ASAN xidmətlərdən məmnunluğun 100 faizə çata bilməməsində cərimə yazan BNA inspektorlarının da payı var...

Firdovsi Şahbazov: “BNA-nın yarıtmaz fəaliyyəti bir növ məqsədyönlü şəkildə ictimai narazılıqları körükləyir”

img

“ASAN xidmət”in əhali tərəfindən bəyənilmə əmsalı haradasa 98 faizdir”. Bunu bu günlərdə yerli telekanallara müsahibəsində Prezident İlham Əliyev deyib.

Ölkə başçısının fikrincə, korrupsiya üçün meydanı daraltmaqdan ötrü institusional tədbirlər görülməlidir, şəffaflıqla bağlı, hesabatlılıqla bağlı əlavə addımlar atılmalıdır: “Bunu sadə sözlə desəm - bütün sahələrdə ASAN modeli tətbiq edilməlidir. Çünki ASAN modeli artıq sınaqdan çıxmış bir modeldir. O da bizim təşəbbüsümüz idi. Bizə qədər bu cür, bu miqyasda və bu əhatədə oxşar bir xidmət sahəsi olmamışdı. Bunu da biz etmişik və bacarmışıq. Ona görə “ASAN xidmət”in əhali tərəfindən bəyənmə əmsalı haradasa 98 faizdir, bəlkə də çox. Mən təəccüb edirəm, nə üçün 100 faiz deyil. Çünki orada tam şəffaf mənzərə mövcuddur. Ona görə bütün sahələrdə – iqtisadi, sosial, məmur-vətəndaş münasibətləri sahəsində bu model tətbiq edilməlidir. Məmur-vətəndaş təmasları da, yəni harada ki korrupsiya imkanları var, minimuma endirilməlidir. Belə olan halda uğurlar daha da təsirli olacaq”.

Həqiqətən də “ASAN xidmət” modelinin bəyənmə əmsalının 98 faiz olmasından təəccüblənməyə bilmirsən. İstər-istəməz suallar yaranır ki, niyə əhalinin bundan razılığı 100 faiz deyil. Ancaq müşahidələr göstərir ki, yerdə qalan iki faiz narazılığın əsas səbəbi “ASAN xidmət” mərkəzləri qarşısında avtomobillərin pulsuz parkovkası ilə bağlı yerlərin olmaması ilə əlaqədardır. Problem ondadır ki, Bakı Nəqliyyat Agentliyinin inspektorları əhalinin mənmunluq ovqatını nəzərə almadan avtomobilləri amansızcasına cərimələyirlər. Halbuki, “ASAN xidmət” mərkəzlərinə gələnlər məcburən mərkəzin qarşısında avtomobillərini park edirlər. Çünki maşını parklamaq üçün yaxınlıqda ayrı yer yoxdur. Zatən işlərini bitirəndən sonra oranı tərk edirlər. Ancaq BNA əməkdaşları, hətta ən adi vaxt intervalını belə gözləmədən necə gəldi avtomobiillərə cərimə yazırlar. Bu da, istər-istəməz, insanların ovqatını korlayır. “ASAN xidmət” mərkəzlərində nə qədər keyfiyyətli xidmət göstərilsə də, belə xoşagəlməz hallar onların rəyinə təsir edir. Bu günlərdə Yasamaldakı “ASAN xidmət” mərkəzi qarşısında 1 saat müşahidə apardıq və BNA inspektorlarının çoxsaylı sürücüyə cərimə yazdığına şahid olduq.

Bütün bunların fonunda, BNA inspektorları “ASAN xidmət”dən 100 faiz ictimai mənmunluğun olmamasına nə dərəcədə mane olurlar?

  • “Qurum şəhərin bir sıra vacib ictimai əhəmiyyət kəsb edən yerlərində avtomobillərin pulsuz parklanmasına şərait yaratmır”

Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, BNA-nın yarıtmaz fəaliyyəti bir növ məqsədyönlü şəkildə ictimai narazılıqları körükləyir: “Əvvəla, BNA-nın necə gəldi sürücüləri cərimələməsi cəmiyyətdə ciddi qıcıq yaradır. Bu, nəinki avtomobil sahiblərinin, o cümlədən piyadaların da narazılığına səbəb olur. Problem odur ki, şəhərin bir sıra vacib yerlərində BNA avtomobillərin pulsuz parklanmasına şərait yaratmır. Halbuki, ictimai əhəmiyyət kəsb edən yerlərdə bütün bunların olması çox vacibdir. O cümlədən, “ASAN mərkəzllər”in qarşısında və ya yaxınlığında pulsuz parklanma yerləri olmalıdır. Ancaq biz nə görürük?  “ASAN xidmət” mərkəzlərindən çıxan vətandaş görür ki, əsaslı səbəb olmadan ona böyük məbləğdə cərimə yazıblar. Nədi-nədi, avtomobilini xidmətin qarşısında saxlayıb. Yaxşı, bəs yaxınlıqda pulsuz parklama üçün müvafiq yer yoxdursa, o zaman avtomobil sahibi nə etməlidir? Zatən ölkə əhaliusi BNA inspektorlarının qoçuluğundan, vətəndaşlarla mədəniyyətsiz davranışından bezib. Çünki hər kəsə məlumdur ki, qurumun fəaliyyətindən ictimaiyyət narazıdır. Bu azmış kimi, BNA-nın “cərimə kampaniyası” ictimai narazılıqları daha da körükləyir. Bu da öz növbəsində əhalinin rəyinə mənfi təsir edir”.

Bu səbəbdən ekspert hesab edir ki, BNA-nın özbaşınalıqlarına son qoyulmalıdır.

Vidadi ORDAHALLI

Peşə etikası

Son xəbərlər