Heç kimə sirr deyil ki, Bakıya, onun sakinlərinə “ölüm üzlüyü” adı verilən penopalst yetərincə ziyan vurub. Bu materiala görə bir neçə dəfə güclü yanğın baş verdi. Onlarla insan faciəvi şəkildə həlak oldu. Bu hadisələrdən sonra bir neçə nəfər həbs edildi. Bundan sonra təcili qərar verildi, milyonlarla manat xərclənərək üzlənən binalardan penoplastlar təmizləndi.
Onların yerinə isə çəkisi daha ağır, yanğına davamlı material vuruldu. Beləcə köhnə, ömrünü başa vurmuş binalara “yeni bina” görüntüsü verildi. Ancaq istismar müddəti bitmiş binalara xüsusi üzlüklərin vurulması həmin yaşayış evlərində bir çox problemlər yaradır. Belə ki, köhnə binalara aqlay üzlük vurulduğu üçün binanın yükü artır və hətta binanın uçması da ehtimalı da yaranır.
Elnur Fərzəliyev: “Köhnə binaların üzü boyanır, üzlük vurulur, amma içərisi…”
Əmlak eskperti Elnur Fərzəliyev qeyd etdi ki, köhnə binaların üzü boyanır, üzlük vurulur, amma binaların içərisi bərbad vəziyyətdədir: “Bu gün baxsaq görərik ki, bir çox köhnə binalara üzlüklər vurulur. Köhnə binaların isə çox hissəsi istismar müddətini başa vurub. Hətta 100-dən artıq bina qəzalı kimi qeydiyyata alınıb. Bunlara hansısa formada daş aqlay üzlük vurularsa, binanın yükünü artırar və hətta binanın uçmasına kimi gətirib çıxara bilər. Amma vurulan üzlüklər tezalışan, çox qısa vaxt ərzində ovulub tökülən üzlüklərdir. Bu gün binaların xarici görünüşü ilə bərabər həm də içərisi təmir olunmalıdır. Bu xarici görünüş kimin üçünsə yaxşı görünə bilər, amma orada yaşayan vətəndaşların bir məmnuniyyəti yoxdur. Binaları bəzəməklə yox, əsaslı şəkildə işlər görməklə məşğul olunmalıdır. Bu binalar ya təmir olunmalı, ya da sökülməlidir. Bu gün təbii ki, hamısı sökülə bilməz. Ona görə də bu binaların hansısa formada dayanıqlılığını qoruyub saxlamaq lazımdır”.
Telman Zeynalov: “Bəzi binaların fasad hissələrində müəyyən qurğular yerləşdirilir və onların buraxdıqları elektromaqnit dalğaları da bina sakinlərinə …”
Ekoloq Telman Zeynalov bildirdi ki, üzlənmə prosesi zamanı bəzi məqamların nəzərə alınmaması nəticəsində binalardakı mənzillərə təbii işıq düşmür, hava daxil olmur və digər problemlər yaşanır: “Hətta bəzi binaların fasad hissələrində müəyyən qurğular yerləşdirilir və onların buraxdığı elektromaqnit dalğaları da bina sakinlərinə mənfi təsirini göstərir. Bundan əlavə, fasadlarda reklam plakatlarının vurulması hallarına da rast gəlinir. Ümumiyyətlə, bu proseslərin icra edilməsinə başlanmazdın əvvəl binalarda yaşayan sakinlərdən mütləq razılıq alınmalıdır. Əks halda baş verə biləcək neqativ hallara görə fasadlarda dediyim prosesləri reallaşdıran qurumlar məsuliyyət daşımalıdır”.
Günel CƏLİLOVA
