Artıq illərdir ki, tıxac məsələsi Bakının əsas problemlərindən birinə çevrilib. Bu sıxlıq yalnız şəhərin mərkəzində və pik saatlarda deyil, hətta şəhərin istənilən yerində, istənilən saatında yaranır. Dəfələrlə bu barədə mətbuatda, sosial şəbəkələrdə yazılıb müzakirələr aparılsa da, dəyişən bir şey yoxdur. Hətta şəhərin hansısa bir yolunda qəza baş verərsə, bu, demək olar ki, bütün yollardakı hərəkətə təsir edir, sıxlıq yaradır. Buna səbəb olan bir neçə amildən biri də yollarda maneələr yaradan yük avtomobilləridir.
Məlumat üçün bildirək ki, Bakıda çəkisi 5 tondan çox olan yük avtomobillərinin gündüz vaxtı hərəkətinə məhdudiyyət qoyulub. Belə ki, səhər saat səkkizdən axşam səkkizə kimi paytaxt yollarında yük avtomobillərinin hərəkəti qadağan olunsa da, şəhərdə belə nəqliyyat vasitələrinə rast gəlmək olur.
Bu səbəbdən də ekspertlər yük avtomobillərinin qadağa saatlarında şəhərə daxil olmasına nəzarətin gücləndirilməsini dəstəkləyirlər. Mütəxəssislər nəzarət tədbirlərinin gücləndirilməsinin, eləcə də cərimələrin tətbiqinin həm paytaxt yollarında tıxacın, həmçinin də yol infrastrukturunun sıradan çıxmasının qarşısını almağa effektiv təsir göstərəcəyini söyləyir.
“Gündüz saatlarında da şəhərin hərəkətin sıx olduğu küçələrində ağır tonnajlı avtomobillərin hərəkətinin şahidi oluruq”
Nəqliyyat məsələləri üzrə eksper Ərşad Hüseynov bildirdi ki, indiyədək yük avtomobillərinin bəzi istiqamətlərdən şəhərə girişinə məhdudiyyətlər olsa da, bunun qarşısını tam almaq mümkün olmayıb: “Bu məhdudiyyət 2007-ci ildən tətbiq edilib. Əsas məqsəd də, hərəkətin gur vaxtında tıxac probleminin qarşısını almaq idi. Bu qadağa bu gün də qüvvədədir. Amma biz gündüz saatlarında da şəhərin hərəkətin sıx olduğu küçələrində ağırtonnajlı avtomobillərin hərəkətinin şahidi oluruq. Burada maraqlı olan bir məsələ də odur ki, bu avtomobillərə şəhərə gündüz saatlarında kimlər və hansı əsaslarla buraxılışlar verir? Axı, gündüz vaxtı hərəkətin gur vaxtlarında şəhərin xeyli küçələrində sıxlıq müşahidə olunur. Ağır yük avtomobilləri isə bu tıxacı daha da artırır”.
Ə.Hüseynov deyir ki, bu qərar ağır yük avtomobillərinin ölçüləri, manevr imkanları nəzərə alınaraq verilib: “Elə ağırtonnajlı avtomobil var ki, onun yolda tutduğu sahəyə 10 minik avtomobili yerləşər. Ona görə də, belə ağırtonnajlı avtomobillər şəhərdə gündüz saatlarında hərəkət edəndə sıxlıq birə-beş artır. Bəzən də görürsən belə ağırtonnajlı avtomobillərin dönmə əməliyyatına yol verdiyi qayda pozuntusu bütün yolda hərəkəti iflic vəziyyətə salır”.
Günel CƏLİLOVA
