Ölkə Prezidentinin 20 dekabr tarixli sərəncamına əsasən, yerli icra hakimiyyəti orqanlarının (Bakı şəhəri üzrə Bakı Şəhər İcra Hakimiyyətinin, Gəncə şəhəri üzrə Gəncə Şəhər İcra Hakimiyyətinin) tabeliyində olan dövlət məktəbəqədər təhsil müəssisələri (uşaq evləri istisna olmaqla) Təhsil Nazirliyinin tabeliyinə verilib.
Xatırladaq ki, 2011-ci ilədək Azərbaycanda uşaq bağçaları Təhsil Nazirliyinin tabeliyində olub. Həmin il bağçalar yerli icra hakimiyyəti orqanlarının tabeliyinə verilmişdi. Danılmaz faktdır ki, bu müddət ərzində məktəbəqədər təhsil müəssisələri ilə bağlı çoxlu sayda problemlər yaşanırdı. Həmin problemlərdən biri də bağçalara uşaqların rahat oynaması, hava alması üçün ayrılmış həyətyanı torpaq sahələrin satılması, burada ticarət obyektlərinin tikilməsi və icarəyə verilməsidir. Hətta elə bağçalar var ki, az qalırlar binanı da hansısa formada icarəyə versinlər.
Maraqlıdır, satılan, icarəyə verilən bağça əraziləri və binalarla bağlı gələcəkdə hansı tədbirlər görüləcək?
Kamran Əsədov: “Bağçalar bəzi hallarda icra hakimiyyətləri tərəfindən özəlləşdirildi, təmir adı ilə söküldü və yerində binalar, şadlıq evləri, restoranlar tikildi”
Təhsil eksperti Kamran Əsədov bildirdi ki, məktəbəqədər təhsil müəssisələrinin, uşaq bağçalarının və körpələr evlərinin 2011-ci ildə nazirliyin tabeliyindən çıxarılmasının səbəbi o idi ki, bağçaların maddi-texniki bazası, eyni zamanda təmir-tikinti bərpa işlərinin həyata keçirilməsi üçün daha çevik qərar qəbul etmək lazım idi. Təhsil Nazirliyi bu sahədə həmin dövrdə müəyyən qədər axsayırdı: “Sonradan isə məlum oldu ki, həmin qərar bağçaların fəaliyyətinə mənfi təsir göstərir. Bağçalar bəzi hallarda icra hakimiyyətləri tərəfindən özəlləşdirildi, təmir adı ilə söküldü və yerində binalar, şadlıq evləri, restoranlar tikildi. Bu isə təlim-tərbiyə prosesinin fəaliyyətinə birbaşa mənfi təsir etdi. Ümumiyyətlə, uşaq bağçaları yerli icra hakimiyyətlərinin balansında olduğu bu 10 il müddətində rüşvət, korrupsiya ocağına çevrildi”.
Elşən Qafarov: “Dövlətin həmin obyektləri, mülkləri sökmək hüququ var”
Təhsil eksperti Elşən Qafarov bildirdi ki, dövlətin həmin obyektləri, mülkləri sökmək hüququ var: “2010-cu ildə dövlət mülkiyyətində olan məktəbəqədər təhsil müəssisələrinin özəlləşdirilməsinə icazə verilməsi ilə bağlı sərəncam verilərkən, orada belə bir cümlə var idi ki, “özəlləşdirilən məktəbəqədər təhsil müəssisələri yalnız profilinə uyğun olaraq, yəni fəaliyyət istiqaməti üzrə işləyə bilər”. Yəni orada yalnız məktəbəqədər təhsil müəssisəsi fəaliyyət göstərə bilər. Oranın özəlləşdirilməsindən sonra şəxsi mülklərin, ticarət obyektlərinin tikilməsi qanundan kənardır və bu səbəbdən də dövlət bununla bağlı addım ata bilər. Öhdəliyi yerinə yetirmədiyi üçün dövlətin tam hüququ var ki, müqaviləni ləğv etsin və özəlləşdirilmiş müəsssisənin binası və ya sahəsi geri qaytarılsın. Orada tikilən obyektlər, şəxsi mülklər isə sökülərək ləğv olunsun”.
Günel CƏLİLOVA
