Cəmiyyətin inkişafında, yeni nəslin formalaşmasında əvəzolunmaz rol oynayan müəllimlər hər zaman hörmət və ehtirama layiq olmuşlar. Müəllimlik – bu, sadəcə bir peşə deyil, bir ömürlük missiyadır. Onların fədakarlığı, səbr və əzmkarlığı saysız-hesabsız həyatlara nur saçır, yolları işıqlandırır. Şərəfli müəllim ömrü – bu, təkcə dərs dediyi illərlə ölçülmür, həm də yetişdirdiyi insanlarla, qazandığı hörmətlə və arxasınca buraxdığı izlə ölçülür.
Hər bir müəllimin həyatı fərqlidir, lakin onları birləşdirən ortaq bir dəyər var – gənclərə bilik vermək, onların dünyagörüşünü genişləndirmək və vicdanlı, vətənpərvər, düşünən bir nəsil yetişdirmək. Bu yolda müəllim özünü qurban verir, zamanını, enerjisini, bəzən sağlamlığını belə yetirmələrinə həsr edir. Təkcə auditoriyada yox, həyatın özündə də müəllim olur – məsləhət verən, yol göstərən, qayğıkeş bir bələdçi olur.
Şərəfli müəllim ömrü, illərlə auditoriyada səslənən səmimi sözlərlə, gündəlik zəhmətlə, səbir və sevgiylə yazılan bir tarixdir. O tarix ki, heç zaman unudulmur. Keçmiş tələbələr illər keçsə də, müəllimini ehtiramla xatırlayır, onun öyüdlərini yaddaşında yaşadır. Müəllimin adı zamanla şərəf simvoluna çevrilir, örnəyə çevrilir.
Belə ömürlər bizim milli sərvətimizdir. Onları tanımaq, dəyərləndirmək və gələcək nəsillərə tanıtmaq bizim borcumuzdur. Çünki bir xalqın sabahı, məhz bu gün dərs deyən, sevgi ilə öyrədən müəllimin əllərində formalaşır.
Bir ömrü sözlə ifadə etmək bəzən nə qədər çətin olsa da, elə insanlar var ki, onların həyat yolu özü bir məktəb, bir örnəkdir. Azərbaycan Tibb Universitetinin Əczaçılıq fakültəsinin baş müəllimi, alicənab insan, hər kəsin sevimlisi Maqsud Qəşəm oğlu Aslanov da məhz belə şəxsiyyətlərdən biri idi. O, ömrünün 59-cu baharında qəfil dünyasını dəyişərək əbədi ayrılığa getsə də, arxasında dərin hörmət və iz qoydu. Həm peşəkar, həm pedaqoq, həm də ziyalı kimi, o, Azərbaycan əczaçılıq elminin inkişafına böyük töhfələr verdi.
Maqsud müəllimin həyatı zəhmətlə, təvazökarlıqla və ali insani keyfiyyətlərlə insanların yaddaşlarına köçüb. Ali məktəbə müəllimlik fəaliyyətinə başlamazdan öncə o, Bakı şəhəri Səbayıl rayonunun mərkəzi 259 saylı aptekində praktiki əczaçı kimi çalışmışdı. Gündəlik fəaliyyətində məsuliyyət, dəqiqlik və xəstəyə qayğı prinsiplərini daim rəhbər tutaraq, həmkarlarının və xəstələrin böyük rəğbətini qazanmışdı. Bu dövrdə qazandığı zəngin praktiki təcrübə onun sonrakı illərdə tədris etdiyi dərslərin bünövrəsi olmuşdur.
Maqsud Aslanovun Azərbaycan Tibb Universitetindəki fəaliyyəti təqdirəlayiq bir həyat yoludur. O, 30 ilə yaxın bir müddətdə Əczaçılıq fakültəsinin Əczaçılıq texnologiyası və idarəçiliyi kafedrasında müəllim kimi çalışmış, tələbələrə yüksək səviyyədə əczaçılıq sənətinin sirrlərini öyrətmişdir. “Əczaçılıq tarixi və deontologiyası”, “Əczaçılıq iqtisadiyyatı”, “Əczaçılıq işinin təşkili”, “Əczaçılıq menecmenti” və “Əczaçılıq texnologiyası” fənlərini mükəmməl bilən və onları tələbələrə aydın, məzmunlu şəkildə çatdıran Maqsud müəllim yüzlərlə əczaçı mütəxəssisin yetişməsində mühüm rol oynamışdır. Onun dərslərində tələbələrə yalnız bilik deyil, həm də yüksək mədəniyyət, vətənə və peşəsinə sevgi aşılanırdı.
Təcrübəli pedaqoq olmaqla yanaşı, Maqsud müəllim həm də bacarıqlı və məhsuldar tədqiqatçı alim idi. O, elmi fəaliyyətini daim inkişaf etdirərək 50-dən artıq elmi məqalə ilə çıxış etmişdir. Bu məqalələr təkcə Azərbaycanın deyil, Çexiya, Macarıstan, Rusiya, Sloveniya, Polşa, İtaliya və Türkiyənin nüfuzlu elmi jurnallarında da dərc olunmuşdur. O, həmçinin beş metodik vəsaitin və dörd dərsliyin həmmüəllifidir. Bu dərsliklərdən yalnız biri – “Əczaçılıq tarixi” (ingilis dilində) nəşr olunmuş, digərləri isə hazırda son tamamlama mərhələsindədir və yaxın zamanda çap ediləcəkdir. Şübhəsiz ki, bu dərsliklərin işıq üzü görməsi onun xatirəsinə ən böyük elmi töhfə olacaqdır.
Maqsud müəllim universitetin yalnız elm və tədris sahəsində deyil, həm də ictimai həyatında fəal iştirak etmişdir. O, uzun illər Əczaçılıq fakültəsinin dekan müavini vəzifəsində çalışmış, təşkilatçılıq qabiliyyəti, obyektivliyi və insani münasibətləri ilə həmkarlarının və tələbələrin dərin rəğbətini qazanmışdır. Eyni zamanda o, Əczaçılıq fakültəsinin “Diplom Müdafiəsi Şurası”nın elmi katibi və Fakültə Elmi Şurasının üzvü kimi məsul vəzifələrdə çalışaraq, universitetin elmi və təşkilati işlərində mühüm töhfələr vermişdir. Təcrübəli pedaqoq 2018-ci ilin 18 noyabrında keçirilən Azərbaycan Müəllimlərinin XV (Müstəqil Azərbaycanın V) qurultayının nümayəndəsi olmuşdur.
Maqsud müəllimin simasında biz yalnız savadlı bir mütəxəssisi deyil, həm də yüksək mədəniyyətə malik, alicənab, son dərəcə qayğıkeş bir insanı tanımışıq. Onun tələbəyə olan münasibəti yalnız müəllim-tələbə çərçivəsində qalmayıb, hər bir tələbənin taleyinə, qayğılarına, gələcəyinə diqqət göstərən bir mənəvi dayaq olmuşdur. Onun iş otağına girən hər kəs oradan yalnız biliklə deyil, həm də ruh yüksəkliyi ilə ayrılmışdır.
Dəqiq, məsuliyyətli, eyni zamanda sadə və mehriban xasiyyəti ilə o, həmkarları arasında da böyük hörmət qazanmışdı. Onunla çalışan hər kəs, bu gün onun yoxluğunu dərin kədər və həsrətlə xatırlayır. Amma belə insanlar heç zaman tam anlamda getmir. Onlar yetişdirdikləri tələbələrin uğurlarında, yazdıqları elmi işlərdə, universitetin divarlarında səslənən minlərlə təşəkkürdə və ən əsası, insanların yaddaşında yaşayırlar.
Maqsud Aslanovun ömrü – elmə, əczaçılıq sahəsinə, gənclərin təlim-tərbiyəsinə, insanlığa həsr olunmuş parlaq və mənalı bir ömürdür. O, həm bir müəllim, həm bir ictimai xadim, həm də nümunəvi insan kimi yaddaşlara həkk olunub.
Onu da qeyd etməliyəm ki, əslən Qərbi Azərbaycanın Göyçə mahalının Basarkeçər rayonunun Kəsəmən kəndindən olan Maqsud Aslanov qədim, əsilli-köklü bir nəsli təmsil edirdi. O, yalnız elm və təhsil sahəsində deyil, həm də mənəvi-əxlaqi dəyərləri ilə seçilən, yüksək vətənpərvərlik duyğularına malik bir şəxsiyyət idi. Qəlbi daim Vətən sevgisi ilə döyünən Maqsud müəllim milli kimliyinə, torpaqlarımıza və tariximizə sonsuz bağlılığı ilə tanınırdı.
Uşaqlıq və məktəb illəri mədəniyyət beşiyimiz olan Şuşada keçən Maqsud müəllim üçün Qarabağın azad olunması böyük sevinc və qürur mənbəyi idi. Bununla belə onun ən böyük arzularından biri doğulub boya-başa çatdığı, yaddaşının dərin qatlarında yaşatdığı Qərbi Azərbaycana qayıtmaq idi. Bu arzunun reallaşacağına bütün varlığı ilə inanır, o torpaqlara qovuşacağı günü ümid və səbirlə gözləyirdi.
İnanırıq ki, o gün uzaqda deyil. Və o gün gələndə – doğma yurd yerlərimizə dönüş baş tutanda – Maqsud müəllimin ruhu da öz nisgilindən arınacaq, bir ömrün boyu daşıdığı həsrət nəhayət ki, dinclik tapacaq.
Maqsud Aslanovun həyat yolu və ideyaları, onun elmə, millətə və torpağa olan sonsuz sevgisi daim yaddaşlarda yaşayacaq. Onun əziz xatirəsi daim hörmətlə yad ediləcək, yaşadığı ömür yolu gələcək nəsillər üçün nümunə olacaqdır.
Aidə BƏNDƏLİYEVA Azərbaycan Tibb Universitetinin müəllimi, “Qızıl Qələm” Mükafatı Laureatı.
