Masallı rayonunun Ərəb kəndində dünyaya gəlmiş Masim Qurbanov İkinci Qarabağ müharibəsində Vətən, torpaq uğrunda şəhid oldu. Bu Vətən sevdalısının şərəfli ölümü bütün el-obaya başucalığı gətirdi. Masallı camaatı öz igid oğlunu hər an ehtiramla xatırlayır, onun Vətən, torpaq sevgisini özlərinə örnək bilirlər.
Məlumat üçün bildirim ki, Masim Qurbanov 2020-ci ilin sentyabrın 27-də başlayan Vətən müharibəsində Cəbrayıl, Füzuli, Zəngilan və Qubadlı rayonlarının azad olmasında əsl qəhrəman kimi döyüşür. Dəfələrlə düşmənlə üz-üzə gələrək onlara ağır itki verir. İgid əsgər Qubadlı rayonu istiqamətində gedən ağır müharibədə yağı gülləsinə tuş gəlir. Canını qurban verir ki, Vətən yaşasın. O, müqəddəs şəhidlik zirvəsinə ucalanda ömrünün 19-cu ilini yaşayırdı.
Masimin şərəfinə boya-başa çatdığı doğma kəndində abidə bulaq kompleksi ucaldılıb. Onun adına daşıyan bu möhtəşəm kompleksdə həm də Birinci Qarabağ və Vətən müharibələrində şəhid olan Ərəb kəndinin qəhrəman oğulların xatirə lövhələri vurulub.
Bu günlər kompleksin açılışına şəhid ailələri, müharibə iştirakçıları ilə bərabər demək olar ki, rayonun əksəriyyəti, eləcə də digər yerlərdən qonaqlar gəlmişdi. Bir gün davam edən mərasim Azərbaycanın Dövlət Himnin ifa olunması ilə başlandı və ölkəmizin suverenliyi, ərazi bütövlüyü uğrunda şəhid olan qəhrəman Vətən oğlanların xatirəsi bir dəqiqəlik sükutla yad edildi.
Tədbirdə çıxış edən Masallı Rayon İcra Hakimiyyətinin başçısı Şahin Məmmədov, şəhidin atası, Birinci Qarabağ müharibəsi döyüşlərinin iştirakçısı olmuş Hafiz Qurbanov və başqaları bildirdilər ki, Azərbaycan Prezidenti, Müzəffər Ali Baş Komandan İlham Əliyevin rəhbərliyi altında ordumuzun zabit və əsgərləri canından keçərək 44 günlük Vətən müharibəsində tarixi zəfər qazandılar. Ərəb kəndinin igid oğlu Masim Qurbanov da ürəyi Vətən eşqli oğlanların arasında idi. Qısa ömrünü mərdliklə, qəhrəmanlıqla başa vuran Masimi indi bütün Azərbaycan xalqı tanıyır və onunla fəxr edir. Başqa Vətən şəhidləri kimi Masim də unudulmaz, çünki Vətəni yaşadanlar əbədi olaraq ürəklərdə yaşayırlar....
Tədbirdə hərbi-vətənpərvərlik mövzusunda şerlər səsləndi, əzəli yurd yerimiz Qarabağın yağı düşməndən azad edilməsi uğrunda gedən döyüşlərdə şəhidlik zirvəsinə ucalan Ərəbli qəhrəman Vətən oğullarının şəkilləri olan abidə-bulaq kompleksi ziyarət edildi, üzərinə qərənfillər düzüldü.
Zəfər ORUCOĞLU Azərbaycan Jurnalistlər Birliyinin üzvü.
