Uşaq bağçalarında körpələrin döyülməsi, tərbiyəçilərin uşaqlarla kobud rəftarı barədə tez-tez sosial mediada xəbərlər, videomateriallar yayımlanır. Övladlarını bağçalara verməyə məcbur qalan valideynlər isə bu kimi xoşagəlməz hallardan xilas olmaq üçün müxtəlif çıxış yolları axtarırlar. Həmin çarələrdən biri kimi də dövlət hesablı deyil, özəl bağçaları seçirlər.
Bildiyimiz kimi, özəl bağçaların bir çoxunda onlayn izləmə sistemi mövcuddur. Belə olduğu halda valideynlər, bağçadan kənarda olsalar belə, orda gedən bütün prosesləri izləyə bilirlər. Onlayn izləmə sistemi yalnız nəzarətə deyil, həm də valideynlərin bağça ilə yaxınlaşmasına, valideyn-müəllim münasibətlərinin möhkəmləndirilməsinə müsbət təsir göstərir.
Qeyd etdiyimiz kimi, özəl bağçalardan fərqli olaraq dövlət bağçalarında kamera sistemi yoxdur. Maraqlıdır, dövlət bağçalarında niyə kamera quraşdırılmır?
Təhsil Nazirliyi: “Hazırda bağçaların təhvil-təslimi həyata keçirilir, bu işlər tam yekunlaşdıqdan sonra…”
Təhsil Nazirliyindən bildirildi ki, hazırda bağçaların təhvil-təslimi həyata keçirilir. Bu işlər tam yekunlaşdıqdan sonra sözügedən məsələyə baxılacaq.
Kamran Əsədov: “Özəl uşaq bağçaları kamera vasitəsilə valideynlər tərəfindən mütəmadi izlənmə imkanlarına malikdir”
Təhsil eksperti Kamran Əsədov bildirdi ki, hazırda Azərbaycanda 1693 uşaq bağçası var və burada 123 min uşaq təlim-tərbiyə prosesinin iştirakçısına çevrilib: “Etiraf edək ki, 2011-ci ildən uşaq bağçaları İcra Hakimiyyətlərinə verildikdən sonra biz ciddi dəyişikliklər gözləyirdik. Ancaq vəziyyət hər gün geriyə doğru getməyə başladı. Burada təhcizat, qidalanma problemləri ilə yanaşı tədris prosesinin təşkili də çox aşağı səviyyədədir. Məhz mövcud problemlər, uşaq bağçalarını bitirən uşaqların 1-ci sinfə qəbulu zamanı bilik və bacarıqlarının, psixoloji dayanıqlıqlarının normal olmaması nəticəsində prezident 2021-ci ilin dekabrında bağçaları yenidən Təhsil Nazirliyinə verdi”.
Onun sözlərinə görə, özəl uşaq bağçaları kamera vasitəsilə valideynlər tərəfindən mütəmadi izlənmə imkanlarına malikdir, dövlət uşaq bağçalarının isə kamera izləməsi yoxdur: “Ümumiyyətlə, kamera qoyduqda da problem olacağını düşünmək yanlışdır. İnsanlar bundan narahat olmamalıdır. Özəl bağçaların təcrübəsinə baxanda görürük ki, birmənalı olaraq, kamera izlənməsi belə halları kəskin şəkildə azaldır. Bəzən insanlar emosional olaraq buna yol verirlər, amma, biz pedeqoji kadr olaraq ixtisaslı mütəxəssisləri götürsək, kamera izlənməsini həyata keçirsək, belə hallar azalacaq. Bu hal sərt cəza tələb edir, çünki insanlar yalnız cəzadan qorxmalıdırlar. Belə halları törədənlər cəzalandırılmalıdır ki, digərləri dərs götürsünlər”.
Aytəkin Kamranqızı: “Təhlükəsizlik kameraları bir çox neqativ halların qarşısını almaqda kömək edir”
Sosioloq Aytəkin Kamranqızı bildirdi ki, onlayn izləmə dövlət bağçalarında da olsa daha yaxşı olar: “Çox təəssüf ki, bizim məktəbəqədər təhsil sistemində mükəmməl konsepsiyalarımız yoxdur. Onlayn izləmə sistemi olduğu zaman tərbiyəçilər ehtiyat edir, hərəkətlərinə müəyyən nizam verirlər. Amma olmayanda tərbiyəçi “onsuz uşaq qorxub evdə deməyəcək” anlayışı ilə hərəkət edir. Təəssüf ki, doğrudan da belədir və onlar hər istədiyini edir.
Təhlükəsizlik kameraları bir çox neqativ halların qarşısını almağa kömək edir. Bundan başqa, hər hansı problemin araşdırılması üçün də bu kameraların rolu əvəzsizdir. Bağçalar isə ümumiyyətlə ictimaiyyətə qapalı bir müəssisədir. Valideyn uşağı bağçaya qoyduqdan sonra 8-9 saat ondan heç bir məlumat ala bilmir. Bağça rəhbərliyindən ona verilən informasiya ilə kifayətlənir. Ölkələrin əksəriyyətində artıq bağçalarda onlayn sistem qurulub ki, valideyn internet vasitəsilə istədiyi zaman uşağının nə etdiyini izləyə bilir. Kamera təkcə valideynin nəzarəti üçün deyil, bu həm də müəllim və rəhbərliyin məsuliyyətini artırır”.
Günel CƏLİLOVA
