Hər bir insanın yaşadığı evdə, yol getdiyi avtomobildə, keçdiyi küçədə elə gözlənilməz hadisələr baş verə bilər ki, onları əvvəlcədən demək çox çətindir. Belə təsadüfi risqli hadisələr hər yerdə gözlənilir və onlara, inkişaf səviyyəsindən asılı olmayaraq, bütün ölkələrdə rast gəlinə bilər.
Gözlənilməz hadisələrin qarşısını almaq üçün nə qədər qabaqlayıcı tədbirlər görülsə də, bu sahədə texnoloji yeniliklərdən və maarifləndirmədən istifadə olunsa da, onlardan hər zaman yayınmaq praktik olaraq mümkün deyil. Bu da gözlənilməz hadisələrdən dəyən zərərlərin sığorta yolu ilə əvəz olunmasının əhəmiyyətini artırır.
Bu baxımdan insan həyatına sıx daxil olmuş avtomobil nəqliyyat vasitələrindən istifadə zamanı da baş verən qəfil hadisələr həm avtomobilin özünə, həm də hadisənin digər iştirakçısının həyatına, sağlamlığına, mal və əmlakına zərərlər vura bilir. Bu da, öz növbəsində, avtomobillərdən istifadə ilə əlaqədar həm mülki məsuliyyət, həm də avtomobillərin tam sığortasının əhəmiyyətini artırır. Belə ki, avtomobil nəqliyyat vasitələrindən istifadə zamanı sığorta olunmaq bəzən qaçılmaz bədbəxt hadisələrin vurduğu maddi zərərlərin əvəz edilməsində avtomobil sahibinin köməyinə gəlir.
Ölkəmizdə mövcud olan qanuna əsasən, belə bədbəxt hadisələr zamanı üçüncü şəxslərə dəyə biləcək zərərləri ödəmək üçün icbari, zərərvuran avtonəqliyyat vasitəsinin sahibinin özünə dəymiş maddi zərəri ödəmək üçün avtonəqliyyat vasitəsinin tam sığorta müqaviləsi bağlanır. Həmin müqaviləyə əsasən, qəza zamanı nəqliyyat vasitəsinə zərər dəyərsə sığorta şirkəti zərərçəkənə dəymiş ziyanı ödəyir. Ancaq bəzən bu mövzu ilə bağlı şikayət və narazılıqlar olur. Şikayətlərin əsas məzmunu isə sığorta şirkətinin dəymiş zərəri ödəməkdən imtina etməsidir.
Növbəti belə bir hadisə Ağdaş rayon sakini Vüsal Abubəkirovun başına gəlib. V.Abubəkirov “Ata Sığorta” şirkətindən şikayətçidir. O qeyd edir ki, bu il noyabrın 12-də rayonun Heydər Əliyev prospektində günorta saatlarında 45 BB 606 “VAZ 21 07” markalı maşınla hərəkət edən zaman “Ford” markalı 99 CA 192 nömrəli maşını arxadan vurub: “Həmin an maşını sığortaladığım “Ata Sığorta” şirkəti ilə əlaqə saxladım. Şirkətin Göyçay filialının əməkdaşı gəlib hadisəni aktlaşdırdı. Aktda qarşı tərəfə 280 manat ziyan dəydiyi qeyd edildi. Dedilər ki, ziyan 15 iş günü ərzində ödəniləcək. Ancaq üstündən bir aydan da artıq vaxt keçməsinə baxmayaraq, qarşı tərəfin maşınına dəyən ziyan ödənilmir. Hər dəfə müxtəlif bəhanələr gətirirlər və deyirlər ki, büdcələrində pul yoxdur”.
“Ata Sığorta”: “Qarşı tərəfə dəymiş ziyan bir-iki gün ərzində ödəniləcək”
Məsələ ilə bağlı “Ata Sığorta” şirkəti ilə əlaqə saxladıq. Şirkətdən bildirildi ki, qarşı tərəfə dəymiş ziyan bir-iki gün ərzində ödəniləcək.
Ceyhun Əliyev: “Sığorta şirkətləri tərəfindən zərərin qiymətləndirilməsi ədalətli şəkildə aparılmalıdır”
Sığorta eksperti Ceyhun Əliyev bildirdi ki, sığorta şirkətləri ilə müştərilər arasında yaranan mübahisəli halların çoxu zərərin məbləği ilə əlaqədardır. Müştərilərin zərərin məbləği ilə bağlı narazılıqları əsaslı da olur, əsassız da: “Sığorta şirkətləri tərəfindən zərərin qiymətləndirilməsi ədalətli şəkildə aparılmalıdır, müştərilər isə əlavə qazanc əldə etmək fikri ilə hərəkət etməməlidirlər”.
Günel CƏLİLOVA
