Bir müğənninin sözü ilə məktəb direktorunun işdən qovulması pis nümunə ola bilər...
Rizvan Fikrətoğlu: “Məktəblinin səhvi varsa, kimin övladı olmasından asılı olmayaraq direktor ona irad bildirməlidir”
Bakıda 42 nömrəli tam orta ümumtəhsil məktəbinin direktoru Firəngiz Həmidova işdən çıxarılıb. Bu barədə Məktəbəqədər və Ümumi Təhsil üzrə Dövlət Agentliyi məlumat yayıb.
Bildirilib ki, may ayında aparılan monitorinqlər nəticəsində Bakı şəhərindəki Məktəb-Lisey Kompleksinin və İlqar Əbilhəsənov adına 42 nömrəli tam orta ümumtəhsil məktəbinin direktorlarının fəaliyyətində aşkar olunmuş ciddi nöqsanlar əsas götürülməklə müvafiq qərarlar verilib.
Qeyd edək ki, Firəngiz Həmidova direktor olduğu məktəbdə təhsil alan müğənni Samir Piriyevin qızına geyimi ilə bağlı irad bildirmişdi. Belə bir məlumat yayılıb ki, direktor müğənninin qızına irad bildirdiyi üçün işdən azad edilib.
“Direktor müğənninin qızına irad bildirdiyi üçün işdən azad edilirsə, bu, təhsil sistemində ədalətsizlik və mədəniyyət pozuntusu deməkdir”
Mövzu ilə bağlı fikir bildirən təhsil eksperti Rizvan Fikrətoğlu “Bakı-Xəbər”ə şərhində qeyd etdi ki, məktəblinin səhvi varsa, kimin övladı olmasından asılı olmayaraq direktor ona irad bildirməlidir: “Samir Piriyevin qızı olmaq heç bir üstünlük yaratmır. Əksinə, ictimai şəxslərin övladı daha da nümunəvi olmalıdır. Direktor başa salmağa borcludur ki, məktəbin məktəbli geyim forması var. Nəzərə almaq lazımdır ki, direktor məsuliyyətli şəxsdir. 42 nömrəli orta məktəbin direktorunun işdən azad olunması ilə bağlı MÜTDA-nın yaydığı məlumatda qeyd edilir ki, Firəngiz Həmidovanın digər nöqsanları da aşkar olunub. Direktorun kiminsə övladına irad bildirdiyi üçün işdən azad edilməsi çoxtərəfli təhlil olunmalıdır. Biz məsələnin mahiyyətini tam bilmirik”.
Ekspert onu da əlavə etdi ki, məktəb direktoru tək idarəedici deyil, həm də pedaqoji prosesə rəhbərlik edən əsas şəxsdir. Həmçinin, məktəbdə intizamı qorumalıdır: “Direktor bir şagirdin qeyri-etik, məktəb qaydalarına uyğun hərəkət etmədiyini görübsə, məktəblinin geyimi dərsə uyğun deyilsə o irad bildirməlidir. Bu onun vəzifə borucudur. Ancaq onu da deyim ki, irad alçaldıcı olmamalıdır, pedaqoji çərçivədə olmalıdır. Kimisə təhqir etmək, şəxsiyyəti alçatmaq düzgün deyil. Direktor pedaqoji çərçivəni gözləyibsə, alçaldıcı formada irad bildirməyibsə burda qanun pozuntusu yoxdur. Əksinə, direktor xoşagəlməz halları görüb irad bildirməsəydi, o zaman rəhbər şəxs məsuliyyət daşıyardı. Onu da deyim ki, şagirdin valideyninin tanınmış sima olması onun xüsusi imtiyaza sahib olması demək deyil. Məktəb mühitində bütün şagirdlər bərabər hüquqlara malikdir. Direktor müğənninin qızına irad bildirdiyi üçün işdən azad edilirsə, bu, təhsil sistemində ədalətsizlik və mədəniyyət pozuntusu deməkdir. Bu cür hallar pedaqoji heyətdə təşviş yarada bilər, intizamsızlığın yaranmasına səbəb olar”.
R.Fikrətoğlunun sözlərinə görə, sağlam cəmiyyətdə valideyn məktəblə əməkdaşlıq etməlidir. İctimai nüfuzu olan bir valideyn öz övladına irad bildirən direktor və ya müəllimi cəzalandırmağa çalışırsa, burda məktəbə, təhsilə hörmətsizlik var.
Günel CƏLİLOVA
