Mətbuatda yayılan məlumatlara görə, hərbi təqaüdçülər Prezident İlham Əliyevə məktub ünvanlayıb. Hərbi təqaüdçülər 6 yanvar tarixli məktublarında Əmək və Əhalinin Sosial Müdafiəsi Nazirliyini (ƏƏSMN) hərbi təqaüdçülərin hər il indeksasiya olunan pensiya və təminat xərcliyi hüququna məhəl qoymayan qanun layihəsi hazırlamaqda ittiham ediblər.
Müraciət müəllifləri prezidentin diqqətini 1 yanvar 2022-ci il tarixindən etibarən on minlərlə Azərbaycan vətəndaşının pensiyalarında baş verən artımın hərbi təqaüdçüləri əhatə etmədiyinə çəkirlər. Ehtiyatda və istefada olan hərbi qulluqçular, hərbi pensiyaçılar tərəfindən Prezidentə ünvanlanan məktub geniş müzakirə olunur.
Abuzər Əbilov: “Prezidentə açıq məktub yazmışıq, müraciət etmişik ki, ƏƏSMN tərəfindən illərdir bizə qarşı olan ögey münasibətə...”
Hərbi ekspert Abuzər Əbilov “Bakı-Xəbər”ə bildirdi ki, hərbi pensiyaçılar-ehtiyatda olan hərbçilər zaman-zaman ƏƏSMN-nin və Sosial Müdafiə Fondunun haqsızlıqları ilə üzləşib, bu il də rastlaşdılar: “Ölkə Prezidenti, Silahlı Qüvvələrin Ali Baş Komandanı İlham Əliyevin əsasən ölkə əhalisini dünyada qida məhsullarının qiymətinin qalxmasından sığotalamaq üçün bütün sferalarda maaşların, pensiyaların artırılması ilə bağlı sərəncamını hər birimiz gördük. Lakin bütün sferalarda maaşlar, pensiyalar qalxdığı halda ehtiyatda olan hərbiçilərin pensiyasında, pensiya təminatında heç bir artım yoxdur. Yaxın günlərdə Əmək və Əhalinin Sosial Müdafiəsi Nazirliyinin mətbuat xidmətinin rəisi çox absurd, heç kəsin başa düşə bilməyəcəyi bir açıqlama verib. İlk əvvəl açıqlamanın bütün mətni şablon sözlərdir. Axırda isə bir cümlə yazıb ki, bu artımlar pensiyaçılara şamil olunmur, yaxud da şərtləndirilmir. Bu nə deməkdir anlaya bilmirəm? Nazirlik açıq izah etmir ki, pensiya artımı nə üçün hərbi təqaüdçülərə şamil olunmur. Bunu göstərin. İkincisi də, Hərbi Xidmət keçmə haqqında qanunda qara və ağla yazılıbdır ki, bütün artımların, əlavələrin hamısı ehtiyatda olan hərbi qulluqçulara və pensiyaçılara şamil olunur. Bu qanuna təpki göstərərək hansısa ağlagəlməyən şərtlər irəli sürmək, özündən hansısa “qanun”, “müddəalar” çıxarmaq birincisi, birmənalı olaraq qanuna, digər tərəfdən də ehtiyatda olan böyük hərbiçi pensiyaçılar kontingentinə böyük bir təpkidir. Burada hansısa 5-10 manatın, yaxud 50-60 manatın artmasından, iqtisadi baxımdan yüksəlməkdən söhbət getmir, burada mənəvi anlayış var. Baxın, görün hərbi pensiyaçılar kimlərdir? Birinci Qarabağ savaşını keçmiş, ondan sonrakı dövrlərdə düşmənlə üz-üzə durmuş, İkinci Qaarabağ müharibəsində də əksəriyyətinin maddi-mənəvi və digər yardımlar etdiyi bir kontingentdir”.
O qeyd etdi ki, yəni bu insanlar Azərbaycan Respublikasının Silahlı Qüvvələrinin Ali Baş Komandanının ehtiyat qrupudur, bu insanlar mülkidə işləyib pensiyaya çıxanlar yox, ehtiyatda olan hərbçilərdir, bunlar da qanunda əks olunub. “Lakin bütün bunlara baxmayaraq, hansısa bir məqamda bu kimi xoşagəlməzliklər artıq neçənci dəfədir ki, ƏƏSMN tərəfindən törədilir. Keçən dəfə də belə bir narazılıq olmuşdu. Hərbi pensiyaçılar və ehtiyatda olan hərbçilər Sahil Babayevlə, Nazirliyin bir sıra vəzifəli şəxsləri ilə görüşdü, hətta işlər mıhkəməyə qədər gedib çıxdı və ehtiyatda olan hərbçilər öz istəklərinə çatdılar. Bu nə deməkdir? Başa düşə bilmirəm ki, ölkə Prezidenti hər dəfə hansısa bir artım, imtiyazlar barədə sərəncam imzalayanda bizlər ƏƏSMN ilə “müharibəmi” aparmalıyıq? Bu nəyə görə belə olmalıdır? Axı Azərbaycan Respublikasının “Hərbi Xidmət Keçmə Haqqında” Qanunu var. Hər şey də bu qanuna əsasən tənzimlənir. Məsələnin mənəvi tərəfini götürəndə, hərbi pensiyaçıların və ehtiyatda olan hərbiçilərin böyük kontingentinin övladları bugünkü gün hərbi məktəblərdə oxuyur, Silahlı Qüvvələrdə xidmət edir. Bu hansı presedentdir ki, həmin xidmətdə olan, yaxud oxuyub gələcəkdə hərbçi olacaq gəncə göstərirsən ki, onun atasına - uzun illər xidmət keçmiş valideyninə belə neqativ yanaşma var. Həmin gənc gələcəkdə xidmət edib pensiyaya çıxacağını gözünün önünə alandan sonra onun mənəvi durumu neçə olacaq? Buna görə də, bəli, biz ehtiyatda olan hərbiçilər, hərbi pensiyaçılar Prezidentə açıq məktub yazmışıq, müraciət etmişik ki, ƏƏSMN tərəfindən illərdir bizə qarşı olan ögey münasibətə son qoyulsun”.
Fazil Talıblı: “Hərbi qulluqçuların təminat xərcliyi artdığı halda onların pensiyalarında eyni artım baş verir, təminat xərcliyinə əlavə olunması isə qanunverciliklə onların pensiyalarında artımı şərtləndirmir”
Hərbi pensiyaçıların qaldırdığı məsələ ilə bağlı ƏƏSMN-nin mətbuat xidmətinin rəhbəri Fazil Talıblı ilə əlaqə saxladıq. F.Talıblı qeyd edib ki, hərbi qulluqçuların sosial müdafiəsinin gücləndirilməsi, eləcə də onların pensiya təminatının yaxşılaşdırılması bu gün ölkədə aparılan sosial siyasətin əsas istiqamətlərindən biridir. “Ötən dövrdə də bu istiqamətdə mühüm addımlar atılıb, hərbi qulluqçuların pensiyalarında dəfələrlə artımlar edilib. Pensiya sahəsində aparılan islahatlar zamanı da ilk növbədə hərbi qulluqçuların fəaliyyətinin, göstərmiş olduqları xidmətlərinin xüsusi önəmi diqqətdə saxlanaraq, onların maraq və mənafeləri nəzərə alınır. Bununla belə, hərbi qulluqçuların pensiyalarının onların təminat xərcliyinin artımı əsasında artırılması qaydasının guya ləğv edilməsi üçün təklif hazırlandığı barədə sosial şəbəkə səhifələrindən birində qeyd edilən məlumat yanlışdır. Belə bir təklif mövcud deyil və düşünülmür də. Ümumiyyətlə pensiya təminatına dair qanunvericilikdə hərbi qulluqçuların pensiya gəlirlərlərinə mənfi təsir edə biləcək hər hansı bir dəyişiklik edilməyib. Əksinə 2019-cu ildəki sosial islahatlar çərçivəsində həmin şəxslərin pensiyalarında ciddi artım (orta hesabla 30%) tətbiq olundu. Hazırda da hərbi qulluqçuların pensiyası onların təminat xərcliyi əsasında təyin edilir və təminat xərcliyi artdıqda da yenidən hesablanaraq artırılır. Dövlət başçısının 23 dekabr 2021-ci il tarixli Fərmanı ilə müvafiq qurumlarda hərbi və xüsusi rütbəli şəxslərin vəzifə maaşına 20% məbləğində əlavə edilib ki, bu əlavə həmin şəxslərin gələcəkdə pensiyası hesablanarkən nəzərə alınacaq. Lakin hərbi qulluqçuların təminat xərcliyi artdığı halda onların pensiyalarında eyni artım baş verir, təminat xərcliyinə əlavə olunması isə qanunverciliklə onların pensiyalarında artımı şərtləndirmir. İstərdik ki, bu tip həssas mövzularda məlumatlar paylaşanlar əvvəlcə bunu aidiyyəti qurumla dəqiqləşdirsin, əks halda belə qeyri-səhih məlumatlar insanlarda çaşqınlığa, yanlış ictimai rəyin formalaşmasına səbəb ola bilər” - deyə F.Talıblı qeyd edib.
İradə SARIYEVA
