İkinci Qarabağ müharibəsi veteranlarına aylıq 80 manat Prezident təqaüdü veriləcək. Bu barədə Əmək və Əhalinin Sosial Müdafiəsi Nazirliyindən məlumat verilib.
Bildirilib ki, Prezident, Müzəffər Ali Baş Komandan İlham Əliyevin rəhbərliyi ilə Ordumuzun möhtəşəm Zəfərlə başa vurduğu Vətən müharibəsinin iştirakçılarına yüksək qayğı olaraq dövlət başçısının yeni Sərəncamı ilə onlara yeni ildən “Müharibə veteranı” adı və “Azərbaycan Respublikasının Müharibə Veteranı” vəsiqəsi veriləcək. Aidiyyəti qurumlar tərəfindən bu status verildikdən sonra Əmək və Əhalinin Sosial Müdafiəsi Nazirliyi tərəfindən onlara proaktiv qaydada Prezidentin aylıq təqaüdü təyin ediləcək.
Ölkəmizdə başlanan yeni sosial islahatlar paketi çərçivəsində reallaşan bu tədbir Vətən müharibəsinin iştirakçılarına dəstək məqsədi daşıyır.
“Müharibə veteranı” adı və vəsiqəsi 2020-ci il sentyabrın 27-dən noyabrın 10-dək olan dövr ərzində Azərbaycan Respublikasının ərazi bütövlüyü uğrunda döyüş əməliyyatlarında iştirak etmiş şəxslərə veriləcək. Həmin şəxslərin siyahısı xidmət keçdikləri aidiyyatı qurumlar tərəfindən müəyyən ediləcək və Azərbaycan Respublikasının Nazirlər Kabineti ilə razılaşdırılacaq.
Sərəncama əsasən, aidiyyəti qurumlar razılaşdırılmış siyahı nəzərə alınmaqla “Müharibə veteranı” adı və vəsiqəsini verəcək, həmin şəxslər haqqında məlumatları Əmək və Əhalinin Sosial Müdafiəsi Nazirliyinin “Zəfər” altsisteminə daxil edəcək.
Nazirlik “Müharibə veteranı” adı və vəsiqəsi verilmiş və “Zəfər” altsisteminə daxil edilmiş şəxslərə 2022-ci il 1 yanvarından Azərbaycan Respublikası Prezidentinin aylıq təqaüdünü (80 manat) təyin edəcək.
Əslində bu, müharibə iştirakçılarının çoxdan gözlədiyi bir Sərəncam idi. Çünki müharibə iştirakçılarının statusu indiyə kimi tam müəyyənləşməmişdi. Sərəncamla bağlı fikirlərini “Bakı-Xəbər”lə bölüşən müharibə iştirakçısı “Vətən Müharibəsi İştirakçılarının Hüquqlarının Müdafiəsi” İctimai Birliyinin sədri Nahid Salayevin sözlərinə görə, bu hamının gözlədiyi bir Sərəncamdır: “Müharibə iştirakçıları üçün ciddi əhəmiyyət daşıyır. Hamının səbirdizliklə gözlədiyi bir qərar oldu. Yalnız maddi deyil, daha çox mənəvi tərəfləri var. Bununla çox böyük sayda insanın statusu təsdiqlənmiş oldu. Bu da bizim üçün böyük bir mənəvi güc verir. Biz də öz növbəmizdə müharibə iştirakçıları ilə bağlı olan təşkilat kimi bu sərəncamı alqışlayırıq. Ali Baş Komandana təşəkkürümüzü bildiririk. İnanırıq ki, bundan sonra daha böyük zəfərlərə və qalibiyyətlərə imza atacağıq. Müharibədən sonra qazi və şəhidlərin statusu müəyyənləşdi, ancaq müharibə iştirakçıları ilə bağlı vəziyyət qeyri-müəyyən olaraq qalırdı. Bu, həm də deyilən kateqoriyadan olan adamlar üçün güzəştlərin müəyyənləşməsinə yardım edəcək. Sərəncamda deyilir ki, məlumatlar bir həftə ərzində “Zəfər” altsisteminə yerləşdirilməlidir. Deyilən kateqoriyaya aid insanlara ediləcək güzəştlərin hüquqi bazası yaranmış oldu. Bu bizə həm maddi, həm də böyük mənəvi dəstək vermiş oldu. Əminəm ki, bundan sonra müharibə iştirakçıları ilə bağlı bizi sevindirəcək yeni-yeni qanun layihələri təsdiqlənmiş olacaq”.
Məhəmmədəli QƏRİBLİ
