44 günlük Vətən müharibəsi zamanı azğınlaşmış ermənilər mülki əhalini hədəf aldılar. Onlar əlisilahlı hərbçilərlə deyil, sadə insanlarla, uşaqlarla, yaşlılarla müharibə aparmağa üstünlük verirdilər.
İkinci Qarabağ müharibəsi dövründə Ermənistan silahlı qüvvələri münaqişə zonasından və cəbhə xəttindən uzaqda yerləşən dinc şəhər və rayonları müxtəlif növ silahlarla, artilleriya və ballistik raketlərlə atəşə tutaraq, mülki əhalini və eləcə də infrastruktur obyektlərini hədəf seçərək, fərdi yaşayış evlərinə, sosial və iaşə obyektlərinə irimiqyaslı zərər vurub. Dəymiş ziyanın qiymətləndirilməsi və aradan qaldırılması məqsədilə Azərbaycan Prezidenti İlham Əliyevin 6 noyabr 2020-ci il tarixli müvafiq Sərəncamı ilə yaradılmış Dövlət Komissiyası tərəfindən təşkil olunmuş fəaliyyət nəticəsində ümumilikdə 11 şəhər və rayon ərazisində 12 000-dən artıq obyektə baxış keçirilib, qiymətləndirmə və təmir-tikintinin ilkin planlaşdırılması işləri aparılır.
Qeyd etdiyimiz kimi, 44 günlük Zəfər müharibəsində mülki əhaliyə dəymiş ziyanın ödənilməsi ilə bağlı tapşırıq verilsə də, bu işdə ləngimələr qeydə alınır. Belə ki, 44 günlük Zəfər müharibəsi zamanı Beyləqan rayonu Kəbirli kəndində yerləşən evlərin bir qismi hələ də təmir olunmayıb.
Beyləqan rayonunun adıçəkilən kəndində yerləşən Rabil Əsədova məxsus ev də müharibə zamanı zərər görüb. R.Əsədov qeyd edir ki, Vətən müharibəsi iştirakçısıdır. Qardaşı Saleh Əsədov isə həmin müharibədə şəhid olub. Hazırda bu evdə yaşayanlar təhlükəli vəziyyətdə olduqlarını iddia edirlər. Səbəb isə evin müharibə günlərində düşmən tərəfindən atılan mərmilər nəticəsində ziyan çəkməsidir: “Müharibə zamanı evin daxili divarlarında çatlar əmələ gəlib, daşların bəziləri yerindən çıxıb. Belə olan halda evdə yaşamaq təhlükəlidir. Evin təmiri ilə bağlı aidiyyəti qurumlara müraciət etsək də, bizə hər hansı bir cavab verilməyib”.
Beyləqan rayon İcra Hakimiyyəti: “Əsədovlar ailəsinin evi yaxın zamanda təmir olunacaq”
Məsələ ilə bağlı Beyləqan rayon İcra Hakimiyyətindən bildirildi ki, Əsədovlar ailəsinin evi yaxın zamanda təmir olunacaq. Onlar təmirli evdə yaşayacaqlar.
Mayis Əliyev: “İkinci Qarabağ müharibəsi zamanı zərər görmüş evlər qısa müddətdə təmir olunmalı idi, ancaq…”
Sosial sahə üzrə ekspert Mayis Əliyev qeyd etdi ki, İkinci Qarabağ müharibəsi zamanı zərər görmüş evlər qısa müddətdə təmir olunmalı idi: “Bu cür həssas məsələdə insanları incitmək olmaz. O şəxslərin evi öz günahlarından deyil, ermənilərin atdığı raket nəticəsində yararsız hala düşüb. Əhaliyə dəymiş ziyanın ödənilməsi ilə bağlı Prezidentin xüsusi göstərişi var. Kimliyindən asılı olmayaraq, hər kəs o göstərişə əməl etməlidir”.
Günel CƏLİLOVA
