“Saxta siqaret və alkoqol artıq ölkəyə kənardan gətirilmir, bu məhsullar Azərbaycanın özündə, zirzəmilərdə istehsal edilir”. Bunu Dövlət Gömrük Komitəsinin (DGK) sədri Səfər Mehdiyev haqqın.az-a müsahibəsində bildirib.
DGK sədri həmçinin vurğulayıb: “Bəli, belədir. Və biz bunu bilirik. Əlimizdə ciddi faktlar var. Azərbaycanda, zirzəmilərdə saxta alkoqol - viski, araq, konyak istehsal olunur… Biz bununla mübarizəni davam etdiririk, bir neçə cinayətkar şəbəkəni zərərsizləşdirməyə müvəffəq olmuşuq”.
DGK sədri açıq şəkildə bildirir ki, ölkənin daxilində saxta siqaret və alkoqol məhsulları istehsal edən şəbəkə var. Beləliklə S.Mehdiyev ölkədəki saxta alkoqol və spirt istehsalçılarını ifşa edib.
Ekspertlər deyir ki, əksər hallarda bir sıra insanlar, ictimaiyyət nümayəndələri saxta siqaret və alkoqol məhsullarının gömrükdən keçirilərək, yaxud qaçaqmalçılıq yolu ilə ölkəyə gətirildiyini iddia edir. S.Mehdiyevin isə onların bu iddiaları qarşısına əsaslı faktlar çıxardığını deyən ekspertlər hesab edir ki, saxta siqaret və akloqol istehsal edilən zirzəmilər, bu işlə məşğul olanlar müəyyənləşməli və məsuliyyətə cəlb olunmalıdır.
“Faktiki olaraq, Azərbaycanda saxta alkoqol içkilərin isehsalı ilə məşğul olan qüvvələr var”
“Azad İstehlakçılar” Birliyinin sədri Eyyub Hüseynov bizimlə söhbətində bildirdi ki, saxta içki istehsal edən mafiya haqqında uzun müddətdir fikirlər var və hətta DİN-in müvafiq idarəsinin apardığı işlər nəticəsində belə şəbəkə üzvlərinin xeyli hissəsi ifşa olunub. E.Hüseynovun sözlərinə görə, DGK sədrinin sözlərində böyük həqiqət var, amma o eyni zamanda, bu mafiyanın fəaliyyət göstərdiyi ünvanları aidiyyəti qurumlara dəqiq göstərməlidir. “Faktiki olaraq, Azərbaycanda saxta alkoqol içkilərin istehsalı ilə məşğul olan qüvvələr var. “Azad İstehlakçılar” Birliyi uzun illərdir müşahidə edir ki, ayrı-ayrı dövlət qurumları arasında bəzən lazımı səviyyədə əməkdaşlıq yoxdur. Səfər Mehdiyev bütün bu faktları müvafiq dövlət qurumlarına ötürməli və o şəbəkənin ifşa edilməsinə təşəbbüs göstərməlidir. DGK sədrinin fikirləri ilə 50 faiz razıyam. Ona görə 50 faiz ki, saxta spirtli içkilərlə bağlı yerli bazarda ciddi problemlər var. Təsadüfi deyil ki, iki il bundan əvvəl Daxili İşlər Nazirliyinin Baş Cinayətkarlıqla Mübarizə İdarəsi ən brend markalı içkilərin Azərbaycanda saxta yollarla hazırlandığını ifşa etdi. Lakin siqaretlərlə bağlı məsələdə Səfər Mehdiyevlə razı deyiləm. Ölkənin əmtəə bazarında neçə illərdir külli miqdarda qaçaqmal siqaret var. 2017-ci ildə beynəlxalq təşkilatların hesablamalarına görə, qaçaqmal siqaretdən Azərbaycanın dövlət büdcəsi 20 milyon manat zərər çəkib. Bunlar da, şübhəsiz, həmin dövrdə gömrük orqanlarının “xeyir-duası” ilə ölkəyə daxil olurdu, yaxud da onların xəbəri olmadan gətirilirdi... Bunu sübut etmək üçün qəzet köşklərinə yaxınlaşıb “mənə aksiz siqaret ver” demək kifayətdir, o siqaretlərin nümunələri “Azad İstehlakçılar” Birliyində də var. Bu, ölkə bazarının ciddi problemlərindən biridir”.
E.Hüseynov deyir ki, saxta siqaretlər qaçamalıçılıq yolu ilə müxtəlif ölkələrdən, o cümlədən də Rusiyadan ölkəmizə gətirilib, amma bunun qarşısı qismən alınıb, tam alınması üçün də işlər davam etdirilməlidir. “DGK sədri əlində olan bütün ifşaedici faktları müvafiq dövlət qurumlarına təqdim etməlidir ki, bunun müsbət nəticəsi olsun. Biz ictimai qurum olaraq bu kimi hallarla bağlı dövlət qurumlarına müraciət etdikdə onlar bizdən daha çox sənəd-sübut tələb edirlər...”- deyə E.Hüseynov qeyd etdi.
İradə SARIYEVA
