Bu ilin ortalarında sosial şəbəkələrdə şantajçı bir dəstənin fəaliyyət göstərdiyinə dair ilk həyəcan təbilini çalan biz olduq. Jurnalist araşdırmamız nəticəsində cəmiyyəti məlumatlandırdıq ki, sosial şəbəkələrin ölkəmizə aid seqmentində kökləri xarici ölkələrə kimi gedib çıxan bir şantajçı cinayətkar şəbəkə fəaliyyət göstərir.
Həmin vaxt məlumat verdik ki, çox yaraşıqlı qızların fotosu ilə olan profillərdən adamlara yazıb, tanış olmaq istədiklərini bildirirlər. Sonra həmin adamlara videogörüntülü danışmaq təklif edilirdi. Bunun da nəticəsində xüsusi proqramda güya qızın soyunduğu görüntüsü canlanırdı. Bu da qarşı tərəfi müxtəlif seksual hərəkətlər etməyə sövq edirdi. Nəticədə seçilən “qurban”ın bütün görüntüləri ekran çəkilişi vasitəsilə qeydə alınırdı. Sonra həmin adama göndərilərək ondan pul tələb olunurdu. Şantaja boyun əyməyənlərin görüntüləri bütün sosial şəbəkələrdə paylaşılırdı. Ən maraqlısı isə budur ki, belə “qurban”lar kimi ölkədə kifayət qədər nüfuza sahib, tanınan insanlar seçilirdi. Məsələn, hakim partiyanın Binəqədi Rayon Təşkilatının sədri Ramiz Göyüşov, Şərur rayonunun baş axundu, kənd təsərrüfatı üzrə ekspert Nicat Qasımlı və başqa tanınmış şəxslər həmin şəbəkənin şantajının qurbanı olublar. Çox sevindirici haldır ki, DTX bu beynəlxalq cinayətkar şəbəkənin izinə düşüb, həmin şəbəkənin xaricə uzanan qollarını belə zərərsizləşdirməyi bacarıb.
Bildirilir ki, 2021-ci il ərzində Azərbaycan Respublikası vətəndaşlarının intim videogörüntüləri ilə şantaj edilmələri, belə videomaterialların müxtəlif sosial şəbəkələr vasitəsilə yayılmasının təşkil edilməsi barədə daxil olmuş məlumatlar Dövlət Təhlükəsizliyi Xidməti (DTX) tərəfindən araşdırılıb.
Faktlarla bağlı DTX-nin İstintaq baş idarəsində Azərbaycan Respublikası Cinayət Məcəlləsinin 182.3.1, 182.3.2 (mütəşəkkil dəstə tərəfindən zərərçəkmiş şəxslər və onların yaxın qohumları haqqında rüsvayedici məlumatlar yayma hədəsi ilə külli miqdarda pul vəsaitlərinin tələb edilməsi), 272.2.1 və 272.2.2-ci (texniki vasitələrdən istifadə etməklə kompüter məlumatlarının təkrar ələ keçirilməsi) maddələri ilə başlanmış cinayət işi üzrə istintaq qrupu yaradılıb, kompleks istintaq-əməliyyat və əməliyyat-texniki tədbirləri həyata keçirilib.
Müəyyən edilib ki, mütəşəkkil dəstə üzvləri “Facebook” sosial şəbəkəsində yaratdıqları saxta hesablar vasitəsilə müxtəlif Azərbaycan Respublikasının vətəndaşlarına məxsus hesablara videogörüntülü zənglər edərək intim xarakterli davranışlara sövq etməyə yönələn hərəkətlər edib, texniki vasitələrdən istifadə edilməklə xüsusi proqram təminatları ilə zəng edən və zəng qəbul edən tərəflərin qarşılıqlı əks olunduğu ekran pəncərəsinin videoçəkilişini həyata keçirib, “Facebook Messenger” və “WhatsApp” tətbiqləri vasitəsilə həmin vətəndaşlarla əlaqə yaradıb onların və yaxın qohumlarının barəsində rüsvayedici materialları nümayiş etdirib yayma hədəsi ilə külli miqdarda pul vəsaitləri tələb edərək beynəlxalq pul köçürmə sistemləri vasitəsilə çoxsaylı hesablara göndərilməsini təmin ediblər.
Genişmiqyaslı araşdırma tədbirləri ilə ölkə hüdudlarından kənarda olan cinayətkar şəbəkə üzvlərinin istifadəsində olan cihazların internet şəbəkəsinə qoşulduğu İP-ünvanları və digər abunəçi məlumatları əldə edilib, kibercinayətkarlığa dair beynəlxalq konvensiyaların müddəalarına istinadən həmin İP-ünvanları üzrə məlumatların müvafiq dövlətlərin aidiyyəti strukturları vasitəsilə təxirəsalınmaz mühafizəsi təmin edilib, cinayətkar şəbəkəyə daxil olan 32 nəfərin şəxsiyyəti təsbit edilərək texniki izlər və pul köçürmələri əsasında davam edən cinayət əməllərindən 200 nəfərdən artıq Azərbaycan Respublikası vətəndaşının zərər çəkdiyi məlum olub.
Cinayət işi üzrə beynəlxalq hüquqi yardım prosedurları çərçivəsində cinayət əməllərinin təşkilatçılarının Bolqarıstan Respublikasında məskunlaşdığı müəyyən edilərək Bolqarıstan Respublikasının hüquq-mühafizə orqanları ilə birgə həmin ölkənin Silistra əyalətində yerləşən ünvanlarda axtarış, dindirmə və digər intensiv istintaq hərəkətləri keçirilib. Cinayət əməllərinin təşkilatçıları, icraçıları və vasitəçiləri cinayət başında ifşa edilmiş, Azərbaycan və digər xarici ölkə vətəndaşlarının şantaj edildiyinə dəlalət edən videomateriallar, səsli mesajlar və yazışmaların olduğu çoxsaylı kompüter, mobil telefon və texniki avadanlıqlar götürülməklə DTX-də aparılan cinayət işi materiallarına əlavə edilib, çoxsaylı sosial şəbəkə hesablarındakı videomateriallara kənardan daxilolma imkanları məhdudlaşdırılmaqla davam edən cinayət əməllərinin qarşısı alınıb.
Cinayət əməlləri ifşa edilmiş xarici ölkə vətəndaşları Gyurdzhan Stoyanov, Tezdzhan Stoyanov, Sevinch Niyazi və digərləri təqsirləndirilən şəxs qismində cinayət məsuliyyətinə cəlb edilməklə, barələrində məhkəmə qərarı ilə həbs qətimkan tədbiri seçilib. Hazırda beynəlxalq hüquqi prosedur tədbirlər yerinə yetirilməkdədir.
Qeyd edək ki, bu şəbəkənin Azərbaycanda olan uzantılarının əməlinə bir müddət əvvəl ölkənin daxilində də hüquqi qiymət verilib.
Bir müddət əvvəl, rəsmi qurumların yaydığı bir məlumata diqqət edək: “Vəzifəli şəxsdən pul alan xəbər portalının rəhbəri cinayət başında yaxalanıb.
Müxtəlif qanunsuz üsullarla, o cümlədən sosial şəbəkə və informasiya resurslarından öz maraqları naminə istifadə etməklə vətəndaşların şərəf və ləyaqətini alçaldan hərəkətlərə yol verməklə qanunsuz gəlir əldə edən şəxslərin ifşa olunaraq məsuliyyətə cəlb olunmaları istiqamətində prokurorluq orqanları tərəfindən həyata keçirilən tədbirlər davam etdirilir.
Belə tədbirlərdən biri kimi “azadinfo.az” MMC-nin təsisçisi Ələkbərov Mahir Məmmədhəsən oğlunun qanunsuz hərəkətlərinin ifşa olunması istiqamətində Baş prokuror yanında Korrupsiyaya qarşı Mübarizə Baş İdarəsi tərəfindən təxirəsalınmaz əməliyyat-axtarış tədbirləri keçirilib.
Belə ki, Mahir Ələkbərov 8 sentyabr 2021-ci il tarixdə «azadinfo.az» xəbər paylaşım platformasında YAP-ın Binəqədi rayon təşkilatının sədri vəzifəsini icra edən Ramiz Göyüşovun barəsində qeyri-etik videogörüntülərin xəbər saytlarında yayacağını sonuncuya bildirərək görüşməyi təklif edib, Ramiz Göyüşov görüşə gəlmədikdə onu qəsdən hörmətdən salan rüsvayedici məlumatları video çarx formasında “azadinfo.az” xəbər portalında 8 sentyabr 2021-ci il tarixdə qəsdən yayıb, həmin məlumatların yayılmasının qarşısının alınması üçün sonuncunun özü ilə görüşməsinə nail olaraq, videogörüntülərin qeyd edilən səhifədən silinməsi məqsədilə 2 min manat məbləğində pulu alarkən cinayət başında yaxalanıb.
Qeyd edilənlərlə bağlı 9 sentyabr 2021-ci ildə Baş Prokurorluqda Cinayət Məcəlləsinin müvafiq maddəsi ilə cinayət işi başlanılmış və Mahir Ələkbərov şübhəli şəxs qismində tutulub.
Bizim üçün çox sevindirici haldır ki, ilk dəfə tərəfimizdən içtimailəşən bu məsələ ilə bağlı araşdırmalar öz müsbət nəticəsini verib. O vaxt da zənglərin məhz tanınan adamlara edilməsi şübhə doğururdu. Biz belə qənaətə gəlmişdik ki, bu şəbəkənin ölkəmizin daxilində də uzantıları var və lazımi adamların adı həmin dəstəyə buradan servis edilir. Hüquq-mühafizə orqanlarının keçirdikləri əməliyyat bu versiyanın doğrluğunu bir daha sübut etdi. Yəqin ki, istintaqın gedişində daha ciddi faktlar üzə çıxacaq.
Məhəmmədəli QƏRİBLİ
