İkinci Qarabağ müharibəsində çox ürəyi sevdalı, polad biləkli igidimiz Vətən naminə şəhid olmağı özünə şərəf bildi. Elə bunun nəticəsi idi ki, Odlar yurdu Azərbaycana məxsus 30 il əsir torpaqlar 44 günə şanlı ordumuz tərəfindən azad edildi. Masallının Oncakələ kəndində dünyaya göz açan Nurlan Dünyamalı oğlu Malikov da qanı ilə torpağı Vətən edənləri arasında idi. 24 bahar yaşayan Nurlan qısa, lakin şərəfli ömrünü şəhidliklə başa vurdu. Bununla özünə əbədi ölməzlik qazandırdı, həm də el-obasına baş ucalığı gətirməklə xalqına ürək dolu sevgi bəxş etdi. Beləcə adı tarixin qəhrəmanlıq salnaməsinə qızıl hərflərlə həkk olunan Masallının igid oğlu üstəlik ölkə başçısının sərəncamı ilə “Vətən uğrunda”, “İgidliyə görə”, “Qubadlının azad olunmasına görə” medallarına layiq görüldü.
Bəli, Nurlan yetkinlik yaşına çatanda Vətəninə daha çox bağlanır. Odur ki, ermənilərin Qarabağa təcavüzü ona ağır gəlir. Və 2014-cü ildə həqiqi hərbi xidmətə yola düşəndə məqamı gələn kimi hər qarış torpağın qisasını yağıdan almağa and içir. Nurlanın əsgərliyi Tərtər rayonunda keçir. Vətənini canından üstün tutmaqla onun keşiyində vicdanla, qeyrətlə durur, murdar niyyətli dığalara qarşı amansız olur. Bu da ona zabitlərin, əsgərlərin arasında böyük hörmət qazandırır.
2016-cı ildə xidmətini başa vurub Masallıya qayıdır. Gözəl əməllərlə el-obasını sevindirsə də, onun bütün fikri düşməndən alacağı qisas günündə olur. Nəhayət, arzuladığı gün gəlir. Əsir torpaqların azad olunması uğrunda başlanan İkinci Qarabağ müharibəsinə könüllü yollanır. Ön cəbhədə düşmənlə neçə-neçə ölüm-dirim savaşından zəfərlə çıxır. Füzuli, Qubadlı rayonlarında yüksək rəşadət, şücaət göstərərək düşmənin çoxlu sayda canlı qüvvəsini məhv edir. Özü şəhid olsa da, yaşına uyuşmayan qəhrəmanlığı Nurlanın Vətən sevgisini heç zaman unudulmayan dastana döndərir. Bu gün onunla təkcə ailəsi deyil, bütün Azərbaycan xalqı fəxr edir. Qərinələr keçəcək, Masallının qəhrəman oğlu həmişə ehtiramla xatırlanacaq. Çünki o, öz ömrünü Vətəninə qurban verdi...
Zəfər ORUCOĞLU Azərbaycan Jurnalistlər Birliyinin üzvü
