Hərdən Milli Məclisin tribunasından deputatların səsləndiridiyi bəzi təklif və fikirlərə nəzər salanda adamın ya gülməyi, ya da ağlamağı gəlir. Bəzi millət vəkilləri, sanki adı təklif səsləndirən kimi hallansın deyə, ağlına gələn fikri səsləndirir və sonra ictimai qınağı görəndə fikrinin təhrif edildiyini bildirir.
Gəlin, bugünlərdə parlamentdəki müzakirə zamanı deputat Aqil Abbasın Gənclər və İdman Nazirliyinə etdiyi müraciətin mahiyyətinə diqqət edək. O, müraciətində tələbə-inşaat dəstələrinin yenidən bərpa olunmasını təklif edib. Fikrini də belə izah edir ki, hazırda azad olunmuş ərazilərdə çox böyük quruculuq işləri aparılır, ancaq işçi qüvvəsi çatmır: “Ağdamda da hazırda bu proses davam edir. Tələbə-inşaat dəstələri yenidən bərpa olunsa, bu, 10 minə qədər işçi qüvvəsi deməkdir.
Gənclər və İdman Nazirliyindən xahiş edirəm ki, bunu formalaşdırsın. Bu, könüllülük prinsipidir, amma tələbələr hamısı gedəcək. Bu, Qarabağ üçün çox vacibdir, işçi tapılmır. Verdikləri maaş da maaş deyil. Tələbə isə 300-400 manata Qarabağda gedib işləyəcək. Necə ki, ölümə gənclər getdilər. Belədə pulsuz da işləyə bilərlər”.
Doğrudanmı quruculuq işlərində işçi qüvvəsi çatışmır və bunu kompensasiya etmək üçün biz ora tələbələri çəlb etməliyik?
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, bu tamamilə yersiz və məntiqə əsaslanmayan təklifdir: “ Biz niyə irəliyə yox, geriyə addım atmaq istəyirik? Sovet dövründə planlı iqtisadiyyat vardı. Ona görə də, tələbənin də əməyindən qul əməyi kimi istifadə edilirdi. Bəli, həmin vaxt tələbələr belə işlərə cəlb edilirdi. Ancaq könüllü deyil, zorla. Yaxşı olar ki, təklifi irəli sürən deputat araşdırsın görək sovet dönəmində tələbələrə həmin işlərin müqabilində nə qədər əmək haqqı ödənilirdi? Çox cuzi. Bizdə hazırda işçi qüvvəsi var, iş azdır. İstəyirsə, fəhləlik üçün qapı-qapı iş axtaranların hamısını yönəldim Aqil Abbasa. Görüm, onların hamısını işlə təmin edə biləcəkmi? Həmin inşaat işlərini özəl şirkətlər görürsə, niyə az əmək haqqı verməlidir? Azərbaycanın gələcəyi olan tələbələri biz xarici ölkələrə təhsil almağa göndərmək əvəzinə, onları fəhlə işlətməliyik? Yaxşı olardı ki, deputatlar xalqın vəziyyəti ilə yaxından tanış olsunlar. Bu gün adi fəhlə işini axtarıb tapa bilməyən bilirsiniz nə qədər adam var? Əgər işçi çatışmırsa, həmin vakansiyaları elan etsinlər, görək vəziyyət necədir. Sizi əmin edirəm ki, işlə bağlı elan olunan vakansiyalar tez bir zamanda dolar”.
Məhəmmədəli QƏRİBLİ
