COVID-19-a yoluxan tələbələri bu gün ən çox narahat edən məsələlərdən biri semestr imtahanlarını hansı qaydada verəcəkləridir. Bir çox tələbələr narahatdır ki, imtahan məsələsində hər hansı bir problemlə qarşılaşa bilərlər. Bu barədə tələbələrin ciddi narahatlıqları var. Onlar bilmir ki, imtahan qaydaları hansı şəkildə olacaq. Ustəlik də, nə qədər dərs buraxıblar və bu faktor da onları bu barədə düşünməyə vadar edir.
COVID-19-a yoluxan tələbələr imtahanı hansı qaydada verəcək? Onların narahatlığına əsas varmı?
“...Güzəştlər nəzərdən keçirilməlidir...”
Tanınmış təhsil eksperti Kamran Əsədov “Bakı-Xəbər”ə bildirdi ki, Azərbaycanda 29 sentyabrdan etibarən ali və orta ixtisas məktəblərində tədris prosesi bərpa edilib. “Təbii ki, bu zaman da ortaya bir neçə ciddi problem çıxması gözlənirdi. Bunlar arasında ən ciddi problem, sözsüz ki, tədris prosesində yoluxma müşahidə edilən qrupların distant təhsilə keçməsi ilə bağlı idi. Qruplar 14 gün müddətində distanta keçirdilərsə, bəzi hallarda burada onlayn tədrisi təşkil etmək mümkün olmurdu. Çünki dərsi aparan müəllim başqa bir qrupda əyani dərsdə olurdu. Hazırda isə dekabr ayı başa çatır və yanvar ayında payız imtahan sesiyasının qiymətləndirilməsi həyata keçiriləcək. Yəni semestr imtahanları başlayır. Burda müəyyən problemlər var. Biz bilirik ki, COVID-19 pandemiyası başqa ölkələrdə də davam edir, yoluxanlar var və onların arasında tələbələr də yox deyil. Bir sıra səbəblərdən tələbələr dərsdə iştirak edə bilmir. O səbəblərdən biri də, təbii ki, koronavirusa yoluxma hallardır ki, tələbələr 14 gün müddətində tələbələr dərsdə iştirak edə bilmir. Çox təəssüflər olsun ki, 14 gün dərsdə iştirak etməmək onlara “üzrsüz” kimi sayılır və üzrlü səbəb kimi nəzərə alınmır. Bu birinci problemdir. İkincisi, tələbələrin biliklərinin qiymətləndirilməsi ilə bağlı məsələdir. Belə ki, hazırda imtahan sessiyası zamanı yoluxma hallarının olacağı qaçılmazdır. Yəni tələbələr arasında yoluxma müşahidə edilərsə, həmin şəxslərin imtahanlarda iştirakı, təbii ki, məhdudlaşdırılmalıdır”.
K.Əsədovun fikrincə, amma nəzərə alsaq ki, karantin müddəti ən azı 14 gündür və bu da həmin tələblərin bir neçə semestr imtahanında iştirak etməməsi ilə nəticələnə bilər. “Hesab edirəm ki, bu problemin aradan qaldırılması üçün mütləq şəkildə koronavirusa yoluxmuş və rəsmi qaydada qeydə alınmış şəxslərin onlayn imtahanlarda iştirakı təşkil edilməlidir. Çünki biz üç semestr imtahanları onlayn qaydada təşkil eymişik, Azərbaycanın bu sahədə təcrübəsi var. Fikrimcə, hansı qruplarda, yaxud fakültə və ixtisaslarda yoluxma halları müşahidə edilərsə və bu səbəbdən tələbələrin imtahanda iştirakı məhdudlaşarsa, bu zaman həmin tələbələr imtahanlarda yalnız onlayn qaydada iştirak etməlidirlər, buna şərait yaradılmalıdır. Bu, mövcud problemin aradan qalxması üçün yeganə çıxış yolu hesab oluna bilər, mövcud problem başqa formada həll edilə bilməz. Çunki əgər həmin tələbələr tədris prosesində iştirak edərlərsə, bu digər tələbələrin də yoluxmasına səbəb olar. Umumilikdə pandemiya dövründə tədrisin təşkili çox çətinliklə həyata keçir. Qruplarda yoluxmalar var və tələbələrin pandemiya səbəbindən iştirak etmədiyi dərslərdən də sualların duşmə ehtimalı var. Yoluxmuş tələbələr var ki, semestr ərzində həmin mövzunu keçməyiblər, amma onlardan təbii ki, suallar olacaq. Hesab edirəm ki, bu ciddi amili ali təhsil müəssisələrinin nəzərə alması lazımdı. Tələbələrin biliklərinin qiymətləndirilməsi zamanı güzəştlər nəzərdən keçirilməlidir”- deyə K.Əsədov qeyd etdi.
Qeyd edək ki, Təhsil Nazirliyi koronavirusa yoluxan tələbələrin imtahanlara hansı qaydada cəlb olunacağı məsələsinə aydınlıq gətirib. Nazirlikdən Trend-ə bildirilib ki, bu, "Ali təhsil müəssisələrinin bakalavriat və magistratura səviyyələrində, əsas (baza ali) tibb təhsilində və Azərbaycan Milli Elmlər Akademiyasının magistratura səviyyəsində kredit sistemi ilə tədrisin təşkili" qaydalarında əksini tapıb.
Belə ki, üzrlü səbəbdən imtahanda iştirak etməyən tələbə növbəti semestrin dərsləri başlanana qədər imtahanda iştirak etdikdə, həmin fənn üzrə təkrar imtahan üçün ödəniş etmir.
İradə SARIYEVA
