İkinci Qarabağ müharibəsində Azərbaycan Ordusunun şanlı qələbəsində lənkəranlı gənclər də yüksək əsgəri rəşadət və igidlik göstəriblər. Vətən və torpaq uğrunda özünü fəda edən belə igidlərdən biri də rayonun ən ucqar yaşayış məntəqəsi olan Daşdatük kəndində böyüyüb boya-başa çatmış Ülfət Qabil oğlu Babazadə olub.
2019-cu ildən Xüsusi Təyinatlı Qüvvələrdə müddətdən artıq xidmət etmiş Ülfət haqq savaşımızın ilk günündən azğın düşmənə qarşı qanlı döyüşlərdə hünər göstərir. Füzulinin, Cəbrayılın, Zəngilanın, Qubadlının və Şuşanın azad olmasında cəsur əsgər erməni dığalarına vurduğu sarsıdıcı zərbələrlə sözün əsl mənasında tarix yazır. Vətən sevdalısı müharibənin bitməsinə 6 saat qalmış Şuşa şəhərinin yaxınlığında qəhrəmancasına şəhidlik zirvəsinə yüksəlir. Və bu şərəfli ölüm Ülfəti böyük bir xalqın fəxr, qürur yerinə döndərir. Lənkəran elinin qəhrəman oğlu həm də dövlət başçısının müvafiq sərəncamına əsasən ölümündən sonra "Vətən uğrunda", "Cəsur döyüşçü", Füzulinin Cəbrayılın, Zəngilanın, Qubadlının, Şuşanın azad olunmasına görə medallara layiq görülür.
Bu günlərdə şəhid Ülvi Babazadənin doğma kəndinin mənzərəli təbiət guşəsində xatirəsinə bulaq və abidə kompleksinin qurulduğu parkın açılışı oldu. Açılış mərasiminə gələnlər- Lənkəran Şəhər İcra Hakimiyyətinin başçısı Taleh Qaraşov, İcra aparatının rəsmiləri, şəhid anaları və valideynləri, Qarabağ müharibəsinin qəhrəmanları, kənd ictimaiyyəti, şəhidin döyüş yoldaşları abidə-kompleksinin önünə tər çiçəklər düzdülər və şəhidlərin ruhlarını bir dəqiqəlik sükutla yad etdilər.
İcra başçısı mərasimdə söz alıb dedi: - 44 günlük Vətən müharibəsində Azərbaycan Ordusunun əsgər və zabitləri Prezident, Ali Baş Komandan İlham Əliyevin rəhbərliyi altında misilsiz şücaət göstərib Vətən torpaqlarını işğaldan azad etməklə şərəfli bir tarix yazdılar. Onların xidmətləri dövlətimiz və xalqımız tərəfindən daim yüksək tutulur. Lənkəran camaatı hər zaman 30 il düşmən tapdağında qalan əzəli yurd yerimiz Qarabağ torpaqların azad olmasında övladlarının, doğmalarının göstərdikləri əvəzsiz xidmətlərdən qürur duyurlar, böyük ehtiramla xatirələrini hər zaman uca saxlayırlar. Bizim Ülvi də qısa bir ömür yaşadı. Qaldı ki, Vətən, torpaq yolunda canından keçdiyi üçün əbədi parlaq günəşə dönərək həyatda ölməzlik qazandı.
Şəhidin atası Qabil kişi, eləcə digər natiqlər isə öz çıxışlarında bütün bu diqqət və əvəzsiz qayğılara görə ölkə başçısı İlham Əliyevə Birinci vitse-prezident Mehriban xanım Əliyevaya təşəkkür dolu səmimi minnətdarlıq etdilər.
Sonra məktəblilərin ifasında şəhidlərə, Vətənə həsr olunmuş şerlər səsləndi, qonaqlar və mərasim iştirakçıları şəhid bulağından su içdilər.
Zəfər ORUCOĞLU Azərbaycan Jurnalistlər Birliyinin üzvü
