Lənkəran Polis Şöbəsi maarifləndirici tədbir keçirdi - FOTO
Ən təhlükəli və sosial əhəmiyyətli xəstəlik olan narkomaniya indi daha çox bəşəriyyəti narahat edir. Sərhəd tanımayan, insan həyatında sağalmaz fəsadlar yaradan ağrılı bəlaya get-gedə də meylliyin artdığı müşahidə olunur.
Azərbaycanda da narkomanlığa qurşananlar çoxdur. Dəhşət odur ki, bunların arasında gənclər üstünlük təşkil edir. Bu millətin gələcəyi üçün böyük faciədir. Sağlam gələcəyini istəyən hər bir kəs indiki zamanda “ağ ölüm” kimi tarixə düşən bəlaya qarşı barışmaz olmalıdır.
Lənkəran rayonunda narkomaniyaya qarşı mütəmadi tədbirlər görülür, vaxtaşırı maarifləndirmə işləri aparılır. Belə tədbirlərin daha effektli alınması üçün hüquq-mühafizə orqanlarına rayonda fəaliyyət göstərən digər təşkilatlar da yaxında dəstək olurlar.
"Narkomaniya ümumbəşəri bəladır!" mövzusunda Lənkəran Şəhər Rayon Polis Şöbəsinin təşkilatçılığı sayəsində Heydər Əliyev Mərkəzində rayon məktəbliləri ilə baş tutan görüş məhz belə tədbirlərdən idi.
Maarifləndirici tədbirdə çıxış edən Lənkəran Şəhər Rayon Polis Şöbəsinin rəisi polis polkovniki Azər Cahangirov, Lənkəran Şəhər İcra Hakimiyyətinin başçısının müavini Ülviyyə Əliyeva, Lənkəran-Astara Regional Gənclər və İdman İdarəsinin rəisi Teymur Babazadə, Lənkəran-Astara Regional Təhsil İdarəsinin müdir müavini Rəhim Rəhimov, Lənkəran Rayonlararası Narkoloji Xəstəxananın baş həkimi Vüqar Quliyev, eləcə digər aidiyyəti qurumların nümayəndələri sağlam nəslin formalaşması istiqamətində həyata keçirilən tədbirlər sırasında birinci yerdə duran narkomaniya və narkotik vasitələrin qanunsuz dövriyyəsi ilə mübarizənin mühüm yer tutduğunu bildirdilər. Natiqlər xüsusi olaraq onu da vurğuladılar ki, bu istiqamətdə ən dəyərli addımlardan biri preventiv tədbirlərin görülməsi, o cümlədən maarifləndirmə işinin gücləndirilməsi olduqca vacibdir.
Həmçinin çıxışlarda narkotik vasitələrin qanunsuz dövriyyəsinin qarşısının alınması istiqamətində hüquq-mühafizə orqanlarının həyata keçirdiyi qətiyyətli mübarizə tədbirləri ilə bağlı görüş iştirakçılarına geniş məlumat verildi və narkomaniyaya qarşı mübarizə nəinki dövlətin, eləcə bu dövlətdə yaşayan hər bir fərdin borcudur dedilər.
Tədbirin sonunda müzakirə edilən mövzuya həsr olunan video-çarx göstərildi, məktəblilərin sualları ətraflı cavablandırıldı.
Zəfər ORUOĞLU
Azərbaycan Jurnalistlər Birliyinin üzvü
