Son günlər müşahidə olunan soyuq hava istilik probleminin yenidən gündəmə gəlməsinə səbəb olub. Şirvan şəhərində 9 mərtəbəli olmaqla 13 yaşayış binasından ibarət şəhərcikdə yaşayan şəhid ailələri və məcburi köçkünlər istiliklə sınağa çəkilib.
Zəngilan, Füzuli və Cəbrayıl rayonlarından olan 606 məcburi köçkün ailəsinin məskunlaşdığı Şirvandakı yaşayış kompleksinə bir aya yaxındır ki, istilik verilmir. Sakinlərin sözlərinə görə, ötən il belə problem olmayıb. Ölkə ərazisində noyabrın 15-dən istilik mövsümünə start verilsə də, onlar bundan məhrumdur. Sakinlər bildirir ki, soyuq evlərdə qalın paltarda otururlar. Məcbur qalıb mənzillərini elektrik sobaları ilə qızdırırlar.
Sakinlər onu da qeyd edir ki, problemdən müvafiq dövlət qurumlarının xəbəri var. Hətta onlara deyilib ki, şəhərcikdə olan yaşayış binaları, məktəb və bağça bu il istiliklə təmin olunmayacaq. Sakinlər etiraz əlaməti olaraq dekabrın 23-də avtomobil yolunu bağlayıblar.
Mənzil Kommunal Təsərrüfat Birliyi: “Sakinlərin 285 min manat borcu var, borc ödənildikdən sonra…”
Məsələ ilə bağlı Mənzil Kommunal Təsərrüfat Birliyindən bildirildi ki, sakinlərin 285 min manat borcu var. Borc ödənildikdən sonra istilik veriləcək.
Mayis Əliyev: “Soyuq qış günündə insanları borca görə istiliksiz qoymaq düzgün deyil, aidiyyəti qurumlar bu məsələ ilə bağlı sakinlərlə razılığa gəlməlidir”
Sosial sahə üzrə ekspert Mayis Əliyev qeyd etdi ki, hər il qış fəslində bu tip problemlər yaşanır: “Sakinlər istiliyin olmamasından, qurumlar isə borca görə istiliyin verilməməsindən giley edir. Evdə normal istilik olarsa, insanlar alternativ yolla istilik təmin etməzlər. İnsanlar istiliyi qazdan deyil, elektrikdən alırlar. Qış aylarında insanların xərclərinin çoxu istiliyə gedir. Qonşu ölkələrdə dövlətdən verilən istiliklə nəinki evlər, binaların blokları belə isidilir ki, insanlar üçün komfort olsun. Lakin bizdə evin bir otağı belə isinmir. İnsanlar da görür ki, bununla otaqları isitmək mümkün deyil, elektrikdən istifadə edir. Soyuq qış günündə insanları borca görə istiliksiz qoymaq düzgün deyil. Aidiyyəti qurumlar bu məsələ ilə bağlı sakinlərlə razılığa gəlməlidir”.
Günel CƏLİLOVA
