Bakıda MTK-lar yaşayış binalarında parklamanın qiymətini artırmaqda davam edir. Demək olar ki, şəhərimizin çox yerində “novostroyka”larda parklanmanın qiyməti qaldırılıb. Elə MTK var ki, qiyməti yarıbayarı qaldırıb, eləsi də var bir az. Problem odur ki, sakinlərin nə sözünü, nə də narazılığını eşidən var.
Bakı şəhəri Yasamal rayonu H.B.Zərdabi 92 a ünvanında yerləşən yaşayış kompleksinin sakinləri “Bakı-Xəbər”ə üzləşdikləri problemlə bağlı müraciət ediblər. Sakinlərin yazdığına görə, “ASP” MTK (ticarət nişanı Melissa Group) tərəfindən idarə olunan Bakı şəhər Yasamal rayonu H.B.Zərdabi 92 a ünvanında yerləşən yaşayış kompleksinin qarajında “01.01.2022 tarixindən etibarən standart parkinq yerləri üçün aylıq ödəniş 75 manatdan başlayacaqdır” məzmunlu elan yerləşdirilib.
“Belə qiymət artımı cənab Prezidentin apardığı sosialyönümlü iqtisadi siyasətə daban-dabana ziddir”
Sakinlər qeyd edirlər ki, hazırda aylıq ödəniş 50 manat təşkil edir, amma MTK 2022-ci ilin ilk günündən ödənişi qaldırır: “Göründüyü kimi, 2022-ci il yanvar ayının 1-dən aylıq ödəniş fövqəladə şəkildə 50% artırılır. Belə qiymət artımı cənab Prezidentin apardığı sosialyönümlü iqtisadi siyasətə daban-dabana ziddir. Binanın yerləşmə yeri alternativ parklanma yerlərini tamamilə istisna edir. Belə olan halda, müqavilə bağlamadan, ciddi hesabat blankı formasında rəsmi ödəniş sənədi vermədən, parklanma üçün alternativ olmadan qiymətin belə tərzdə maliyyə-iqtisadi əsaslandırma olmadan qaldırılması qiymətlərlə manipulyasiya və istehlakçı hüquqlarının hökmran mövqe tutan subyekt tərəfindən pozulmasıdır. Onu da qeyd edim ki, kommunal ödənişlərə görə mənzillərin hər bir kv.m üçün yığılan 0.30 AZN (bəzi bloklarda 0.50 AZN) pul vəsaiti üçün də heç bir ciddi hesabat blankı, kassa çeki və s. ödənişi təsdiq edən sənədlər təqdim edilmir”.
Bu barədə artıq Dövlət Vergi Xidmətinə müraciət etdiklərini qeyd edən sakinlərin bildirdiyinə görə, bina sakinlərinin bir çoxu 10 ildən çox müddətdir burda yaşayır və bu müddət ərazində hər zaman nağd ödəniş tələb olunub. Kompleksdə 1200-ə yaxın mənzilin (təqribən 80% dolumluluq var) və 800-ə yaxın parkinq yerinin olmasını nəzərə alaraq, bu illər ərzində şirkətin vergi orqanlarından yayındırdığı vəsaiti hesablamaq çətin olmamalıdır”.
Sakinlər qeyd edirlər ki, şirkətin əsassız qiymət artımına etiraz edir, həmçinin nağd pul ödəməkdən imtina edirlər, bu məsələdə dövlət qurumlarından və KİV-dən dəstək istəyirlər.
Sakinlərin yazıdığına görə, qarajın texniki vəziyyəti də çox pisdir: “Sakinlər qarajla bağlı xidmət və texniki vəziyyətdən narazıdır. Çoxmənzilli binanın -1, -2 və -3 mərtəbələrini əhatə edən qaraj MTK tərəfindən şəxsi əmlak kimi idarə edilir, qaraj ərazisində müxtəlif təyinatlı obyektlər yerləşdirilib, qaraj ərazisinin bəzi hissələri arakəsmələrlə bağlanıb. Çoxmərtəbəli binaların yeraltı və yerüstü hissələrində yerləşən, yüzdən artıq avtomobil üçün dayanacağı olan qarajlar təhlükə potensiallı tikinti obyektləri sayılır. Qarajda anbar, iaşə və digər təsərrüfat məqsədli obyektlərin yerləşməsi və qarajın mövcud şəhərsalma və tikinti fəaliyyətinə dair qaydalar, standartlar, şərtlər, texniki normalar və texniki normativ hüquqi aktlara uyğun olub-olmaması bizi narahat edir. Şəhərsalma və tikinti qanunvericiliyinin tələblərinə əsaslanaraq hesab edirik ki, qarajın mövcud vəziyyəti prosessual inzibati icraat çərçivəsində araşdırılmalı, hüquqlarımın pozulmasına son qoyan inzibati akt qəbul edilməlidir. Odur ki, xahiş edirik; 1. Ərizə əsasında “İnzibati icraat haqqında” qanunla nəzərdə tutulmuş qaydada rəsmi inzibati icraat başlanılsın; 2. icraatda təmsilçiliyimiz və dinlənilmə hüququ tam və hərtərfli şəkildə təmin edilsin; 3. icraat çərçivəsində qarajın cari texniki vəziyyəti qanunvericiliyə uyğunluq baxımından ətraflı monitorinq edilsin, uyğunluğa dair bütün sənədlər “ASP” MTK-dan (ticarət nişanı Melissa Group) tələb edilsin, qarajın hüquqi statusuna aydınlıq gətirilsin; 4. icraatın yekununda qarajın mövcud vəziyyətinə hüquqi qiymət verilməklə müvafiq ciddi prosessual formada inzibati akt – əsaslandırılmış qərar qəbul edilsin, “ASP” MTK tərəfindən sakinlərin hüquqlarının pozulmasının qarşısının alınması üçün konkret tələblərin nəzərdə tutulduğu icrası məcburi göstəriş verilsin”- deyə Bakı şəhər Yasamal rayonu H.B.Zərdabi 92 a ünvanında yerləşən yaşayış kompleksinin sakinləri bildirir.
Sakinləri narahat edən bu halla bağlı “Melissa Group” saytında verilən telefon (05024039-39) nömrəsinə bir neçə dəfə zəng etsək də, əlaqə saxlamağımız mümkün olmadı. Əlaqə saxlayarlarsa “Melissa Group”un da mövqeyini dərc edərik.
İradə SARIYEVA
