ilə paralel həyata keçirilsin”
“Riyaziyyat fənnindən buraxılış imtahanlarının nəticəsi ürəkaçan deyil”. Bunu Dövlət İmtahan Mərkəzi (DİM) İdarə Heyətinin sədri Məleykə Abbaszadə ali təhsil müəssisələrinə qəbul imtahanlarının başlanması ilə əlaqədar keçirilən mətbuat konfransında deyib.
Maraqlıdır, riyaziyyat fənninin nəticəsinin zəif olmasının səbəbi nə ilə bağlıdır? Tədrisin keyfiyyəti aşağıdır, yoxsa bu, DİM-in riyaziyyatla bağlı apardığı islahatların nəticəsidir?
“Riyaziyyat fənni üzrə buraxılış imtahanlarında açıq sualların sayının kəskin şəkildə artırılması şagirdlər üçün problemə səbəb olur”
Təhsil eksperti Cavanşir Əliyev baki-xeber.com-a şərhində bildirdi ki, riyaziyyat fənni üzrə buraxılış imtahanlarında açıq sualların sayının kəskin şəkildə artırılması şagirdlər üçün problemə səbəb olur: “Nəzərə almaq lazımdır ki, uzun illər test əsaslı sistemlə hazırlaşan abituriyentlər indi bir anda açıq suallarla qarşı-qarşıya qalıblar. Açıq suallarda isə qiymətləndirmə subyektiv xarakter daşıyır. Bu, artıq müəllim və ekspertlərin şəxsi yanaşmasına əsaslanan bir prosesdir və hər şagird eyni səviyyədə qiymətləndirilmir. Onu da deyim ki, açıq suallara düzgün cavab vermək üçün təkcə bilik deyil, həm də akademik yazı bacarığı lazımdır. Lakin ölkədəki məktəblərin çoxunda bu bacarıq sistematik şəkildə tədris olunmur. Test sistemindən tədricən uzaqlaşmaq olar, lakin bu iş elə icra edilməlidir ki, məktəb proqramı ilə paralel həyata keçirilsin. Əks halda bu, sadəcə imtahan sistemini süni şəkildə daha çətin hala salmaq və abituriyentlərin təhsil alma imkanlarını məhdudlaşdırmaqdan başqa bir şey deyil. Açıq sualların artması təhsilin keyfiyyətini artırmır, əksinə, hazırlıq üçün imkanları olmayan şagirdləri sistemdən kənarlaşdırır. Təhsil sistemində belə kəskin dəyişikliklər yalnız planlı şəkildə və bütün iştirakçıların – şagirdlərin, müəllimlərin və valideynlərin hazırlıqlı olduğu şəraitdə həyata keçirilməlidir. Nəticələr yalnız narazılıq və imtahan stresinin artması ilə müşayiət olunacaq”.
Günel CƏLİLOVA
