2020-ci ildə Azərbaycan Respublikası Nazirlər Kabineti tərəfindən küçə parklanmasına görə qiymətlər müəyyən edilənədək, paytaxtın küçə və prospektlərində parklanma yerlərinin ödənişsiz olması barədə qərar qəbul edilib. Hətta bununla bağlı həmin yerlərdə lövhələr yerləşdirilib və qeyd olunub: “Tariflər müəyyən edilənə qədər parklanma ödənişsizdir”.
Qeyd edək ki, iki il ərzində paytaxtın istənilən ərazisində həmin lövhələrə rast gəlmək mümkündür. Ancaq parklanma yerlərində “parkovşik”lər var və vətəndaşlardan qeyri-rəsmi şəkildə ödəniş yığırlar. Belə aydın olur ki, 2 il müddətində nə qiymət müəyyənləşdirilib, nə də parklanma ödənişsizdir. O üzdən də yığılan ödənişlər qeyri-rəsmidir və dövlət büdcəsindən yayınır.
Maraqlıdır, bu müddət ərzində tariflər niyə hələ də müəyyənləşməyib?
Mais Ağayev: “Qeyri-rəsmi ödəniş yığılmasının agentliklə heç bir əlaqəsi yoxdur”
Bakı Nəqliyyat Agentliyinin (BNA) mətbuat xidmətinin rəhbəri Mais Ağayev qeyd etdi ki, qeyri-rəsmi ödəniş yığılmasının agentliklə heç bir əlaqəsi yoxdur: “BNA adından sui-istifadə hallarıdır. Çünki bizim hər hansı əməkdaşımızla “parkovşik” dediyimiz həmin şəxslər arasında hər hansı əməkdaşlıqdan söhbət gedə bilməz. Dəfələrlə açıq şəkildə bildirmişik ki, tariflər müəyyən edilənə qədər küçə parklanma yerlərindən istifadə etmək ödənişsizdir. Buna görə sürücülərdən vəsait alınması da tam qanunsuzdur”.
Elməddin Muradlı: “Qiymətlərin hələ də müəyyənləşməməsindən istifadə edən bəzi işbazlar əhalidən qeyri-qanuni pul yığırlar ki, bu da büdcədən böyük vəsaitin yayınması deməkdir”
Nəqliyyat məsələləri üzrə ekspert Elməddin Muradlı bildirdi ki, parklanma ilə bağlı qəbul edilən qanunun icrasında problemlər var: “Yeni qaydalara görə, parkinqdə insan xidmət göstərməyəcək, hər bir işi xüsusi texniki vasitə həll edəcək. Sürücü dayanacağa daxil olan kimi xüsusi texniki vasitə - parkomat onu qeydə almalı, vətəndaş orda ödəniş etməli, ödəniş haqda məlumat dərhal mərkəzi informasiya sisteminə getməli, həmin bildiriş əsasında sürücü parklama yerinə daxil olmalıdır. Hansı zaman aralığı üçün ödəniş edibsə, o qədər qala bilər, artıq qaldığı müddətdə cərimə olunacaq. Xüsusi texniki vasitə bunu müəyyənləşdirib necə cərimə təyin edəcək? Yaxud əlillər üçün ayrılmış yerdə başqa maşınlar park ediləndə xüsusi texniki vasitə cərimə yazmalıdır, necə yazacaq? Xüsusi texniki vasitə robot deyil axı, gəzmir. Deməli, hər parklama yerində agentliyin bir əməkdaşı durmalıdır. Yəni orda bir əməkdaş dayanıb bu işləri görməsə, prosesin xüsusi texniki vasitə ilə bərpası real görünmür. Mexanizmi yazıb qəbul edirlər, amma icrasına gələndə problem yaşanır”.
Ekspert onu da əlavə etdi ki, qiymətlərin hələ də müəyyənləşməməsindən istifadə edən bəzi işbazlar əhalidən qeyri-qanuni pul yığırlar ki, bu da büdcədən böyük vəsaitin yayınması deməkdir.
Günel CƏLİLOVA
