“Ştutqart” mağazalarının sahibi, keçmiş deputat Nəriman Əliyev dələduzluqda ittiham olunur. Belə ki, sosial şəbəkədə onun müəyyən bir ərazidə çoxlu sayda ağacları kəsərək “Ştutqart” mağazaları üçün anbar tikdirməsi ilə bağlı foto yayılıb. Qeyd olunur ki, “Ştutqart” MMC-nin anbarının yaxınlığında yerləşən 37 ədəd ağac kəsilib.
Adıçəkilən şirkətin keçmiş əməkdaşı Abutalıb Ağayev sosial şəbəkədə yazaraq qeyd edir ki, N.Əliyev paytaxtın Nərimanov rayonu, Ələsgər Qayıbov küçəsi 10 C ünvanında yerləşən boş ərazini özəlləşdirərək öz adına rəsmiləşdirib: “Orada 941.5 kvadratlıq iki mərtəbədən ibarət anbar, 132.2 kvadratlıq iki mərtəbədən ibarət ofis binası inşa edib. Bundan sonra, 2020-ci ilin aprel ayında geridə qalan boş sahəni hündür hasara almaqla bu hissədə yerləşən 37 ədəd bir neçə illik, böyük ağacları kəsərək tikinti aparmaq üçün hazır vəziyyətə gətirib. Bununla bağlı müraciətimizdən sonra mütəxəssislər əraziyə gələrək baxış keçirib. Nəriman Əliyev ağacları kəsdikdən sonra “burada ağaclar olduğu unudulan kimi tikintiyə başlayacağıq” deyib. Ağaclar kəsilərək, Hövsanda boş torpaq sahəsinə yığılıb. 37 ədəd ağacı kəsməklə ekologiyaya vurduğu ziyana görə Nəriman Əliyev cinayət məsuliyyətinə cəlb olunmalıdır”.
Nəriman Əliyev: “Ağac kəsilməsi ilə bağlı səslənən iddialar əsassızdır”
Məsələ ilə bağlı keçmiş deputat Nəriman Əliyev bildirdi ki, ağac kəsilməsi ilə bağlı səslənən iddialar əsassızdır: “O obyekt 2004-cü ildə tikilib və mənə məxsusdur, düz 16 il qabaq da onun üçün Çıxarış alınıb. Bu şəxslər Ekologiya Nazirliyinə və Bakı Şəhər İcra Hakimiyyətinə müraciət ediblər. Hər iki qurumdan da həmin əraziyə baxış keçirilib və deyilib ki, onların iddiaları əsassızdır. Orada ağac kəsilməyib, kol-kos olub və onlar da təmizlənib”.
Ekologiya və Təbii Sərvətlər Nazirliyi - Hikmət Əlizadə: “Aparılan araşdırma zamanı sözügedən ərazidə 21 şam ağacının kəsildiyi müəyyən edilib”
Ekologiya və Təbii Sərvətlər Nazirliyinin Dövlət Ekoloji Təhlükəsiz xidmətinin rəisi Hikmət Əlizadə isə bildirdi k, Nərimanov rayonu, Ələsgər Qayıbov küçəsi 10 C ünvanında ağacların kəsilməsi ilə bağlı Dövlət Ekoloji Təhlükəsizlik Xidmətinə daxil olan şikayət araşdırılıb və fakt təsdiqini tapıb: “Aparılan araşdırma zamanı sözügedən ərazidə 21 şam ağacının kəsildiyi müəyyən edilib. Faktla bağlı akt tərtib olunub. Məsələyə hüquqi qiymətin verilməsi üçün toplanmış materiallar Azərbaycan Respublikası Baş Prokurorluğuna göndərilib”.
Flora Hacıyeva: “Qanunsuz ağac kəsənlər cinayət məsuliyyətinə cəlb olunmalıdır”
Ekoloq Flora Hacıyeva bildirdi ki, ağacları kəsməklə insanların ömrünü azaldırlar. Cərimələr isə azdır. Təbiəti oksigenlə təmin edən bir ağacın qiyməti ən azı 50-100 min arasında dəyişir. Kəsilən ağacların sayı 20-dən çoxdursa, bu neçə milyon ziyan deməkdir: “İnsanların sıx məskunlaşdığı ərazilərdə qanunsuz ağac kəsənlər cinayət məsuliyyətinə cəlb olunmalıdır. Bakının mərkəzində, ekoloji vəziyyətin yaxşı olmadığı yerdə qanunsuz ağac kəsənlərə qarşı qanunlar sərtləşdirilməlidir. Bakının iqlimini nəzərə alsaq, ağacları boya-başa çatdırmaq uzun zaman və böyük zəhmət tələb edir. Prezident İlham Əliyev yeni-yeni parklar saldırır. Bu, insanların istirahətinin təşkili və şəhərin ekoloji vəziyyətinin tarazlanması üçündür. Belə olan halda ağac kəsən şəxslər dövlət başçısının siyasətinə zidd gedirlər. Onlara qarşı ciddi tədbirlər görülməlidir”.
Günel CƏLİLOVA
