İlqar Hüseynli: “Bu, dolanışığını 500 manatla zülmlə təmin edən camaat üçün həqarətdir”
Ara-sıra mediada rast gəlirik ki, müəyyən dövlət məmurları və deputatlar 4-5 min manat maaş aldıqlarını, lakin çətin dolandıqlarını bəyan edirlər. Yaşayış minimumu odur ki, bu vəsaitlə insan yaşaya bilər.
Azərbaycanda 2025-ci il üçün yaşayış minimumu ölkə üzrə 285 manat, əmək qabiliyyətli əhali üçün 305 manat, pensiyaçılar üçün 232 manat, uşaqlar üçün 246 manat məbləğində müəyyən edilib. Fakt odur ki, bununla yaşamaq olmur və yaxud da çox çətindir. Azərbaycanda yaşayış minimumu azı 700 manat olmalıdır ki, normal yaşaya biləsən. İl ərzində insan özünə paltar da almalıdır, həkimə də getməlidir. Bunun xeyir işi var, yas mərasimləri var və s.
Bəs bəzi məmurların, deputatların belə yanaşmaları nə dərəcədə doğrudur? 4-5 min manat maaş alıb dolana bilmirlərsə, bəs ayda 500-600 maaş alanlar nə etsinlər?
“Çünki 4-5 min manat o qədər normal məvacibdir ki, onunla nəinki bir ay, hətta 2-3 ay...”
Sözügedən məsələni “Bakı-Xəbər”ə şərh edən ekspert İlqar Hüseynli hesab edir ki, o cür fikirlə çıxış edənlər səmimi deyil: “Ümumiyyətlə, deputatların və yaxud da digər dövlət məmurlarının tez-tez bu cür çıxışlar etməsi səmimi deyil. Guya 4-5 min manat maaş almaqla dolana bilmirlər, çətinliklə yaşayırlar. Bu, ictimaiyyəti aldatmağa xidmət edən bir məsələdir. Əslinə baxanda, onlar yalnız maaşla kifayətlənmir. Onların ildə əlavə olaraq istirahət xərcləri qarşılanır, müxtəlif ölkələrə məzuniyyətlərə gedirlər və bununla bağlı onlara kifayət qədər ödənişlər olur. Üstəlik, əksər deputatlar və keçmiş məmurlar oliqarx zümrədilər və özlərinin biznesləri, mülkləri var. Bunu da ictimaiyyətdən gizlətmək üçün belə açıqlamalar verirlər. Sanki çətin durumdan əziyyət çəkirlər. Sanki onlar da “çətin durumda” yaşadıqlarını cəmiyyətə göstərməkdən ötrü belə bir manipulyativ hərəkətlər edirlər. Əslində kifayət qədər sosial ehtiyacları olan bir xalq üçün, dolanışıqlarını 500 manatla zülmlə təmin edən camaat üçün bu cür fikirlərin səsləndirilməsi xalqımıza qarşı bir həqarətdir. Həmçinin, yaramaz bir hərəkətdir. Hesab edirəm ki, buna son qoyulmalıdır. Çünki 4-5 min manat o qədər normal məvacibdir ki, onunla nəinki bir ay, hətta 2-3 ay normal şəkildə bir ailəni dolandırmaq mümkündür. Ona görə də kimisə aldatmasınlar, hamı hər şeyi yaxşı bilir. Kiminsə gözünə kül üfürməsinlər”.
Vidadi ORDAHALLI
