Bakının ictimai nəqliyyat sarıdan bəxti elə də gətirməyib desək, yanılmarıq. Sərnişindaşıma fəaliyyəti ilə məşğul olan özəl şirkətlərin əksəriyyətinin fəaliyyəti paytaxt sakinlərini razı salmır. Sakinləri əsas narahat edən məsələlərdən biri xəttə buraxılan marşurut avtobusları idarə edən sürücülərin davranışı ilə bağlıdır.
Digər tərəfdən də, iddialardan biri həmişə o olub ki, Bakı Nəqliyyat Agentliyi (BNA) sərnişindaşıma şirkətlərini şəffaf şəkildə seçmir və sair. Ötən saylarımızdan birində bu mövzunu ictimailəşdirərkən BNA-dan bildirmişdilər ki, hazırda bu sahədə olan daşıma şirkətləri köhnələrdir və sərnişindaşıma ilə məşğul olan şirkətlər müsabiqə yolu ilə seçilir. Bu tenderlər, müsabiqələr necə keçirilir? Tenderlər keçirilərkən medianın iştirakı təmin olunur, ya olunmur? Köhnədən qalan şirkətlər bu gün problemin öhdəsindən gələ bilmirsə, o şirkətləri ləğv edib yenisini yaratmağa mane olan nədir? Niyə bunu etmirlər?
“Hər hansı daşıyıcı sərnişindaşıma tələblərinə cavab vermirsə...”
BNA-nın mətbuat katibi Mais Ağayev “Bakı-Xəbər”ə bildirdi ki, sərnişindaşıma şirkətləri tenderlə deyil, müsabiqə ilə seçilir: “İlk olaraq tender ifadəsini müsabiqə ilə əvəz edək. Çünki müntəzəm marşrut xətlərinin sərnişindaşıma fəaliyyəti ilə məşğul olan daşıyıcı şirkətin müvəqqəti istismara verilməsi müsabiqə yolu ilə olur. Bu müsabiqə də Nazirlər Kabinetinin 52 saylı qərarına uyğun olaraq keçirilir. Qeyd olunan qərarda müsabiqənin keçirilməsində medianın iştirakı ilə bağlı hər hansı bir tələb yoxdur. Amma müsabiqənin şəffaflığının təmin olunması vacib şərtdir”. Qanunvericiliyin tələbinə uyğun olaraq müsabiqə keçirilməzdən əvvəl bununla bağlı ictimaiyyətə məlumat verildiyini deyən M.Ağayevin sözlərinə görə, bu zaman müsabiqə və şərtləri barədə tam dolğun məlumatın yayımlanması təmin edilir: “Şirkətlərin ləğv olunması məsələsinə gəlincə, hesab edirəm ki, burada siz marşrut xəttinin digər daşıyıcıya verilməsini nəzərdə tutursunuz. Əgər belədirsə, o zaman bildirim ki, ötən dövrdə kifayət qədər belə hallar olub ki, hər hansı daşıyıcı sərnişindaşıma tələblərinə cavab vermirsə, ona həvalə edilən xəttin istismarını düzgün icra edə bilmirsə onunla müvəqqəti istismara dair bağlanan müqaviləyə xitam verilib”.
İradə SARIYEVA
