Məlum olduğu kimi, “Lotereya haqqında” qanuna dəyişiklik ediləcək. Qeyd edək ki, qanun layihəsi dövlət başçısının Sərəncamına uyğun olaraq hazırlanıb.
Sənəddə lotereyaların təşkili və keçirilməsi sahəsində tənzimləyici orqanın müəyyən olunması və onun fəaliyyət dairəsinin təkmilləşdirilməsi, o cümlədən tiraj komissiyasının üzvü ola biləcək şəxslərin siyahısının və onların vətəndaş qüsursuzluğunu təsdiq edən sənədlərin səlahiyyətli orqanla razılaşdırılması prosedurunun müəyyən olunması, lotereyanın uduş fondunun yuxarı həddinin (80 faizdən çox ola bilməməsi tələbinin) aradan qaldırılması və bir tirajın uduş fondunun oynanılması nəticəsində həmin uduş fondunun udulmamış hissəsinin növbəti tirajda oynanılmasının nəzərdə tutulması, lotereya şərtlərinin təkmilləşdirilməsi, lotereyanın təşkili və keçirilməsi, habelə onun şərtlərində dəyişiklik edilməsi ilə bağlı müddətlərə yenidən baxılması (müddətlərin optimallaşdırılması), lotereya biletində nəzərdə tutulmalı bir sıra məlumatların lotereya təşkilatçısının internet səhifəsində əks olunması, virtual lotereyanın təşkili və keçirilməsinin hüquqi əsaslarının yaradılması, lotereyanın dayandırılması və onun keçirilməsinə xitam verilməsi əsasları və qaydasının təkmilləşdirilməsi kimi məsələlər əksini tapır.
Qanun layihəsinin hazırlanmasında əsas məqsədlərdən birinin bu sahədə şəffaflığa nail olunması və “qara bazar”ın aradan qaldırılmasıdır.
Danılmaz faktdır ki, bir sıra xarici ölkələrdə bu tip oyunların keçirilməsinə icazə verilir. Məlumatlara görə, həmin oyunları oynayanlar arasında yerli vətəndaşlarımız da az deyil. Gürcüstan, Baltikyanı və digər ölkələrdə vətəndaşlar oyun oynayırlar və qaydaya uyğun olaraq vergilərini də ödəyirlər.
Pulun xaricə axmaması üçün mərc, qumar oyunları ilə bağlı ölkəmizdə də şərait yaradıla bilərmi?
“Qanun layihəsinin əsas məqsədi qeyri-leqal lotereya bazarının rəsmiləşdirilməsi və vəsaitin xaricə axınının qarşısını almaqdır”
Millət vəkili Vüqar Bayramov “Bakı-Xəbər”ə açıqlamasında qeyd etdi ki, təklif olunan yeni qanun layihəsinin özəlliyi ondan ibarətdir ki, yerli lotereya oyunlarından istifadə təşkil ediləcək. Həmçinin, layihədə lotereyalardan və idman mərc oyunlarından pul şəklində əldə edilən 500 manata qədər uduşların gəlir vergisindən azad edilməsi nəzərdə tutulub: “Bu, orta aylıq maaşdan da aşağı məbləğdir. Daha böyük məbləğdə uduşun gəlir vergisindən azad edilməsi yaxşı olardı”.
Həmsöhbətimiz onu da əlavə etdi ki, vətəndaşların xarici lotereya oyunlarında iştirak etməməsi üçün təşviqedici metodlar də nəzərdə tutulub: “Nəzərə almaq lazımdır ki, lotereya bazarında qara bazarın həcmi 700 milyon manatdır. Bunların bir qismi xaricə gedən vəsaitdir. Bu səbəbdən də qanun layihəsinin əsas məqsədi qeyri-leqal lotereya bazarının rəsmiləşdirilməsi və vəsaitin xaricə axınının qarşısını almaqdır. Davam edən dəyişiklikdən sonra yerli lotereya bazarı genişlənəcək və vəsaitlərin ölkədə qalması mümkün olacaq”.
Günel CƏLİLOVA
