65 yaşa çatmış müəllimlərin pensiyaya çıxması zaman-zaman müzakirələrə səbəb olur. Müşahidələr göstərir ki, təqaüd yaşlı müəllimlər pensiyaya çıxmağa həvəsli olmur, qalıb işləmək istəyirlər. Bəzən belə hallar mübahisələrə, məhkəmə çəkişmələrinə də səbəb olur. Bu da səbəbsiz deyil, müəllimləri alacaqları təqaüd qane etmir.
Digər tərəfdən, əksər hallarda uzun illərin müəllimi olmuş yaşlı pedaqoqlar pensiyaya elə yola salınır ki... Nə təltif olunur, nə də onlar üçün adicə bir yola salma tədbiri keçirilir. Ya da 40 il pedaqoq kimi çalışmış şəxslərə təyin edilən pensiya məbləği normadan az olur. Növbəti belə bir hal Ağdaş rayon sakini Gülşən Əfəndiyevanın başına gəlib. G.Əfəndiyeva 47 il müəllim işləyib, lakin pensiyası düzgün hesablanmayıb.
Ağdaş rayonunun 70 yaşlı sakini Gülşən Əfəndiyevanın əmək müqaviləsinə 2017-ci ildə yaş həddinə görə xitam verilib. İbtidai sinif müəlliməsi işləmiş Gülşən Əfəndiyeva pensiya almaq üçün sənədlərini Dövlət Sosial Müdafiə Fondunun Ağdaş rayon şöbəsinə təqdim edib. Hazırda 370 manat pensiya alan müəllimənin iddiasına görə, pensiya təyin olunarkən ona düşən məbləğin 55 manatı kəsilib. Şikayətçinin sözlərinə görə, dörd ildir ki, dəfələrlə rayon Təhsil Şöbəsinə və Dövlət Sosial Müdafiə Fondunun yerli şöbəsinə müraciət edir. Ancaq probemini həll edən yoxdur.
Ağdaş rayon təhsil şöbəsi: “47 il müəllim işləmiş Gülşən Əfəndiyevanın qarşılaşdığı problemdən xəbərdarıq”
Məsələ ilə bağlı Ağdaş rayon Təhsil Şöbəsindən bildirildi ki, onlar Gülşən Əfəndiyevanın qarşılaşdığı problemdən xəbərdardırlar. Artıq bununla bağlı digər aidiyyəti qurumlara müraciət olunub. Yaxın vaxtlarda sözügedən məsələ öz həllini tapacaq.
Hüseyn Axundov: “Pensiyaların hesablanması proaktiv qaydada həyata keçirilir”
Hüquqşunas Hüseyn Axundov qeyd etdi ki, pensiyaların hesablanması proaktiv qaydada həyata keçirilir. Burada 25 il sığorta stajı götürülür və bəzən vətəndaşın sığorta stajı daha çox olur. Vətəndaş yenidən stajı təsdiq edən sənədləri təqdim edir və yenidən hesablanma aparılır. Digər tərəfdən, vətəndaşın stajı 25 ildən artıqdırsa, o hissə də əlavə olaraq hesablanır və üzərinə əlavə edilir.
Günel CƏLİLOVA
