Prezident İlham Əliyevin imzaladığı yeni fərman və sərəncamlara əsasən, ölkədə müavinətlərin artırılması ilə yanaşı, tələbə, magistr və doktorantların da təqaüdləri artırılıb. Sərancama uyğun olaraq doktorantlara, ali təhsil, orta ixtisas və peşə təhsili müəssisələrində, həmçinin Azərbaycan Milli Elmlər Akademiyasının (AMEA) magistratura səviyyəsində təhsil alan tələbələrin təqaüdlərinin 20% artırılması nəzərdə tutulur.
Sərəncamla gələn ilin əvvəlindən həmin təqaüdlərin məbləği elmlər doktoru hazırlığı üzrə doktorantlar üçün 360 manat, fəlsəfə doktoru hazırlığı üzrə doktorantlar üçün 216 manat, ali təhsil müəssisələrində və AMEA-da adlı təqaüd alan tələbələr üçün 204 manat, magistr səviyyəsi üzrə akademik göstəriciləri 91-100 bal olan tələbələr üçün 174 manat, 71-100 bal olan tələbələr üçün 144 manat, 51-100 bal olan tələbələr üçün 96 manat, bakalavr səviyyəsi üzrə akademik göstəriciləri 91-100 bal olan tələbələr üçün 156 manat, 71-100 bal olan tələbələr üçün 132 manat, 51-100 bal olan tələbələr üçün 90 manat təşkil edəcək.
Orta ixtisas təhsili müəssisələrində təqaüdün məbləği akademik göstəriciləri 91-100 bal olan tələbələr üçün 90 manata, 71-100 bal olan tələbələr üçün 72 manata, 51-100 bal olan tələbələr üçün 60 manata, peşə təhsili müəssisələrində akademik göstəriciləri “5” olan tələbələr üçün 90 manata, “4” və “5” olan tələbələr üçün 72 manata, “3”-“5” olan tələbələr üçün 60 manata çatdırılacaq.
Qeyd edilənə görə, dövlət başçısının yeni fərman və sərəncamları əlilliyi olan şəxslər və digər kateqoriyalardan ibarət ümumilikdə 732 min şəxsin, o cümlədən 132 min doktorant və tələbəni əhatə edərək, müavinət və təqaüd formasında onlara yönələn sosial ödənişlərin gələn ilin əvvəlindən artırılmasını təmin edir. Bu artımlar üçün illik əlavə 200 milyon manat ayrılıb.
İlqar Orucov: “Cənab Prezidentin doktorantların, magistrlərin və tələbələrin təqaüdlərinin artırılması ilə bağlı sərəncamı birmənalı olaraq...”
Tələbə, magistr və doktorantların təqaüdlərinin artırılmasını müsbət qarşılayan Azərbaycan Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov bizimlə söhbətində bildirdi ki, dövlətin sosial siyasətində tələbələr, magistr və doktorantlar həmişə önəmli yer tutur. Bu sərəncamı Prezidentin sosial qayğı siyasətinin növbəti nümunəsi hesab edən İ.Orucovun sözlərinə görə, gənclər dövlətin diqqət və qayğısı ilə əhatə olunub. “Əlbəttə, cənab Prezidentin doktorantların, magistrlərin və tələbələrin təqaüdlərinin artırılması ilə bağlı sərəncamı birmənalı olaraq sosial bir sərəncamdır və bunu yüksək qiymətləndiririk. Bu kateqoriyadan olan şəxslərin, təhsil alan tələbələrin təqaüdlərinin artırılması hər zaman dövlətin diqqətində olub. 2003-cü ildə cənab Prezident ilk dəfə dövlət başçısı seçilərkən “mən hər bir azərbaycanlının prezidenti olacağam” deyə çox məşhur bir şüar irəli sürdü və bu sözlər sonrakı illərdə bir daha təsdiqlədi ki, bu sadəcə söz deyil və ölkə başçısının 18 illik fəaliyyətinin başlıca istiqamətidir. Prezidentin sosial sahədə qəbul etdiyi bütün qərarlarda, imzaladığı sərəncam və fərmanlarda vətəndaş marağının təmin olunduğunu görürük. Biz bu illər ərzində bütün bunların şahidi olmuşuq. Sosial istiqamətdə verilən bu sərəncamın da əhəmiyyəti bütün mənalarda böyükdür və təhsil alan gənclərin sosial müdafiəsinə yönəlmiş çox vacib bir sənəddir. Prezidentin bu sahədə imzaladığı sərəncamın əhatə dairəsi kifayət qədər genişdir. Digər tərəfdən, bu sənəddə diqqət çəkən məqamlardan biri ondan ibarətdir ki, bu təqaüdlər müəyyənləşdirilərkən eyni zamanda burada diferensasiyaya ciddi fikir verilir. Yəni yaxşı oxuyan bir tələbə, bir gənc dövlətin qayğısı ilə əhatə olunur. Hətta tələbə dövlət hesabına deyil, öz hesabına təhsil alırsa, lakin onun akademik göstəriciləri, qiymətləri yüksəkdirsə dövlət belə tələbələrin də qayğısına qalır. Bizim illərdir arzuladığımız, görmək istədiyimiz işlərdir ki, bunlar həyata keçirilir. Bu artımlarla sosial baxımdan aztəminatlı təbəqə sayılan tələbələr dövlətin qayğı və diqqətini hiss edir”.
Prezidentin bu istiqamətdə imzaladığı sərəncama çox böyük əhəmiyyət və dəyər verdiyini deyən İ.Orucov hesab edir ki, bundan sonra da dövlətin əsas hədəfi onun vətəndaşının yaxşı yaşaması, tələbəsinin yaxşı təhsil alması olacaq: “Biz həm tələbələrin, həm magistrlərin, həm də doktorantların sosial müdafiəsi ilə bağlı bundan sonra da dövlətin qayğısını, dəstəyini görəcəyik”.
Aytən Cəlilova: “Biz sevinirik ki, dövlətimiz bizi heç zaman unutmur və tələbələr də dövlətin sosial qayğı siyasəti ilə əhatə olunur”
Milli Aviasiya Akademiyasının hüquq fakültəsinin 4-cü kurs tələbəsi Aytən Cəlilova bizimlə söhbətində bildirdi ki, Prezidentin bu sərəncamı tələbələrin sosial müdafiəsinin gücləndirilməsi istiqamətində atılan növbəti addımdır. A.Cəlilovanın sözlərinə görə, təqaüdlərin artırılması həm tələbələrin, həm də magistrlərin sevincinə səbəb olub. Akademiyanın aktiv tələbələrindən biri olan A.Cəlilova deyir ki, dövlət hər zaman gənclər haqda düşünüb və onları stimullaşdırılması istiqamətində addımlar atıb. “Doktorantlar və magitsrlərlə yanaşı tələbələrin də təqaüdlərinin artırılması ölkəmizin çoxminli tələbə ordusu tərəfindən müsbət qarşılanır. Biz sevinirik ki, dövlətimiz bizi heç zaman unutmur və tələbələr də dövlətin sosial qayğı siyasəti ilə əhatə olunur. Biz də öz növbəmizdə dövlətin qayğı siyasətinə cavab olaraq daha yaxşı oxumalı və cəmiyyətimizə, dövlətimizə yararlı mütəxəssislər olmalıyıq. Dövlət tələbə gəncləri hər zaman düşünür və sosial qayğı siyasətində onlara böyük yer verir. Burada diqqətçəkən məqamlardan biri odur ki, daha yaxşı oxuyan tələbələrin təqaüdləri daha artıqdır. Bu ballara görə müəyyənləşib. Düşünürəm ki, təqaüdlərin artırılması tələbələrin motivasiyasının daha da güclənməsinə imkanlar açır. Bu, dövlətin gənclərə, tələbələrə göstərdiyi diqqət və qayğının növbəti nümunəsidir”-deyə A.Cəlilova qeyd etdi.
İradə SARIYEVA
