Məzahir Məmmədli: “Direktorların yetişdirilməsi prosesi və sistemin özündə ciddi boşluqlar müşahidə olunur”
Son zamanlar məktəb direktorları ilı bağlı xoşagəlməz halların şahidi oluruq. “Məktəb direktoru şagirdi döydü”, “direktor müəllimləri təhqir etdi”, “məktəb direktoru rüşvət aldı”, “direktor müəllimi hədələdi” kimi xəbərləri demək olar ki, tez-tez eşidirik. Əvvəllər nadir hallarda təsadüf olunan belə hallar son dövrlərdə adi hal kimi qəbul olunmağa başlanıb.
Bəzi direktorlar məktəbi idarə etməkdə və komanda qurmaqda çətinlik çəkir. Bu da məktəbin idarəetmə strukturu və iş mühitinin qeyri-sabit olmasına səbəb olur. Qeyd edək ki, təhsil və idarəetmə sahəsində təcrübəsizlik və qeyri-dəqiqlik səbəbindən səhv qərarlar qəbulu məktəbin işinə mənfi təsir edir. Elə bu səbəbdən də son zamanlar məktəblərdə monitorinq keçirilir. Monitorinqlərin nəticələrinə əsasən bəzi məktəb direktorları cəzalandırılır. Məktəbəqədər və Ümumi Təhsil üzrə Dövlət Agentliyinin yaydığı məlumatda qeyd edilir ki, 2 məktəb direktoru işdən çıxarılıb. Bakıda 42 nömrəli tam orta ümumtəhsil məktəbinin direktoru Firəngiz Həmidova işdən çıxarılıb. Bununla yanaşı, Firəngiz Həmidova ilə bağlanmış əmək müqaviləsi 19 may 2025-ci il tarixdən ləğv edilib.
Həmçinin, əmək fəaliyyətində yol verdikləri nöqsanlara görə Bakı şəhəri 275 nömrəli tam orta məktəbin direktoru Elnur Hüseynova və 278 nömrəli tam orta məktəbin direktoru Sevinc Hüseynovaya Azərbaycan Respublikası Əmək Məcəlləsinin 186-cı maddəsinin 2-ci hissəsinin “b” bəndinə əsasən sonuncu xəbərdarlıqla şiddətli töhmət verilib.
Maraqlıdır, problem həqiqətənmi məktəb direktorlarının məhz qadın olmasında, ümumiyyətlə kollektivdə çoxluğun qadınlardan ibarət olmasındadır? Məktəb direktorları ilə bağlı problem necə həll olunmalıdır?
“Məktəb direktoru vəzifəsinə ancaq məktəbin içindən müəyyən qədər nüfuza, biliyə, bacarığa, idarəetmə qabiliyyətinə sahib olan biri seçilməlidir"
Təhsil eksperti Məzahir Məmmədli “Bakı-Xəbər”ə bildirdi ki, təhsil sahəsində rəhbər vəzifələrə hazırlıqlı kadrların məhdud olmasının əsas səbəbi müəllimlər arasında rəhbər vəzifəyə keçmək istəyən şəxslər içərisində potensialı olanların azlıq təşkil etməsidir: “Direktorların yetişdirilməsi prosesi və sistemin özündə ciddi boşluqlar müşahidə olunur. Bu gün Azərbaycanda direktor təlimləri mövcuddur, lakin onlar nəzəriyyəyə yönəlmiş və tətbiqi bacarıqlardan kənar olur. Ölkədə məktəb direktorlarının inkişafı, həm də onların bilik və bacarıqlarını yeniləmək üçün mütəmadi qiymətləndirmələrə ehtiyac duyulur. Bu, onların zəif cəhətlərini müəyyən etməyə və peşəkar inkişaf üçün addımlar atmağa imkan verir. Orta məktəblər üçün yaxşı direktor yetişdirmək təhsil sisteminin səmərəliliyini və keyfiyyətini artırmaq üçün əsas addımlardan biridir. Bu sahədə uğur əldə etmək üçün təlim proqramlarının genişləndirilməsi, rəhbər kadrların seçilməsində şəffaflıq, motivasiya edici və stimullaşdırıcı peşəkar inkişaf proqramlarının tətbiqi vacibdir. Məktəb direktoru vəzifəsinə ancaq məktəbin içindən müəyyən qədər nüfuza, biliyə, bacarığa, idarəetmə qabiliyyətinə sahib olan biri seçilməlidir".
Günel CƏLİLOVA
