Tələbə həyatı. Hamı təsdiqləyər ki, tələbənin cibi o qədər də dolu olmur. Yəni istədiyi kimi yeyə, geyinə bilmir. Hələ bir də bunun kitab-dəftər, kirayə qalmaq kimi xərcləri var. Digərləri bir kənara, ən vacibi tələbənin yaxşı qidalanmasıdır ki, zehni yaxşı işləsin.
Tələbələr universitetlərdəki bufetlərdə qiymətlərin yüksək olmasından narazıdır. Deyirlər ki, çöldə satılan məhsullar bufetdə bir qədər baha təqdim olunur. Halbuki, tələbələrə təqdim olunan xidmətlər universitet daxilində daha ucuz olmalıdır.
Tələbələrin dediyinə görə, bu qiymətlər onlara sərf etmədiyindən çox zaman ya evdən özləri ilə yemək gətirirlər, yaxud da çıxıb kənardan alırlar.
Nazim Əliyev: “Tələbələr daha ucuz xidmət tələb edirsə, bu zaman universitetlər bufetlərini hazırki icarədardan alaraq yemək xidməti ilə məşğul olan şirkətlərə həvalə edə bilər”
Məsələ ilə bağlı fikir bildirən Nazim Əliyev qeyd etdi ki, tələbələr daha ucuz xidmət tələb edirsə, bu zaman universitetlər bufetlərini hazırki icarədardan alaraq yemək xidməti ilə məşğul olan şirkətlərə həvalə edə bilər. Hazırda ölkədə yemək xidməti göstərən şikətlər hədsiz çoxdur və onlar maksimum ucuz qiymətə işləyirlər.
Kamran Məmmədli: “Süni qiymət artımı təhsil ocaqlarının rəhbərliyinin nəzarətsizliyindən də irəli gəlir”
Iqtisadçı Kamran Məmmədlinin sözlərinə görə, ali təhsil ocaqlarındakı bufetlərdə qiymətlərin tənzimləməsi üçün cavabdehlik həmin müəssisənin rəhbərliyinin üzərinə düşür: “Bu süni qiymət artımı təhsil ocaqlarının rəhbərliyinin nəzarətsizliyindən də irəli gəlir. Hər şey ölkənin daxili bazarındakı mövcud atmosferdən asılıdır. Ölkənin ümumi istehlak bazarında ərzaq məhsulları üzrə qiymətlərdə kəskin bahalaşma qeydə alınıbsa, əlbəttə, istər-istəməz, bütün iaşə obyektlərində olduğu kimi, universitetlərin bufetlərində də qiymət artımı müşahidə olunacaq. Daxili istehlak bazarında ərzaq məhsulları üzrə heç bir kəskin qiymət artımı müşahidə edilmədiyi halda, həmin o ali təhsil ocaqlarında ictimai iaşə xidmətlərini göstərən obyektlərdə qiymətlərdə artım varsa, bu təbii ki, sırf süni qiymət artımıdır”.
Nizami Hüseynov: “Ali təhsil müəssisələrində yeməklərin, ərzaqların qiyməti tələbələrin maddi vəziyyətinə uyğun olmalıdır”
Təhsil eksperti Nizami Hüseynov bildirdi ki, yeməkxanalar olan yer birbaşa təhsil müəssisəsinin rəhbərliyinə aid olmur: “Satışı təşkil edən ayrı bir qurum olur. Ancaq onlar müqavilə əsasında işləyirlər. Əgər qiymət artımı varsa, təbii ki, bu, müqavilə əsasında işləyən, satışla məşğul olan hər hansı bir qurumun daxili iş prinsipinə əsaslanır. Məhz tələbələri nəzərə alaraq orada qiymətlər artırılmamalıdır. Süni qiymət artımı hallarının baş verməsi qəbuledilməz və xoşagəlməz haldır. Bunun qarşısını almaq üçün müəyyən addımlar atılmalıdır. Həmin müəssisənin rəhbərliyi çalışsın ki, yüksək qiymətlə məhsullarını tələbələrə, şagirdlərə satan müəssisələrlə müqavilə imzalamasın. Tələbə və şagirdlər aclıq duyumunu yatırtmaqdan ötrü mütləq nə iləsə qidalanmalıdır. Alacaqları qida orta və orta səviyyədən də aşağı qiymətə olmalıdır. Çünki ali və orta təhsil müəssisələri digər iaşə obyektləri, kafe, restoran deyil. Ali təhsil müəssisələrində yeməklərin, ərzaqların qiyməti tələbələrin maddi vəziyyətinə uyğun olmalıdır”.
Günel CƏLİLOVA
