“Hərbi qulluqçuların təminat xərclərinin tərkibində olan əlavələrin hesablanmasında nöqsanlar var idi. Həmin əlavələrin yenidən hesablanması nəticəsində 250-dən artıq əmək pensiyaçısının pensiyası yenidən hesablanıb”. Bunu Dövlət Sosial Müdafiə Fondunun Xüsusi Şərtlərlə Təyinat üzrə Mərkəzi Filialının direktoru Şahin Əliyev deyib.
Onun sözlərinə görə, nəticədə pensiya məbləğlərində müəyyən artımlar olub.
Bəzi iddilara görə, Əmək və Əhalinin Sosial Müdafiəsi Nazirliyində manipulyasiya ilə məşğul olan müəyyən şəxslər var və onlar hərbi təqaüdçülərin pensiyalarının artımına bu və digər mənada maneçilik etmək istəyirlər. Amma hərbi təqaüdçülər və ehtiyatda olan hərbçilər Prezidentə müraciət edən kimi nazirliyin strukturundan onların probleminin həlli üçün addımlar artıldığı bildirildi, bu qəbildən olan insanların da pensiyasında artım olacağını deyirlər.
Tanınmış hərbi ekspert Üzeyir Cəfərov məsələ ilə bağlı öz facebook hesabında belə qeydlər edib: “Əziz dostlar! Hörmətli həmkarlar! Ehtiyatda və istefada olan hərbi qulluqçularla bağlı bəzi ƏDALƏTLİ qərar(lar) qəbul edildi. Hər kəsi təbrik edirəm. Bu başqa cür ola da bilməzdi. Əməyi keçən hər kəsə minnətdarlıq!”
“Biz narazılığımızı bildirəndən və Prezidentə müraciət edəndən sonra məlum olur ki...”
Hərbi təqaüdçü və hərbi ekspert Abuzər Əbilov isə bizimlə söhbətində bildirdi ki, problem qismən həll edilsə də, tam olaraq öz həllini tapmayıb. A.Əbilov hesab edir ki, bu problem birdəfəlik kökündən həll olunmalıdır: “Ümumiyyətlə, Əmək və Əhalinin Sosial Müdafiəsi Nazirliyinin bir sıra vəzifəli şəxslərinin bir-birinə zidd olan açıqlamalarından belə nəticəyə gəlmək olur ki, bu dövlət qurumunda heç də mütəxəssislər yox, adi insanlar çalışır. Yəni burada bu məsələlərdən xəbərsiz, elmsiz insanlar xidmət edir. Mən hazırda orada nəyin düzgün hesablanıb, nəyin düzgün hesablanmadığını deyə bilmərəm. Bunu qoy Respublika Prokurorluğunun korrupsiyaya ilə mübarizə şöbəsi araşdırsın, aydınlıq gətirsin. Düşünürəm ki, həmin nazirlikdə bir daha güc strukturlarının korrupsiya ilə mübarizə üzrə mütəxəssisləri, iqtisadçılar işləməlidir. Ortaya dəqiq məsələlər çıxarmalıdır ki, niyə bu məsələlər veteranların, təqaüdçülərin, hərbi pensiyaçıların, ehtiyatda olan hərbçilərin bilavasitə narazılığından, ölkə başçısına müraciətlərindən sonra ortaya çıxır? Biz narazılığımızı bildirəndən və Prezidentə müraciət edəndən sonra məlum olur ki, pensiya hesablanmasında hansısa səhvlər olub. Belə çıxır ki, hərbi pensiyaçılar və ehtiyatda olan hərbçilər səslərini çıxarmasalar, bu qurum istədiyini edəcək və bu məsələlər heç vaxt öz normal həllini tapmayacaq. Bəli, bu gün 250 hərbi təqaüdçünün pensiyasında olan hansısa səhvlər araşdırılıb aradan qaldırılıb. Yəni nazirliyin rəsmisinin dediyinə görə belədir. Lakin yenidən deyirəm, ehtiyatda olan hərbçilərin və hərbi təqaüdçülərin məsələləri hələ də tam olaraq öz həllini tapmayıb, bu məsələ hələ də həllini gözləyir".
Hərbi təqaüdçü deyir ki, müvafiq qanuna uyğun olaraq ölkədəki artımlar hərbi təqaüdçülərlə şamil olunur. O hesab edir ki, bu qanuna təpki varsa, onu saya-hesaba almamaq varsa demək nazirlikdə bir çox şəxslər, məmurlar Azərbaycan Respublikasının qanunlarına, Konstitusiya aktına saymaz yanaşırlar. "Bu insanlar ciddi şəkildə cəzalandırılmalıdır. Belə şey olmaz. Hər dəfə artım olanda, prezident pensiyalarla, təqaüdlərlə, maaşlarla bağlı sərəncam verəndə bu problem ortaya çıxır. Bu nə vaxta qədər belə olacaq? Ona görə də deyirəm ki, nazirlikdə və onun strukturlarında yoxlamalar aparılmalıdır. O insanlar ki, orada "səhvləri" bilərəkdən və ya bilməyərəkdən ediblər, onlar qəti şəkildə cəzalandırılmalıdır. Ölkədə 250 nəfər deyil, on minlərlə hərbi təqaüdçü var. Bu insanların hər biri yaşlı və əsəbi, xəstə insanlardır, onları yenidən əsəbiləşdirmək, stressə salmaq olmaz...”- deyə A.Əbilov bildirdi.
İradə SARIYEVA
