Masazır sakini Fazil Qafarlı Fövqəladə Hallar naziri Kəmaləddin Heydərova müraciət edib. F.Qafarlı müraciəti öz Facebook hesabında paylaşıb.
Müraciətdə deyilir:
“Bildirirəm ki, mən Abşeron rayonu, Masazır kəndinin Yeni Massiv deyilən ərazisində yaşayıram. Kəndin içərisində, hər tərəfi həyət evləri ilə əhatələnmiş bir ərazidə qeyri-qanuni 7 mərtəbə olmaqla hündürmərtəbəli bina evi tikilib. İ.Qayıbov və R.Rza küçələri arasında olan bu torpaq Pirzadayev Telman Natiq oğluna fərdi evin tikintisi üçün icazə verilib. Buna baxmayaraq həmin yerdə hündürmərtəbəli bina tikilib. Dəfələrlə əlaqədar təşkilatlara müraciət etməyimizə baxmayaraq tikinti dayandırılmadı.
Hal-hazırda bina ilə mənim evimin arasında qalan 3 metr ara məsafəsində dərin bünövrə qazıb binanı genişləndirirlər. Bu tikinti mənim evim və ailə üzvlərimin həyatı üçün real təhlükədir. Mənim evimin uçmaq təhlükəsi var.
112 qaynar xəttinə 5 və 17 may tarixlərində zəng etmişəm. Sumqayıt regional şöbəsindən gəlib yerində baxış keçirdilər, görülən işlərin şəklini çəkdilər, bildirdilər ki, bu, qanunsuz tikintidir, tədbir görəcəyik. Hələ də tikintinin qarşısı alınmır.
Hörmətli Kəmaləddin müəllim!
Bu qanunsuz tikintini aparan iki nəfərdir. Biri iş adamı İsrafil İsrafilovdur. Digəri, Fövqəladə Hallar Nazirliyinin yanğından mühafizə şöbəsinin əməkdaşı kapitan rütbəli Abuzər adlı şəxsdir (soyadını bilmirəm). Təəssüf ki, fövqəladənin işçisi qanunsuz tikinti aparır. 112-yə zənglərimdə
bunu bildirmişəm, demişəm ki, Kəmaləddin müəllimə çatdırın.
Tikinti qaydalarının əsasnaməsinə görə, hündürmərtəbəli bina ilə mənim evimin arasında ara məsafəsi saxlanmalıdır və arada heç bir tikinti aparılmamalıdır. Mənim əmlakımın dibini qazıblar, heç bir məsafə saxlanılmayıb. Nəzərə alınmalıdır ki, binanın özü də qanunsuz tikilib.
Hörmətli Kəmaləddin müəllim, xahiş edirəm ki, bu tikinti dayandırılsın, mənim evim, ailəm bu təhlükədən qurtulsun. Mən Qarabağdanam, keçmiş məcburi köçkünəm, əziyyətlə ev tikmişik, evimiz təhlükədə olmasın. Mənə köməklik etməyinizi artıq dərəcədə xahiş edirəm”.
https://www.facebook.com/share/197Wbxjh2S/
NAMİQ
