Bu gün Milli Məclisin İqtisadi siyasət komitəsinin iclasında "Reklam haqqında” qanun layihəsi müzakirə olunub. "APA-Economics”in məlumatına görə, komitə sədri Ziyad Səmədzadə bu qanun layihəsini Azərbaycan iqtisadiyyatı üçün çox vacib qanun layihələrindən biri adlandırıb.
O deyib ki, Milli Məclisdə birinci oxunuşdan sonra qanun layihəsinə kifayət qədər düzəlişlər edilib: "Reklam insanların hər gün üzləşdiyi prosesdir və bu prosesdə həm dilimizin, həm milli iqtisadiyyatın qorunması, əcnəbi və ikili standart mövqelərdən qorumaq üçün əsas verəcək. Bu qanun layihəsi Milli Məclisə çıxarılanda da düzəlişlər ediləcək. Məqsəd isə ondan ibarətdir ki, Azərbaycanda qəbul ediləcək reklam haqqında qanun bütün mütərəqqi tələblərə cavab versin, ölkəmizdə vətəndaş cəmiyyətinin qurulmasına xidmət etsin, istehsalçı və istehlakçıların hüquqlarının qorunmasını təmin etsin”.
Qanun layihəsinin müəlliflərindən biri Vahid Əhmədov bildirib ki, Azərbaycanda reklam haqqında qanunun qəbulundan 17 il keçib. Bunu əsas gətirən millət vəkili deyib ki, qanunun qəbulundan bəri uzun müddət keçdiyindən layihədə dəyişikliklərə çox böyük ehtiyac var. Onun sözlərinə görə, bu qanun layihəsində ictimai müzakirələrdə səsləndirilən təkliflər nəzərə alınıb. V. Əhmədov qeyd edib ki, qanun layihəsində sosial reklam anlayışı, onun hazırlanması və müəyyən olunması qaydalarına aydınlıq gətirilib: "Belə ki, layihədə sosial reklam anlayışı daha anlaşıqlı şəkildə verilib, onun dövlət büdcəsindən maliyyələşən reklam istehsalçıları, reklam yayıcıları və agentləri tərəfindən ödənişsiz, özəl qurumlar tərəfindən isə ödənişli istehsal edilməsi və yayımlanması təsbit edilib. Müəyyən edilib ki, bütün reklam yayıcıları ümumi reklam vaxtının, nəşrlərdəki reklam yerlərinin və reklam qurğularının ümumi sahəsinin 8%-ni sosial reklam üçün ayırmağa borcludur. Qeyd etməliyəm ki, mövcud qanunda bu rəqəm 5% miqdarında müəyyənləşdirilib. O cümlədən, teleradioda sosial reklamın yayımlanmasının vaxt çərçivəsi müəyyən edilib: saat 9-dan gecə saat 12-yə kimi. Bu da əsasən ona görədir ki, çox vaxt sosial reklamı gecə vaxtı verirlər, bu vaxt da verilən sosial reklam maraq doğurmur. Televiziya və radio şirkətlərinin maraqları nəzərə alınaraq, sosial reklamın müddətinin reklam üçün ayrılan efir vaxtına daxil edilmədiyi də qanunda göstərilib. Elə bilirəm ki, bu maddələr sosial reklam vericiləri ilə həmin reklamın yayıcıları arasında maraqların toqquşmasını aradan qaldıracaq”.
Millət vəkili qeyd edib ki, qanunun mətninin daha da sadələşdirilməsi, yayımlanan reklamlarda dövlət dilinin tələblərinə ciddi riayət edilməsi, qoyulan qadağaların nisbətən azaldılması ilə bağlı təkliflər nəzərə alınıb.
Bundan başqa, reklamın televiziya tamaşaçıları və radio dinləyicilərinə həm müsbət, həm də mənfi təsiri araşdırılaraq, onların yayımlanması tezliyi məsələsinə də yenidən baxılıb. "Bu məsələdə işçi qrupu mütəxəssislərlə, nazirliklərlə məsləhətləşmələr aparıb, reklamın insan tərəfindən optimal qavranılması, psixikasına mənfi təsirinin qarşısının alınması üçün reklamlar arasında interval müəyyənləşdirilib”, - deyə V. Əhmədov vurğulayıb.
Qanun layihəsində yeniliklərdən biri də idman-mərc oyunlarının reklamı üçün vaxt məhdudiyyətinin qoyulması ilə bağlıdır. Belə ki, əhalinin, xüsusən gənclərin psixologiyasına təsiri nəzərə alınaraq belə reklamların yayım vaxtı saat 23:00-dən 7:00-dək məhdudlaşdırılıb.
